កាលពី 5ទៅ 6 ឆ្នាំមុន នៅពេលដែលខ្ញុំទើបតែរៀនចេះផឹកកាហ្វេបរទេសដំបូង ខ្ញុំតែងតែងឿនឆ្ងល់យ៉ាងខ្លាំងថា ហេតុអ្វីបានជាកាហ្វេបរទេសទាំងនោះមានច្រើនប្រភេទម៉្លេះ ដូចជា Espresso Americano Cappuccino Latte Mocha និង Macchiato ជាដើម ហើយនៅមានមួយចំនួនទៀតដែលខ្ញុំនៅមិនទាន់បានសាកល្បងនៅឡើយ។ ( នៅពេលដែលខ្ញុំធ្វើការកម៉្មងកាហ្វេម្តងៗ ខ្ញុំមានអារម្មណ៍ស្មុគស្មាញណាស់ ដោយសារមិនដឹងថាគួរជ្រើសរើសយកមួយណាល្អ ឬមួយណាឆ្ងាញ់)។
អញ្ចឹង!! ប្រិយមិត្តទាំងអស់គ្នាអាចដឹងទេថា តើកាហ្វេបរទេស ទាំងប៉ុន្មានប្រភេទខាងលើនេះ មានភាពខុសគ្នា និងស្រដៀងគ្នាយ៉ាងដូចម្តេចខ្លះ? ហើយអ្វីខ្លះដែលជាលក្ខណៈពិសេសរបស់ប្រភេទកាហ្វេនីមួយៗ?
Espresso
Espresso គឺជាប្រភេទភេសជ្ជៈជាលក្ខណៈកាហ្វេខ្មៅ ដែលមានដើមកំណើតពីប្រទេសអ៊ីតាលី។ វាគឺជាប្រភេទកាហ្វេខ្មៅខាប់ មានពពុះច្រើន ដែលត្រូវបានគេឆុង និងទទួលទៀន ជាលក្ខណៈកូនពែង ឬជាកូនកែវតូចៗ ជាភាសាអង់គ្លេសហៅថា Shot។ លក្ខណៈពិសេសរបស់វាគឺនៅត្រង់វិធីសាស្ត្រនៃការឆុង និងទទួលទាន ជាមួយនឹងកូនកែវ shot ដែលមានចំណុះ 1 ទៅ 2 oz ( ឬ 29.5 ម.ល ទៅ 59.1 ម.ល) ដែលឆុងចេញមកពីគ្រាប់កាហ្វេល្អចំនួន 6 ក្រាមកន្លះ ទៅ 7 ក្រាមកន្លះ ឬមួយស្លាព្រាបាយ។ រយៈពេលនៃការឆុងគឺ 25 ទៅ 30 វិនាទី។
Americano
Americano គឺជាប្រភេទភេសជ្ជៈកាហ្វេខ្មៅ ដែលផ្សំចេញពី Espresso គោលបំណងនៃការបង្កើតវាឡើង គឺដើម្បីឲ្យវាមានលក្ខណៈស្រដៀង និងអាចជំនួសកាហ្វេប្រើតម្រង់បាន ដែលកាហ្វេប្រភេទនេះមានភាពពេញនិយមយ៉ាងខ្លាំង នៅក្នុងសហរដ្ឋអាមេរិក។ លក្ខណៈពិសេសរបស់វាគឺនៅត្រង់វិធីសាស្ត្រនៃការឆុង និងទទួលទាន ជាមួយកែវដែលមានទំហំធំល្មម ដោយមានការផ្សំរវាង Espresso 1 ទៅ 2 shot លាយនឹងទឹកក្តៅ។
Cappuccino
Cappuccino គឺជាប្រភេទភេសជ្ជៈកាហ្វេ ដែលមានដើមកំណើតពីប្រទេសអ៊ីតាលីដូចគ្នា។ វាគឺជាប្រភេទកាហ្វេទឹកដោះគោ ដែលមានពណ៌ត្នោតខ្ចី ដោយមានគ្រឿងផ្សំ 1/3 ពី Espresso 1/3 ពីចំហាយទឹកដោះគោក្តៅ 1/3 ពីហ្វូមទឹកដោះគោ។
Latte
ពាក្រថា Latte ក្នុងភាសារបារាំងគឺ កាហ្វេទឹកដោះគោ និងក្នុងភាសារអ៊ីតាលីគឺ ទឹកដោះគោ។ វាមានគ្រឿងផ្សំដូចទៅនឹងប្រភេទកាហ្វេ Cappuccino ដែលគឺ Espresso ចំហាយទឹកដោះគោក្តៅ និងហ្វូមទឹកដោះគោ តែខុសគ្នាត្រង់ កាហ្វេ Latte ប្រើប្រាស់ចំហាយទឹកដោះគោក្តៅ ច្រើនជាងហ្វូមទឹកដោះគោ។
Mocha
Mocha គឺជាប្រភេទភេសជ្ជៈកាហ្វេទឹកដោះគោ ជាមួយនឹងទឹកស៊ីរូសុកូឡា ដែលមានប្រភពដើម ពីសហរដ្ឋអាមេរិក។ គ្រឿងផ្សំរបស់វាមានដូចជា 2/5 ពី Espresso 2/5 ពីសូកូឡា និង 1/5 ពីចំហាយទឹកដោះគោក្តៅ សំរាប់គ្រីមទឹកដោះគោ យើងអាចបន្ថែមវាពីលើ ទៅតាមចំណង់ចំណូលចិត្តរៀងៗខ្លួន។
Macchiato
នៅលើទីផ្សារបច្ចុប្បន្ន មានភេសជ្ជៈកាហ្វេ Macchiato ជាច្រើនប្រភេទ ត្រូវបានដាក់លក់ ក្នុងនោះមានដូចជាប្រភេទ Caramel Macchiato និង Latte Macchiato ជាដើម ប៉ុន្តែកាហ្វេ Macchiato ដែលមានប្រភពដើមពីប្រទេសអ៊ីតាលី គឺជាប្រភេទកាហ្វេមួយកែវតូច ដែលមានគ្រឿងផ្សំតែពីរនោះទេ គឺ កាហ្វេខ្មៅ Espresso មួយ shot ជាមួយនឹងហ្វូមទឹកដោះគោបន្តិចបន្តួច នៅខាងលើ។