មូលហេតុដែលអ្នកមិនគួរទិញរថយន្តបុកយកមកប្រើប្រាស់

07/01/2017

ដោយសារតែ រថយន្តធ្លាប់ត្រូវបានបុក ឬខូចខាតក្នុងគ្រោះថ្នាក់ចរាចរណ៍ មានតម្លៃថោក វាត្រូវបានឈ្មួញយកទៅជួសជុលវិញយ៉ាងល្អ ដែលជាហេតុធ្វើឲ្យអ្នកទិញ ដែលពុំមានជំនាញ មួយចំនួនមិនអាចកំណត់បានថា រថយន្តទាំងអស់នោះធ្លាប់ត្រូវបានបុកនោះទេ។ ក្រៅពីនេះ ក៏មានបងប្អូនយើងមួយចំនួនទៀត បានសម្រេចចិត្ត ក្នុងការទិញយករថយន្តបុក មកប្រើប្រាស់ដោយសារតែ ពួកគាត់គិតថាវាមានតម្លៃថោកជាង និងបន្ទាប់ពីជួសជុលរួច វាអាចចំណេញជាងរថយន្តមូល ឬថ្មី។ ក៏ប៉ុន្តែ សម្រាប់ការពិតវិញ គឺវាមិនអាចចំណេញដូចទៅនឹងអ្វី ដែលពួកគាត់បានរំពឹងទុកនោះទេ។

រូបភាពពីគេហទំព័រ edmunds.com

ខាងក្រោមនេះ គឺជាមូលហេតុចម្បងមួយចំនួន ដែលអ្នកត្រូវគិតឲ្យបានច្បាស់លាស់ មុននឹងសម្រេចចិត្តថា នឹងត្រូវទិញរថយន្តបុក យកមកប្រើប្រាស់ ព្រោះថា ការសម្រេចចិត្តបែបនេះមិនមែនជារឿងមួយ ដែលល្អប្រសើរសម្រាប់អ្នក និងអ្នករួមដំណើរជាមួយអ្នកនោះទេ៖

មិនមានការធានាត្រឹមត្រូវ

ពិតណាស់ បើយើងប្រៀបធៀប រថយន្តបុក ជាមួយនឹងរថយន្តថ្មី ឬមូល គឺរថយន្តបុក មិនត្រូវបានទទួលការធានា ឬសេវ៉ាកម្មជួសជុលអ្វី ពីក្រុមហ៊ុនផលិតរថយន្តនោះទេ ពីព្រោះ បន្ទាប់ពីការជួសជុលរថយន្ត ដោយសារការបុកទង្គិចនៅក្នុងគ្រោះថ្នាក់ចរាចរណ៍ ឬខូចខាតដោយសារទឹកលេច រាល់ការធានារ៉ាប់រងទាំងឡាយ ពីក្រុមហ៊ុនលក់រថយន្ត ត្រូវចាត់ទុកជាអាសាបង់។ លើសពីនេះទៅទៀត ការប្រើប្រាស់នូវប្រភេទរថយន្តបុក ក៏អាចនឹងពិបាក ក្នុងការការស្នើរសុំទិញធានារ៉ាប់រងគ្រោះថ្នាក់ចរាចរណ៍ ពីក្រុមហ៊ុនធានារ៉ាប់រងផងដែរ ពីព្រោះបើតាមច្បាប់ក្នុងប្រទេសធំៗមួយចំនួន រាល់រថយន្តដែលធ្លាប់បុកទង្គិចធ្ងន់ធ្ងរ នៅក្នុងគ្រោះថ្នាក់ចរាចរណ៍ គឺមិនត្រូវបានអនុញ្ញាតិឲ្យយកមកបើកបរនៅលើផ្លូវសាធារណៈនោះទេ។

រូបភាពពីគេហទំព័រ edmunds.com

តម្លៃសម្រាប់ការជួសជុល អាចថ្លៃជាងការទិញរថយន្តមូល

តើអ្នកប្រាកដក្នុងចិត្តដែរឬទេ ថារាល់ថ្លៃសេវាជួសជុល និងគ្រឿងបន្លាស់រថយន្ត ដែលអ្នកទិញយកមកផ្លាស់ប្តូរ នឹងមានតម្លៃ ថោកជាងការទិញរថយន្តមូល? ថ្វីបើអ្នកអាចគណនានូវតម្លៃ របស់គ្រឿងបន្លាស់ នៅត្រង់ចំណុច ដែលអ្នកអាចមើលឃើញនឹងភ្នែកបានមែន ប៉ុន្តែ អ្នកមិនអាចគណនាបាននូវចំណុចមួយចំនួនទៀត ដែលអ្នកមិនអាចពិនិត្យឃើញនោះទេ ដូចជាផ្នែកតូចៗ នៅក្នុងម៉ាស៊ីនរថយន្តជាដើម។ ម៉្យាងវិញទៀត នៅក្នុងនោះ ក៏មានគ្រឿងមួយចំនួនមានតម្លៃថ្លៃ ឬតម្រូវឲ្យយើងធ្វើការកម្ម៉ងទិញពីបរទេស ដែលអាចចំណាយពេលវេលារបស់យើងជាច្រើនផងដែរ។

រថយន្តបុកប្រៀបបានដូចជាកែវបែកអញ្ចឹង

មែនហើយ នៅក្នុងប្រទេសយើង នាពេលបច្ចុប្បន្ននេះ សម្បូរទៅដោយជាងដែលមានជំនាញ និងថ្វីដៃល្អ ក្នុងការជួសជុលរថយន្ត មិនថាការបាញ់ថ្នាំ តោនតួររថយន្ត ឬក៏ជួសជុលផ្នែកម៉ាស៊ីននោះទេ សុទ្ធតែជារឿងដែលពួកគាត់អាចធ្វើបានយ៉ាងល្អ។ ប៉ុន្តែ រថយន្តដែលធ្លាប់ត្រូវបានបុកទង្គិចធ្ងន់ធ្ងរ គឺប្រៀបបានដូចទៅនឹងកែវបែកអញ្ចឹងដែរ ព្រោះថាមានចំណុចមួយចំនួន ទោះបីជាយើងជួសជុលវាបានល្អយ៉ាងណាក៏ដោយ ក៏វាមិនអាចល្អពេញលេញ និងផ្តល់ឲ្យយើងនូវសុវត្ថភាពគ្រប់គ្រាន់ ដូចទៅនឹងរថយន្តមូល ឬថ្មី នោះទេ។

អានបន្ត

Like 4737

របៀបការពារមិនឲ្យបបូរមាត់ស្ងួត និងប្រេះ ក្នុងរដូវត្រជាក់នេះ

សង្គម, សុខភាព

28/12/2016

ក្នុងរដូវត្រជាក់នេះ វាមានភាពងាយណាស់ក្នុងការធ្វើឲ្យបបូរមាត់យើងស្ងួត និងឆាប់ប្រេះបាន។ សម្រាប់អ្នកខ្លះ មិនថាក្នុងរដូវណានោះទេ ពួកគេតែងតែជួបប្រទះបញ្ហាមាត់ស្ងួត និងប្រេះនេះ ដោយសារតែការខ្វះជាតិទឹក ឬខ្វះជាតិវីតាមីនមួយចំនួន ឬដោយសារអាឡែហ្ស៊ីជាមួយថ្នាំផ្សេងៗ។ ខាងក្រោមនេះ គឺជារបៀបសាមញ្ញៗមួយចំនួន ដែលអ្នកអាចធ្វើ ដើម្បីការពារកុំឲ្យបបូរមាត់ស្ងួត និងប្រេះបាន។

ផឹកទឹកឲ្យបានច្រើន

បញ្ហាចម្បង ដែលធ្វើឲ្យបបូរមាត់អ្នកប្រេះ ឬក៏ស្បែកស្ងួតនោះ គឺដោយសារតែអ្នកខ្វះជាតិទឹកក្នុងខ្លួន។ ដូច្នេះ អ្នកគួរតែផឹកទឹកឲ្យបានច្រើន យ៉ាងហោចណាស់ 8 កែវក្នុងមួយថ្ងៃ ដើម្បីរក្សាជាតិទឹកក្នុងខ្លួនរបស់អ្នកឲ្យបានគ្រប់គ្រាន់។ អ្នកក៏អាចទទួលទានចំណីអាហារ ដែលសម្បូរជាតិទឹកមួយចំនួនផ្សេងទៀតបានផងដែរ ដើម្បីជួយរក្សាជាតិទឹកក្នុងខ្លួនក្រៅពីការផឹកទឹក ដែលអាហារទាំងនោះត្រូវបានរៀបរាប់ក្នុង អត្ថបទនេះ។

ទទួលទានជាតិវីតាមីន និងសារធាតុចិញ្ចឹមផ្សេងៗឲ្យបានគ្រប់គ្រាន់

អ្នកអាចមានអាការៈប្រេះបបូរមាត់នេះ គឺអាចដោយសារមកពីអ្នកខ្វះសារធាតុចិញ្ចឹម ឬវីតាមីនមួយចំនួន។ ដូច្នេះអ្នកត្រូវប្រាកដថា អ្នកនឹងទទួលទានសារធាតុទាំងនោះឲ្យបានគ្រប់គ្រាន់ ដែលវាមានដូចជា ក្រុមវីតាមីន B, ជាតិដែក, ជាតិអាស៊ីតខ្លាញ់ ដែលមានក្នុងត្រី និងប្រេងផ្សេងៗ, និងថ្នាំគ្រាប់ជាតិរ៉ែ ជាដើម។

ប្រើប្រាស់ឧបករណ៍បន្ថែមជាតិសំណើមនៅក្នុងបន្ទប់ ឬផ្ទះរបស់អ្នក

បើសិនជាអ្នករស់នៅទីកន្លែង ដែលមានអាកាសធាតុក្ដៅស្ងួតខ្លាំង អ្នកគួរទិញប្រដាប់បន្ថែមជាតិសំណើមក្នុងបរិយាកាស (Humidifier) ដាក់ក្នុងបន្ទប់ ឬផ្ទះរបស់អ្នក ដើម្បីឲ្យខ្យល់ក្នុងកន្លែង ដែលអ្នករស់នៅប្រចាំថ្ងៃមានជាតិសើម។ ព្យាយាមធ្វើឲ្យជាតិសំណើមក្នុងបន្ទប់ ឬផ្ទះរបស់អ្នកឲ្យនៅក្នុងកម្រឹតត្រឹម 30% ទៅ 50% ហើយអ្នកគួរធ្វើការសម្អាតឧបករណ៍នោះ ឲ្យបានស្អាតជាប្រចាំ ទៅតាមការបង្រៀនពីក្រុមហ៊ុនរបស់ឧបករណ៍នោះ។

ប្រើប្រាស់ផលិតផលបន្ថែមជាតិសំណើមលើបបូរមាត់អ្នក

ប្រើប្រាស់ផលិតផលបន្ថែមជាតិសំណើមមួយចំនួនលើបបូរមាត់របស់អ្នក ដើម្បីធ្វើឲ្យបបូរមាត់អ្នករក្សាជាតិសើម និងស្រូបយកសំណើមបានល្អ និងងាយស្រួល។ នៅពេលដែលអ្នកទិញផលិតផលទាំងនោះ អ្នកគួរស្វែងរកសារធាតុមួយចំនួននៅក្នុងនោះ ដែលមានដូចជា ប្រេងវីតាមីន E, ប្រេងដូង, ប្រេងប៊ឺគ្រាប់ស្សៀ (Shea butter), និងប្រេងប៊ឺរបស់សត្វ Emu (Emu Butter) ជាដើម។

ប្រើប្រាស់ក្រែមលាបការពារមាត់ប្រេះ

នៅក្នុងរដូវរងារ អ្នកអាចលាបក្រែមការពារមាត់ប្រេះ ដើម្បីឲ្យបបូរមាត់របស់អ្នកមានជាតិសើមបាន ហើយវាក៏អាចព្យាបាលមាត់ ដែលកំពុងប្រេះបានផងដែរ។ វាក៏អាចការពារបបូរមាត់របស់អ្នក មិនឲ្យប៉ះពាល់ជាមួយនឹងសារធាតុប្រតិកម្មផ្សេងៗពីខាងក្រៅបានដែរ។ ជៀសវាងការប្រើប្រាស់ក្រែមលាបមាត់ពណ៌ធម្មតា ជាពិសេសសម្រាប់នារីៗ ព្រោះថាវាអាចងាយធ្វើឲ្យបបូរមាត់អ្នកស្ងួតបាន។

ធ្វើការដកដង្ហើមតាមច្រមុះ

នៅពេលដែលអ្នកកំពុងមានមាត់ប្រេះ អ្នកគួរធ្វើការដកដង្ហើមតាមច្រមុះ ជៀសវាងការដកដង្ហើមតាមមាត់ ព្រោះថាខ្យល់ក្ដៅពីដង្ហើមរបស់អ្នក អាចធ្វើឲ្យបបូរមាត់អ្នកកាន់តែស្ងួតបាន។

ជៀសវាងការចេញក្រៅក្នុងអាកាសធាតុមិនល្អ ដោយមិនមានអ្វីការពារ

នៅពេលដែលអ្នកចេញទៅខាងក្រៅ នៅកន្លែងដែលមានអាកាសធាតុក្ដៅ ឬត្រជាក់ខ្លាំង អ្នកគួរពាក់ម៉ាស់ការពារ កុំឲ្យមាត់របស់អ្នកត្រូវកម្ដៅថ្ងៃ ឬខ្យល់ត្រជាក់ស្ងួតខ្លាំងពេក។

ជៀសវាងការប្រើប្រាស់ផលិតផល ដែលធ្វើឲ្យអាឡែហ្ស៊ីបបូរមាត់របស់អ្នក

ជួនកាល មាត់របស់អ្នកប្រេះខ្លាំង អាចដោយសារមកពីវាអាឡែហ្ស៊ីជាមួយនឹងផលិតផលមួយចំនួន ដែលអ្នកប្រើ ដែលវាអាចមានដូចជាក្រែមលាបមាត់ ទឹកអប់ និងថ្នាំដុះធ្មេញជាដើម។ ដូច្នេះអ្នកគួរពិនិត្យមើលឲ្យច្បាស់មុននឹងប្រើផលិតផលទាំងនោះ។

កុំលិតបបូរមាត់របស់អ្នក

ទោះបីជាអ្នកគិតថា ការលិតមាត់របស់អ្នក អាចជួយឲ្យវាមានជាតិសំណើមមែន តែផ្ទុយទៅវិញ វាជាមូលហេតុដែលធ្វើឲ្យបបូរមាត់អ្នកឆាប់ស្ងួតទៅវិញទេ ហើយបន្ថែមពីនេះ វាក៏អាចបណ្ដាលឲ្យមាត់របស់អ្នកឆាប់រមាស់បានផងដែរ។

កុំខាំ ឬបេះស្បែកបបូរមាត់របស់អ្នក

នៅពេលដែលបបូរមាត់របស់អ្នកកំពុងប្រេះ សូមកុំខាំ ឬយកដៃទៅបេះស្បែកបបូរមាត់ប្រេះនោះ ព្រោះថាអ្នកនឹងបកស្បែក ដែលការពារបបូរមាត់អ្នកឲ្យរហែកកាន់តែធំ ហើយបណ្ដាលឲ្យបបូរមាត់អ្នកកាន់តែស្ងួតបន្ថែមទៀត។ ទុកឲ្យបបូរមាត់របស់អ្នកជាសះស្បើយដោយខ្លួនឯង ដោយជៀសវាងការខាំ ឬបេះស្បែកបបូរមាត់អ្នក តាមតែអ្នកអាចធ្វើបាន។

ជៀសវាងចំណីអាហារមួយចំនួន

អ្នកគួរជៀសវាងបរិភោគចំណីអាហារមួយចំនួន ដែលធ្វើឲ្យបបូរមាត់របស់អ្នកប្រតិកម្ម ជាពិសេសអាហារ ដែលមានជាតិហិរខ្លាំង ដូចជាម្ទេស ឬទឹកជ្រលក់ហិរ និងអាហារដែលមានសារធាតុអាស៊ីតខ្ពស់ ដូចជាផ្លែប៉េងប៉ោះជាដើម។ អ្នកក៏គួរតែជៀសវាង ចំណី ឬផ្លែឈើខ្លះ ដែលមានផ្ទុកនូវសារធាតុប្រតិកម្ម ដូចជាជ័រនៅសម្បកផ្លែស្វាយជាដើម។

ពិនិត្យមើលថ្នាំ ដែលអ្នកត្រូវលេប

បើសិនជាអ្នកតម្រូវឲ្យមានការញ្ញ៊ាំថ្នាំ ដោយសារជម្ងឺអ្វីមួយនោះ អ្នកអាចពិនិត្យមើលថ្នាំនោះ ថាតើវាជាមូលហេតុធ្វើឲ្យអ្នកមានបបូរមាត់ស្ងួត ឬក៏អត់ ព្រោះថាថ្នាំខ្លះអាចមានផលប៉ះពាល់ដោយធ្វើឲ្យបបូរមាត់របស់អ្នកអស់ជាតិទឹកបាន។

សរុបមក អ្នកអាចការពារបបូរមាត់របស់អ្នកកុំឲ្យស្ងួត និងប្រេះបាន ដោយធ្វើតាមវិធីសាស្ត្រខាងលើ ដោយជ្រើសរើសវិធីសាស្ត្រមួយ ដែលត្រូវសម្រាប់អ្នក ហើយអ្នកគួរជៀសវាងនូវទង្វើរមួយចំនួនផងដែរ ដែលអាចបណ្ដាលឲ្យបបូរមាត់របស់អ្នកមានភាពស្ងួតខ្លាំង។ ហើយបើសិនបបូរមាត់របស់អ្នកមានសភាពស្ងួត និងប្រេះខ្លាំងពេកនោះ អ្នកគួរតែទៅជួបពិគ្រោះជាមួយនឹងវេជ្ជបណ្ឌិតអំពីបញ្ហានេះ។

អានបន្ត

Like 4242

ផលប៉ះពាល់ដល់សុខភាពយ៉ាងធ្ងន់ធ្ងរ ដែលបណ្តាលមកពីការស្លៀកពាក់រឹប ឬចង្អៀតពេក

សង្គម, សំលៀកបំពាក់, សុខភាព

26/12/2016

មនុស្សភាគច្រើនតែងចូលចិត្ត និងជ្រើសរើសការស្លៀកពាក់ប្រចាំថ្ងៃរបស់ពួកគេ ទៅតាមការពេញនិយមរបស់ម៉ូដសំលៀកបំពាក់ ហើយការពេញនិយមនេះទៀតសោធន៍ ក៏តែងតែផ្លាស់ប្តូរជារឿយទៅតាមសម័យកាល មិនឈប់ឈរនោះទេ។ តួរយ៉ាងដូចជានៅក្នុងទសវត្សរ៍ទី 80 និង 90 ប្រជាជនខ្មែរយើងក្នុងជំនាន់នោះនិយមស្លៀកពាក់សំលៀកបំពាក់រលង់ៗ ធំៗ ដូចជាអាវដែលមានដៃធំទូលាយ និងខោខូវប៊ូយធំៗ ជាមួយជើងប៉ាត់ជាដើម។ ខុសប្លែកពីពេលបច្ចុប្បន្ននេះ សំលៀកបំពាក់ទាំងអស់នោះត្រូវបានហួសសម័យអស់ទៅហើយ ហើយអ្វីដែលកំពុងតែត្រូវបានពេញនិយមនោះ គឺការស្លៀកសំលាកបំពាក់ ដែលរឹប ឬការស្លៀកពាក់បញ្ចេញរាង។

វាជាការពិតណាស់ ដែលថាការស្លៀកពាក់បែបរឹបរាង ឬបញ្ចេញរាងនេះ មើលទៅស្អាតសម្រាប់មនុស្សមួយចំនួន ផ្ទុយទៅវិញ តើអ្នកទាំងអស់គ្នាធ្លាប់បានដឹងដែរឬទេថា ការមានទម្លាប់ស្លៀកពាក់បែបនេះជាប្រចាំ អាចធ្វើឲ្យមានផលអាក្រក់មកដល់សុខភាពអ្នកទៅវិញនោះទេ។ ខាងក្រោមនេះគឺជាផលអវិជ្ជមានដល់សុខភាពមួយចំនួន ដែលបណ្តាលមកពីការស្លៀកពាក់រឹប ឬចង្អៀតពេក៖

ការឈឺឆ្អឹងខ្នង និងចង្កេះ

នៅពេលបច្ចុប្បន្ន ម៉ូដខោខូវប៊ូយរឹបរាង ឬ skinny jeans មានភាពពេញនិយមជាខ្លាំង មិនថាសម្រាប់នារីៗ ឬបុរសៗនោះទេ ជាពិសេសវាពេញនិយមយ៉ាងខ្លាំងពីសំណាក់យុវវ័យ។ ប៉ុន្តែអ្នកទាំងអស់គ្នាពិតជាស្មានមិនដល់ទេថា ការស្លៀកសំលៀកបំពាក់ទាំងនេះ គឺមិនល្អដល់ឆ្អឹងខ្នង និងចង្កេះរបស់យើងនោះទេ ដោយសារតែខោប្រភេទរឹប ឬគូទខ្លីនេះ អាចធ្វើឲ្យមានការគាបនៅសាច់ដុំខ្នង និងធ្វើឲ្យមានការគាំង ឬខ្ទាស់ជាប់នូវចលនារបស់ឆ្អឹងត្រគាកយើងផងដែរ។ បញ្ហាទាំងអស់នេះ នឹងបង្កជាសំពាធទៅលើឆ្អឹងកង និងខ្នងរបស់យើង ដែលជាហេតុធ្វើឲ្យយើងតែងមានអាការៈឈឺចុកចាប់ខ្លាំង នៅត្រង់ខ្នង និងចង្កេះ។ ដូចនេះ ប្រសិនបើអ្នកចង់កាត់បន្ថយអាការៈឈឺចុកចាប់នៅត្រង់បរិវេណទាំងនេះ អ្នកគួរតែបោះបង់ចោល ការស្លៀកពាក់សំលៀកបំពាក់ប្រភេទរឹបនេះឲ្យបានឆាប់កាន់តែប្រសើរ។

រូបភាពពីគេហទំព័រ health.com

ការឈឺពើត ឬស្ពឹកនៅត្រង់ភ្លៅ

អាការៈឈឺពើត ឬស្ពឹកនៅត្រង់ភ្លៅ គឺជាបញ្ហាដល់ប្រព័ន្ធសរសៃរប្រសាទ ដែលតែងកើតមានឡើងនៅពេលដែលយើងមានទម្លាប់ស្លៀកខោខូវប៊ូយរឹបៗ។ ខោខូវប៊ូយប្រភេទនេះ នឹងធ្វើឲ្យមានជាសំពាធខ្លាំងទៅលើសរសៃប្រសាទ ដែលមាននៅត្រង់ឆ្អឹងត្រគាករបស់យើង ដែលជាហេតុធ្វើឲ្យយើងមានអារម្មណ៍ថាឈឺពើតៗ ឬក៏ពេលខ្លះមានអារម្មណ៍ថារ៉ោយស្ពឹកនៅត្រង់ភ្លៅ។

រូបភាពពីគេហទំព័រ health.com

ការឈឺចុកចាប់នៅត្រង់ពោះ

សម្រាប់សុភាពនារី នៅពេលដែលពួកគេមានទម្លាប់ស្លៀកពាក់ រ៉ូប សំពត់ ឬខោ ដែលមានលក្ខណៈរឹបខ្លាំងនៅត្រង់ពោះ សម្លៀកបំពាក់ប្រភេទនេះ នឹងបង្កឲ្យមានសំពាធខ្លាំងនៅចំណុចពោះ ដែលជាហេតុធ្វើឲ្យមានការឈឺចុកចាប់នៅត្រង់បរិវេណនោះ។ ការស្លៀកពាក់បែបនេះ នឹងធ្វើឲ្យជាតិអាស៊ីតនៅក្នុងក្រពះច្រាលឡើង ដែលជាហេតុធ្វើឲ្យយើងមានអារម្មណ៍ក្តៅឈួលនៅដើមទ្រូង ឬ heartburn។ លើសពីនេះទៀត វាក៏អាចធ្វើឲ្យប៉ះពាល់ដល់ដំណើរការរំលាយអាហាររបស់ក្រពះ និងពោះវៀនយើងផងដែរ។ អញ្ចឹង ប្រសិនបើអ្នកបានដឹងអំពីមូលហេតុទាំងអស់នេះហើយ អ្នកគួរតែផ្លាស់ប្តូរទម្លាប់មិនល្អរបស់អ្នក ដោយជ្រើសរើសយកខោអាវណាដែលមិនចង្អៀត ឬរឹបពេក ឬក៏ប្រើប្រាស់ខ្សែក្រវ៉ាត់ មិនឲ្យតឹងពេកជាដើម។

រូបភាពពីគេហទំព័រ health.com

វាអាចធ្វើឲ្យយើងសន្លប់បាន!

ការមានទម្លាប់ស្លៀកពាក់រឹបៗ ជាប្រចាំ អាចធ្វើឲ្យយើងជួបនូវបញ្ហាថប់ដង្ហើម ដែលជាហេតុអាចបង្កឲ្យយើងពិបាកក្នុងការដកដង្ហើម និងបែកញើសខ្លាំង ហើយលើសពីនេះទៅទៀតវាក៏អាចធ្វើឲ្យយើងវិលមុខ ធីងធោង ឬក៏អាចដល់ថ្នាក់សន្លប់ផងដែរ។

រូបភាពពីគេហទំព័រ health.com

ក្រៅពីបញ្ហាទាំងប៉ុន្មាននៅខាងលើនេះ អ្នកដែលមានទម្លាប់ស្លៀកពាក់រឹប ក៏នឹងជួបប្រទះបញ្ហាសុខភាពមួយចំនួនផ្សេងទៀតផងដែរ ដូចជាបញ្ហាមុនខ្នង ឈឺក្បាល និងស្រវ៉ាងភ្នែកជាដើម។ ដូចនេះ ទោះបីជាភាពទាន់សម័យរបស់សំលៀកបំពាក់សំខាន់យ៉ាងណាក្តី ក៏ប៉ុន្តែអ្នកគួរតែគិតឲ្យច្បាស់ពីផលប៉ះពាល់ដល់សុខភាពជាមុនសិន មុននឹងធ្វើការសម្រេចចិត្តជ្រើសរើស។

អានបន្ត

Like 971

ការចាប់ផ្តើមផ្តល់ថ្នាំចាក់បង្ការជំងឺគ្រុនឈាម ជាលើកដំបូងនៅក្នុងប្រទេសថៃ

សង្គម, សុខភាព

21/12/2016

យោងតាមពត៌មានពីគេហទំព័ររបស់ Bangkokpost បានឲ្យដឹងថា កាលពីម្សិលមិញនេះ មន្ទីរពេទ្យ Samitivej ទើបតែបានបង្ហាញដល់សាធារណៈជននូវប្រភេទវ៉ាក់សាំងបង្ការជំងឺគ្រុនឈាម។ ដោយនៅក្នុងពេលបច្ចុប្បន្ននេះ នៅមិនទាន់មានមន្ទីរពេទ្យណាផ្សេងទៀត នៅទីក្រុងបាំងកកមានវ៉ាកសាំងនេះនៅឡើយទេ ពោលវាគឺជាមន្ទីរពេទ្យដំបូងនៅក្នុងប្រទេសថៃ ដែលមានផ្តល់នូវសេវាចាក់វ៉ាក់សាំងបង្ការជំងឺគ្រុនឈាម។

រូបភាពពីគេហទំព័រ health.com

ការស្វែងរកវ៉ាក់សាំងបង្ការជំងឺគ្រុនឈាមនេះ មិនមែនជារឿងមួយទើបតែកើតមាននោះទេ វាត្រូវបានគេយកមកសិក្សា និងអភិវឌ្ឍអស់រយៈពេលជាងមួយទសវត្សរ៍មកហើយ។ ម៉្យាងវិញទៀត វាក៏ត្រូវបានគេយកមកធ្វើទេស្តសាកល្បងនៅក្នុងប្រទេសចំនួន 10 នៅជុំវិញពិភពលោក រួមទាំងប្រទេសថៃរួចមកហើយដែរ។

វ៉ាក់សាំងនេះត្រូវបានអភិវឌ្ឍន៍ដោយក្រុមហ៊ុនផលិតថ្នាំ Sanofi Pasteur ដែលមានក្រុមហ៊ុនតំណាងនៅក្នុងប្រទេសថៃ មានឈ្មោះថា ក្រុមហ៊ុន Sanofi-Aventis (Thailand) Inc។ បន្ថែមពីនេះ លោក Dr On-umar បានមានប្រសាសន៍ប្រាប់ឲ្យដឹងថា “ថ្នាំវ៉ាក់សាំងនេះបានបង្ហាញប្រសិទ្ធភាព 93% ក្នុងការកាត់បន្ថយភាពធ្ងន់ធ្ងរនៃជំងឺនេះ និងបានកាត់បន្ថយដល់ទៅជាង 80% នៃអត្រាស្ថានភាពចាំបាច់ត្រូវការចូលសំរាកនៅក្នុងមន្ទីពេទ្យ”។ ក្រៅពីនេះលោកក៏បានបន្ថែមផងដែរថា វ៉ាក់សាំងចាក់បង្ការជំងឺគ្រុនឈាមនេះ តម្រូវឲ្យអ្នកប្រើប្រាស់ទទួលការចាក់ចំនួន 3 ដង ក្នុងរយៈពេល 6 ខែ ហើយវាមានប្រសិទ្ធភាពទៅលើក្មេង ដែលមានអាយុ 5 ឬ 6 ឆ្នាំ និងប្រសិទ្ធភាពល្អបំផុតទៅលើអ្នកប្រើប្រាស់ ដែលមានអាយុចាប់ពី 9 ដល់ 45 ឆ្នាំ។ សម្រាប់តម្លៃរបស់វ៉ាក់សាំងទាំង 3 ម្ជុលនេះ គឺមានតម្លៃប្រមាណ 9,600 បាត ដោយមិនទាន់គិតបញ្ចូលជាមួយនឹងថ្លៃសេវាពិគ្រោះជំងឺ និងថ្លៃសេវាផ្សេងៗទៀតនោះទេ។

រូបភាពពីគេហទំព័រ health.com

ដោយលែកនៅក្នុងប្រទេសកម្ពុជាយើងវិញនៅមិនទាន់មានវត្តមានរបស់វ៉ាក់សាំងនេះនៅឡើយទេ ហើយបើតាមយៈសម្តីរបស់មន្ត្រីសុខាភិបាលម្នាក់បានឲ្យដឹងថា វ៉ាក់សាំងប្រភេទនេះ តម្រូវឲ្យមានការត្រួតពិនិត្យ និងយល់ព្រមដោយអង្គការសុខភាពពិភពលោកជាមុនសិន មុននឹងអាចផ្តល់ជាអាជ្ញាប័ណ្ណឲ្យមានការផលិត និងដាក់បង្ហាញឲ្យប្រើប្រាស់ក្នុងស្រុក។

អានបន្ត

1 2800

មូលហេតុបង្កឲ្យរថយន្តឆាបឆេះ និងវិធីបង្ការ

យានយន្ត, សង្គម

20/12/2016

បញ្ហាភ្លើងឆេះ ឬអគ្គីភ័យ គឺជាបញ្ហាមួយដ៏ធំ ដោយនៅពេលដែលវាកើតឡើង វាតែងបង្កឲ្យមានការខូចខាតយ៉ាងច្រើន ទាំងទ្រព្យសម្បត្តិ និងអាយុជីវិត។ ប្រសិនបើយើងមិនមានការប្រុងប្រយ័ត្ននោះទេ វាអាចកើតមានឡើងគ្រប់ពេល និងគ្រប់ទីកន្លែង មិនថាទោះជានៅផ្ទះ ឬក៏នៅក្នុងរថយន្តក៏ដោយ។

បើយើងប្រៀបធៀបរថយន្ត ទៅនឹងផ្ទះ យើងអាចនិយាយបានថារថយន្តងាយនឹងទទួលរងការឆាបឆេះ ជាងផ្ទះទៅទៀត នោះគឺដោយសារតែនៅក្នុងរថយន្តសំបូរទៅដោយខ្សែរភ្លើង ដែលមានចរន្ត និងគ្រឿងដែលផ្ទុកទៅដោយប្រេង និងសាំង ម៉្លោះហើយ មានពេលខ្លះទោះបីជាគ្រឿងតូចតាចនៅក្នុងរថយន្ត ដូចជាអំពូលជាដើម ក៏អាចបង្កឲ្យមានភ្លើងឆាបឆេះផងដែរ។ សម្រាប់ខាងក្រោមនេះគឺជាមូលហេតុ ដែលអាចបង្កឲ្យមានភ្លើងឆាបឆេះរថយន្ត៖

ការប៉ះទង្គិចធ្ងន់ធ្ងរ

ការប៉ះទង្គិចគ្នាធ្ងន់ធ្ងរនៅក្នុងករណីគ្រោះថ្នាក់ចរាចរណ៍ គឺជាមូលហេតុមួយដែលតែងតែបណ្តាលឲ្យមានការឆេះ ឬផ្ទុះរថយន្ត។ ទាំងអស់នេះ គឺដោយសារតែនៅពេលរថយន្តទទួលសំពាធខ្លាំងក្លាពីការប៉ះទង្គិចគ្នា វាអាចនឹងធ្វើឲ្យមានការលេចធ្លាយធុងសាំង ឬក៏ដាច់ខ្សែរភ្លើង ដែលវាអាចបង្កឲ្យមានជាអគ្គីភ័យតែម្តង។

រូបភាពពីគេហទំព័រ edmunds.com

ការលេចប្រេង ឬបញ្ហាឆ្លងចរន្តភ្លើង

អគ្គីភ័យនឹងកើតមានឡើង នៅពេលដែលយើងយកប្រេង ឬសាំង មកបូកជាមួយនឹងផ្កាភ្លើង ឬចរន្តភ្លើង។ បញ្ហាលេចធ្លាយប្រេង ឬបញ្ហាឆ្លងចរន្តភ្លើង គឺជារឿងមួយដែលតែងកើតមានជាញ៉ឹកញ៉យទៅលើរថយន្ត ដោយបញ្ហាទាំងនេះអាចកើតមានឡើងដោយសារអាយុការរបស់រថយន្ត ការមិនបានថែរក្សាររថយន្តឲ្យត្រឹមត្រូវ ការកែច្នៃរថយន្តឲ្យខុសពីស្តង់ដា ឬក៏បណ្តាលមកពីបញ្ហាខុសបច្ចេកទេសផ្សេងទៀតជាដើម។ មានករណីមួយចំនួនធំនៃការឆេះរថយន្ត សុទ្ធតែបណ្តាលមកពីការលេចប្រេង និងបញ្ហាឆ្លងចរន្តភ្លើងនេះតែម្តង។

រូបភាពពីគេហទំព័រ edmunds.com

រូបភាពពីគេហទំព័រ edmunds.com

ការកើនកំដៅហួសហេតុរបស់សម្បកស៊ីម៉ាំង Catalytic Converters

រាល់ពេលដែលរថយន្តចាប់ផ្តើមដំណើរការ ប្រព័ន្ធស៊ីម៉ាំងរបស់រថយន្តក៏ចាប់ផ្តើមបង្កើនកំដៅ ក្តៅទៅៗដូចគ្នា។ នៅពេលដែលរថយន្តរបស់អ្នកមានអាយុកាលចាស់ពេក ឬក៏ធ្លាប់ត្រូវបានកែច្នៃខុសបច្ចេកទេស នៅត្រង់ចំណុចមួយចំនួនដូចជាបាតក្រោមរថយន្ត និងកាងអាចត្រូវបានរលាយ និងឆាបឆេះដោយសារកំដៅសម្បកស៊ីម៉ាំង Catalytic Converters នេះ ដែលវាអាចបង្កជាគ្រោះអគ្គីភ័យដល់រថយន្តរបស់អ្នកផងដែរ។

រូបភាពពីគេហទំព័រ edmunds.com

ការកើនឡើងហួសកម្រឹតនៃកំដៅរថយន្ត

តើអ្នកធ្លាប់ដែលចាប់អារម្មណ៍ទៅលើនាឡិការកំដៅរថយន្តដែរឬទេ? នៅពេលដែលម៉ាស៊ីនរថយន្តមានកំដៅខ្លាំងហួសកម្រឹតនោះ វាអាចធ្វើឲ្យសារធាតុរាវមួយចំនួននៅក្នុងរថយន្ត ដូចជាទឹករក្សារកំដៅរថយន្ត ចាប់ផ្តើមពុះក្តៅខ្លាំង ហើយលេចចេញមកក្រៅ។ ម៉្យាងទៀត ប្រសិនបើសារធាតុរាវទាំងនោះ ទៅប៉ះនឹងផ្នែកផ្សេងៗរបស់រថយន្ត វាអាចនឹងធ្វើឲ្យមានការឆាបឆេះបាន។

រូបភាពពីគេហទំព័រ edmunds.com

ការជក់បារីនៅក្នុងរថយន្ត

បើតាមស្តាប់ទៅ វាដូចជាមិនសូវជាគ្រោះថ្នាក់ប៉ុន្មានទេមែនទេ? ប៉ុន្តែប្រសិនបើអ្នកបានទុកចោលកន្ទុយបារី ដែលកំពុងឆេះនៅលើពូក ឬនៅលើព្រុំរថយន្ត ដោយមិនដឹងខ្លួន តើអ្នកអាចប្រាប់បានទេថានឹងមានរឿងអ្វីកើតឡើងបន្ទាប់?

រូបភាពពីគេហទំព័រ edmunds.com

វិធីបង្ការមិនឲ្យរថយន្តឆាបឆេះ

ភាគច្រើននៃករណីភ្លើងឆេះរថយន្ត អាចត្រូវបានទប់ស្កាត់បាន ប្រសិនម្ចាស់រថយន្តគ្រប់រូបយកចិត្តទុកដាក់ក្នុងការត្រួតពិនិត្យឲ្យបានត្រឹមត្រូវ និងទៀងទាត់។ ប៉ុន្តែមិនមែនម្ចាស់រថយន្តគ្រប់រូប សុទ្ធតែមានពេលវេលា និងប្រាក់ច្រើនសម្រាប់ការត្រួតពិនិត្យឲ្យបានញ៉ឺកញាប់នោះទេ ដែលជាហេតុធ្វើឲ្យយើងអាចទុកវាចោល រហូតមានពេលខ្លះយើងអាចភ្លេចថាយើងត្រូវត្រួតពិនិត្យអ្វីខ្លះទៀតផង។

ដូចនេះ វិធីសាស្ត្រដ៏ល្អបំផុត គឺការត្រួតពិនិត្យរថយន្ត នៅរាល់ពេលផ្លាស់ប្តូរប្រេងម៉ាស៊ីន ដោយភាគច្រើននៃរថយន្ត សុទ្ធតែមានកាលវិភាគថែរក្សារ និងត្រួតពិនិត្យ រថយន្តយ៉ាងត្រឹមត្រូវពីអ្នកជំនាញរបស់ក្រុមហ៊ុន។ ការត្រួតពិនិត្យទៅតាមកាលវិភាគឲ្យបានទៀងទាត់ អាចជួយកាត់បន្ថយហានិភ័យទៅនឹងបញ្ហាអគ្គីភ័យ និងបញ្ហាម៉ាស៊ីរថយន្ត មួយចំនួនទៀតយ៉ាងមានប្រសិទ្ធភាព។ ក្រៅពីនេះ អ្វីដែលសំខាន់នោះ គឺយើងទាំងអស់គ្នាគួរតែយកចិត្តទុកដាក់ទៅលើនាឡីការស្ទុងកំដៅរថយន្ត ប្រសិនបើនាឡិការនេះបង្ហាញថារថយន្តរបស់អ្នកកំពុងតែក្តៅខ្លាំងពេកនោះ អ្នកមិនគួរបង្ខំបើកបរវាតទៅទៀតនោះទេ អ្នកគួរតែឈប់សម្រាកបន្តិច ដើម្បីឲ្យកំដៅរបស់ម៉ាស៊ីនថយចុះមកធម្មតាវិញ។ ហើយបើសិនជាអ្នកធ្វើដំណើរផ្លូវឆ្ងាយ អ្នកគួរតែឆែកមើលរថយន្តរបស់អ្នកឲ្យបានម៉ត់ចត់ មុននឹងចេញដំណើរ អ្នកអាចស្វែងយល់ថាតើអ្នកគួឆែកមើលអ្វីខ្លះមុននឹងចេញដំណើរផ្លូវឆ្ងាយបានក្នុងអត្ថបទមួយទៀតដោយចុច ទីនេះ៕

អានបន្ត

Like 1877

ចំណុចមួយចំនួនដែលអ្នកគួរពិនិត្យ មុនពេលបើកបរផ្លូវឆ្ងាយ

យានយន្ត, សង្គម

15/12/2016

ការបើកបររថយន្តទៅកន្លែងធ្វើការ ឬការបើកបរនៅក្នុងក្រុងក្នុងរយៈចម្ងាយជិត គឺជារឿងមួយសាមញ្ញ និងជាសកម្មភាពប្រចាំថ្ងៃមួយរបស់អ្នកដែលមានរថយន្ត។ ដោយលែកសម្រាប់ការបើកបរក្នុងរយៈចម្ងាយឆ្ងាយ ឬទៅតំបន់ដាច់ស្រយ៉ាល ទាមទារឲ្យយើងមានការយកចិត្តទុកដាក់ទៅលើរថយន្តជាងការបើកបរប្រចាំថ្ងៃ ព្រោះយើងអាចនឹងជួបប្រទះនូវបញ្ហាមួយចំនួន ប្រសិនបើយើងមិនបានរៀបចំត្រួតពិនិត្យវាឲ្យបានត្រឹមត្រូវជាមុននោះទេ។ ដូចនេះដើម្បីសម្រួលឲ្យការធ្វើដំណើររបស់យើងមានភាពរលូន និងទប់ស្កាត់មិនឲ្យជួបប្រទះនូវបញ្ហាដោយសារកត្តាយានយន្ត យើងគួរតែធ្វើការត្រួតពិនិត្យចំណុចមួយចំនួនមុននឹងចាប់ផ្តើមចេញដំណើរ៖

កង់រថយន្ត

គ្រោះថ្នាក់ចរាចរណ៍ ដែលកើតចេញពីកត្តាយាន្តយន្ត ភាគច្រើនបង្កឡើងពីការបែកកង់រថយន្ត។ដោយសារតែកង់រថយន្ត គឺជាចំណុចមួយដែលទទួលរងកាកកិតខ្លាំងនៅពេលបើកបរ ដូចនេះយើងទាំងអស់គ្នាចាំបាច់ត្រូវតែធ្វើការត្រួតពិនិត្យវាឲ្យបានល្អិតល្អន់ មុនពេលចេញដំណើរ។ សម្រាប់ដំណើរផ្លូវឆ្ងាយ យើងគួរតែប្រើប្រាស់នូវសម្បកកង់រថយន្តដែលមានក្រឡាកង់ល្អ មិនសឹកពេក និងមិនចាស់ពេកនោះទេ ហើយសម្ពាធខ្យល់របស់វាក៏គួរតែស្ថិតនៅក្នុងកម្រិតមួយសមរម្យ ដែលអាចឲ្យយើងងាយស្រួលបញ្ជាផងដែរ។ ក្រៅពីនេះ ប្រសិនជាអាច អ្នកគួរតែមានកង់សាគួរមួយនៅក្នុងរថយន្ត គឺរឹតតែប្រសើរ។

រូបភាពពីគេហទំព័រ edmunds.com

ប្រេងម៉ាស៊ីនរថយន្ត និងប្រេងហ្វ្រាំង

ម៉ាស៊ីនរថយន្តនឹងក្លាយជាក្តៅហួសកម្រិត ប្រសិនបើមិនមានប្រេងម៉ាស៊ីនគ្រប់គ្រាន់នោះទេ ហើយអ្វីដែលកាន់តែអាក្រក់ដែលនឹងអាចកើតមានឡើងនោះ គ្រឿងម៉ាស៊ីនរថយន្តនឹងទង្គិចគ្នា ដែលជាហេតុធ្វើឲ្យវារងការខូចខាតយ៉ាងខ្លាំង។ យើងអាចធ្វើការត្រួតពិនិត្យមើលកម្រិតប្រេងម៉ាស៊ីនបាននៅពេលដែលម៉ាស៊ីនរថយន្តត្រជាក់ (គួរជៀសវាងនៅពេលដែលម៉ាស៊ីនមានកំដៅក្តៅខ្លាំង) ជាមួយនឹងម៉ែត្រវាស់ប្រេងម៉ាស៊ីនដែលមានភ្ជាប់នៅនឹងធុងប្រេង។ យើងគួរធ្វើការផ្លាស់ប្តូរប្រេងម៉ាស៊ីនឲ្យបានទៀងទាត់ ជាមួយនឹងបរិមាណត្រឹមត្រូវ មិនឲ្យខ្វះ ឬហៀរពេកនោះទេ។ នៅពេលដែលអ្នកពិនិត្យឃើញថាប្រេងម៉ាស៊ីនរបស់អ្នកប្រែជារាងខ្មៅហើយ នោះមានន័យថាជិតដល់ពេលត្រូវផ្លាស់ប្តូរវាហើយ។
ចំណែកឯប្រេងហ្វ្រាំងក៏អញ្ចឹងដែរ អ្នកមិនគួរទុកឲ្យវាស្ថិតនៅក្រោមចំណុចក្រឹតតិចបំផុតនោះទេ ហើយពណ៌របស់វាក៏មិនគួរខ្មៅខ្លាំងពេកដែរ។

រូបភាពពីគេហទំព័រ edmunds.com

ធុងទឹកកំដៅរថយន្ត និងសាប៊ូផ្លឹតទឹក

ធុងទឹកកំដៅរថយន្តមានផ្ទុកទៅដោយសារធាតុរ៉ាវម៉្យាង ដែលគេហៅថា Coolant វាមានតួនាទីក្នុងការរក្សាកំដៅរថយន្តរបស់យើងមិនឲ្យក្តៅពេក ឬត្រជាក់ពេក។ មិនចាំបាច់ទាល់តែចេញភ្លើងសញ្ញាធុងទឹកមកទើបអ្នកអាចផ្លាស់ប្តូរវានោះទេ ជាធម្មតាសារធាតុរ៉ាវនៅក្នុងធុងទឹកនេះ គឺមានពណ៌ខៀវ ឬបៃតង អ្នកអាចដឹងពីពេលវេលាដែលត្រូវផ្លាស់ប្តូរទឹក Coolant នេះ នៅពេលដែលវាប្រែទៅជាល្អក់ ឬខាប់ខ្លាំង។ សម្រាប់សាប៊ូផ្លឹតទឹកវិញ យើងក៏ចាំបាច់ត្រូវតែពិនិត្យវាដែរ ព្រោះថាទឹកសាប៊ូប្រភេទនេះជួយឲ្យសំអាតកញ្ចក់រថយន្តរបស់យើងមិនស្រអាប់នៅពេលដែលយើងប្រើប្រាស់ផ្លឹតទឹក។

រូបភាពពីគេហទំព័រ edmunds.com

អាគុយរថយន្ត

ប្រសិនបើអ្នកចាប់អារម្មណ៍ថាអាគុយរថយន្តរបស់អ្នកចាប់ផ្តើមខ្សោយ ឬពិបាកក្នុងការបញ្ឆេះហើយ អ្នកគួរតែធ្វើពិនិត្យ និងផ្លាស់ប្តូរអាគុយថ្មី មុននឹងចាប់ផ្តើមធ្វើការបើកបរទៅផ្លូវឆ្ងាយ ដើម្បីជៀសវាងជួបប្រទះនូវបញ្ហាបញ្ឆេះរថយន្តមិនដំណើរការនៅកណ្ដាលផ្លូវដាច់ស្រយ៉ាល់។

រូបភាពពីគេហទំព័រ edmunds.com

ប្រព័ន្ធហ្វ្រាំង និងស្បែកហ្វ្រាំង

អ្នកគួរតែផ្លាស់ប្តូរស្បែកហ្វ្រាំងរថយន្តថ្មី នៅពេលដែលអ្នកចាប់ផ្តើមឮសម្លេងកកិតចេញពីហ្វ្រាំងរថយន្តរបស់អ្នក។ ការត្រួតពិិនិត្យស្បែកហ្វ្រាំងរថយន្តឲ្យបានត្រឹមត្រូវ និងទៀងទាត់ មិនត្រឹមតែអាចជួយឲ្យអ្នកជៀសផុតពីការខូចខាតផ្នែកហ្វ្រាំងរថយន្តតែប៉ុណ្ណោះទេ អ្វីដែលសំខាន់នោះគឺវាអាចជួយឲ្យអ្នកជៀសផុតពីគ្រោះថ្នាក់ដែលបណ្តាលមកពីបញ្ហាហ្វ្រាំងចាប់មិនជាប់ផងដែរ។

រូបភាពពីគេហទំព័រ edmunds.com

ម៉ាស៊ីនត្រជាក់

ពិតណាស់សម្រាប់តំបន់ដែលក្តៅដូចជាប្រទេសយើងនេះ ម៉ាស៊ីនត្រជាក់គឺជាមុខងារមួយដ៏ចាំបាច់មិនអាចខ្វះបាននោះទេ។ អ្នកគួរតែចាប់អារម្មណ៍នៅពេលដែលម៉ាស៊ីនត្រជាក់របស់អ្នក ចាប់ផ្តើមប្រែជាមិនសូវត្រជាក់ ដូចនេះការត្រួតពិនិត្យប្រព័ន្ធម៉ាស៊ីនត្រជាក់ និងការបញ្ចូលហ្គាសម៉ាស៊ីនត្រជាក់បន្ថែមគឺជារឿងមួយចាំបាច់ ប្រសិនបើអ្នកមិនចង់ជួបប្រទះបញ្ហាបែកញើសនៅពេលធ្វើដំណើរផ្លូវឆ្ងាយនោះទេ។

រូបភាពពីគេហទំព័រ edmunds.com

ប្រព័ន្ធភ្លើងរថយន្ត

អ្នកត្រូវត្រួតពិនិត្យរាល់ប្រព័ន្ធភ្លើងរថយន្តរបស់អ្នក ដើម្បីឲ្យច្បាស់ថាមុខងារទាំងអស់របស់វាដំណើរការបានត្រឹមត្រូវ ដូចជាចង្កៀងបំភ្លឺផ្លូវ ភ្លើងស៊ីញ៉ូបត់ ភ្លើងដឺមី ភ្លើងសុំផ្លូវ និងភ្លើងស្តុបខាងក្រោយជាដើម។ បន្ទាប់ពីបានឆែកប្រព័ន្ធភ្លើងបំភ្លឺផ្លូវរួចរាល់ហើយ អ្នកក៏គួរពិនិត្យឲ្យច្បាស់ផងដែរ ថារាល់មុខងារអេឡិចត្រូនិចផ្សេងៗទៀតក៏ដំណើរការបានត្រឹមត្រូវដូចគ្នា ដូចជាកូនសោរស្មាត្រឃី ប៊ូតុងបញ្ជាកញ្ចក់ ស៊ីភ្លេរថយន្ត ផ្លឹតទឹក -ល-។

រូបភាពពីគេហទំព័រ edmunds.com

អានបន្ត

Like 2548

ទម្លាប់គេងចំលែកៗ របស់មហាសេដ្ឋី និងបុគ្គលល្បីៗមួយចំនួននៅជុំវិញពិភពលោក

សង្គម, សុខភាព

13/12/2016

ការគេងគឺជាពេលវេលាមួយដ៏ចាំបាច់ ដែលអាចនាំឲ្យអ្នកទទួលបានភាពជោគជ័យ ទាំងអ្នកធ្វើការ និងអ្នកប្រកបមុខរបរតែងត្រូវការពេលវេលានេះយ៉ាងខ្លាំង មិនថាទោះតិច ឬច្រើននោះទេ។ ផលប្រយោជន៍ ដែលទទួលបានពីការគេងលក់ស្កប់ស្កល់ ត្រូវបានបង្ហាញឲ្យឃើញកាន់តែច្បាស់នៅពេលដែលអ្នកស្រាវជ្រាវបានកំពុងតែសិក្សាទៅលើគោលបំណងនៃទម្លាប់គេងផ្សេងៗគ្នារបស់មនុស្សម្នាក់ៗ ពួកគេបានរកឃើញថា លទ្ធផលនៃការងារប្រចាំថ្ងៃរបស់មនុស្សភាគច្រើន ត្រូវបានធ្លាក់ចុះប្រសិនបើពួកគេមិនបានគេងឲ្យគ្រប់គ្រាន់ទៅតាមអ្វីដែលពួកគេចង់បាននោះ។ ក្រៅពីនេះពួកគេក៏បានរកឃើញផងដែរថា ការមានទម្លាប់គេងបានលក់ស្កប់ស្កល់ ទោះបីជាមានរយៈពេលតិចម៉ោងក្តី ក៏វាមានប្រយោជន៍ដល់ខួរក្បាល និងសុខភាពរបស់យើងជាងការគេងច្រើនម៉ោងតែមិនបានលក់ស្កប់ស្កល់ដែរ។

ខាងក្រោមនេះ គឺជាទម្លាប់ប្រចាំថ្ងៃនៃការគេងរបស់បុគ្គលល្បីៗមួយចំនួនលើពិភពលោក។ វាដូចទៅនឹងអ្វីដែលយើងនឹងឃើញខាងក្រោមនេះអញ្ចឹង ទម្លាប់នៃការគេងរបស់ពួកគេទាំងអស់នោះសុទ្ធតែមិនដូចគ្នានោះទេ ហើយក៏មានអ្នកខ្លះទៀតមានទម្លាប់គេងចំលែកខ្លាំងពីអ្នកផ្សេងផងដែរ។ សំខាន់បំផុត ឲ្យតែអ្នកមានអារម្មណ៍ថាស្រស់ស្រាយ និងមានគំណិតភ្លឺថ្លា ទោះអ្នកចង់មានទម្លាប់គេងយូរ ឬតិចម៉ោង ឬចង់មានទម្លាប់គេងច្រើនដងក្នុងមួយថ្ងៃក៏ដោយ គឺស្រេចតែនៅលើអ្នកនោះទេ។