fashion | KhmerLife.style

Hair Coach ក្រាសសិតសក់ឆ្លាត ដែលអាចប្រាប់ពីសុខភាពស្បែកក្បាលរបស់អ្នកបាន

05/01/2017

ក្រុមហ៊ុន Withings ដែលគ្រប់គ្រងដោយ Nokia និងក្រុមហ៊ុន L’Oreal បានចូលរួមសហការគ្នាបង្កើតជាក្រាសសិតសក់ឆ្លាតនេះឡើង ដែលមានឈ្មោះថា Hair Coach ដែលអាចភ្ជាប់តាម ប៊្លូធូស ឬ WiFi បាន ហើយក្រាសនេះ និងអាចផ្ដល់ទិន្នន័យដល់អ្នក ពីទម្លាប់នៃការសិតសក់របស់អ្នក ដោយប្រើនូវសិនស័រមួយចំនួន ហើយជាមួយនឹងទន្នន័យទាំងនោះ អ្នកអាចធ្វើឲ្យប្រសើរឡើងនូវសុខភាពស្បែកក្បាល និងសក់របស់អ្នកបាន។

ក្រាស Hair Coach នេះមានភ្ជាប់មកជាមួយនឹងសិនស័រជាច្រើន ដូចជា មីក្រូហ្វូន សម្រាប់ស្ដាប់សម្លេងនៃលំនាំការសិតសក់របស់អ្នក, accelerometer និង gyroscope សម្រាប់វិភាគពីល្បឿនទម្ងន់ និងលំនាំនៃការសិតសក់របស់អ្នក, load cells ឬក៏អាចហៅបានថា transducers សម្រាប់វាស់ពីកម្លាំងសង្កត់របស់ក្រាសទៅលើសក់ ហើយចុងក្រោយបង្អស់គឺ conductivity sensors (សិនស័រចាប់ចរន្ត) សម្រាប់វិភាគថាតើអ្នកសិតសក់សើម ឬសក់ស្ងួត។ ហើយប្រាកដណាស់ សិនស័រទាំងអស់ មានដំណើរការជាមួយគ្នា ដើម្បីធ្វើការវិភាគសុខភាពស្បែកក្បាលរបស់អ្នក ដោយភ្ជាប់ជាមួយនឹង app ក្នុងស្មាត្រហ្វូនរបស់អ្នក។

ដងរបស់ក្រាសនេះ មានទម្ងន់ស្រាល ទោះបីជាវាត្រូវប្រើជាមួយនឹងថ្មពិល AA ចំនួនពីរគ្រាប់ក្ដី ហើយថ្មទាំងពីរកូននេះ អាចឲ្យអ្នកប្រើបានដល់ទៅ 6 ខែឯណោះ ហើយសសៃក្រាសនេះផ្ទាល់ ត្រូវបានធ្វើឡើងមកពី នីឡុង លាយជាមួយនឹងរោមរបស់ជ្រូកព្រៃ។

រូបភាពពីវែបសាយ TheVerge

រីឯ app របស់វាវិញក៏អស្ចារ្យដែរ ដោយវាបង្ហាញពីសភាពសក់ និងសុខភាពស្បែកក្បាលរបស់អ្នក ហើយនិងអាចប្រាប់បានថា សក់អ្នករញ៉េរញ៉ៃ ឬកណ្ដាញ់ ឬក៏អត់ ដោយប្រើប្រាស់សិនស័រវាស់ថាតើអ្នកខំប្រឹងសិតសក់អ្នកខ្លាំងប៉ុនណា។ ហើយបន្ថែមពីនេះ វាក៏មានបង្ហាញពីផលិតផល ដែលអាចជួយដោះស្រាយបញ្ហារបស់សក់អ្នកបានផងដែរ។

ក្រាសនេះ នឹងចេញលក់ក្នុងតម្លៃប្រហែល $200 នៅក្នុងពាក់កណ្ដាលឆ្នាំ 2017 ខាងមុខនេះ។ តម្លៃនេះសម្រាប់ក្រាសសិតសក់មួយពិតជាថ្លៃ បន្តែវាប្រហែលជាអ្វីដែលមនុស្សមួយចំនួនត្រូវការ។

អានបន្ត

Like 4252

ផលប៉ះពាល់ដល់សុខភាពយ៉ាងធ្ងន់ធ្ងរ ដែលបណ្តាលមកពីការស្លៀកពាក់រឹប ឬចង្អៀតពេក

សង្គម, សំលៀកបំពាក់, សុខភាព

26/12/2016

មនុស្សភាគច្រើនតែងចូលចិត្ត និងជ្រើសរើសការស្លៀកពាក់ប្រចាំថ្ងៃរបស់ពួកគេ ទៅតាមការពេញនិយមរបស់ម៉ូដសំលៀកបំពាក់ ហើយការពេញនិយមនេះទៀតសោធន៍ ក៏តែងតែផ្លាស់ប្តូរជារឿយទៅតាមសម័យកាល មិនឈប់ឈរនោះទេ។ តួរយ៉ាងដូចជានៅក្នុងទសវត្សរ៍ទី 80 និង 90 ប្រជាជនខ្មែរយើងក្នុងជំនាន់នោះនិយមស្លៀកពាក់សំលៀកបំពាក់រលង់ៗ ធំៗ ដូចជាអាវដែលមានដៃធំទូលាយ និងខោខូវប៊ូយធំៗ ជាមួយជើងប៉ាត់ជាដើម។ ខុសប្លែកពីពេលបច្ចុប្បន្ននេះ សំលៀកបំពាក់ទាំងអស់នោះត្រូវបានហួសសម័យអស់ទៅហើយ ហើយអ្វីដែលកំពុងតែត្រូវបានពេញនិយមនោះ គឺការស្លៀកសំលាកបំពាក់ ដែលរឹប ឬការស្លៀកពាក់បញ្ចេញរាង។

វាជាការពិតណាស់ ដែលថាការស្លៀកពាក់បែបរឹបរាង ឬបញ្ចេញរាងនេះ មើលទៅស្អាតសម្រាប់មនុស្សមួយចំនួន ផ្ទុយទៅវិញ តើអ្នកទាំងអស់គ្នាធ្លាប់បានដឹងដែរឬទេថា ការមានទម្លាប់ស្លៀកពាក់បែបនេះជាប្រចាំ អាចធ្វើឲ្យមានផលអាក្រក់មកដល់សុខភាពអ្នកទៅវិញនោះទេ។ ខាងក្រោមនេះគឺជាផលអវិជ្ជមានដល់សុខភាពមួយចំនួន ដែលបណ្តាលមកពីការស្លៀកពាក់រឹប ឬចង្អៀតពេក៖

ការឈឺឆ្អឹងខ្នង និងចង្កេះ

នៅពេលបច្ចុប្បន្ន ម៉ូដខោខូវប៊ូយរឹបរាង ឬ skinny jeans មានភាពពេញនិយមជាខ្លាំង មិនថាសម្រាប់នារីៗ ឬបុរសៗនោះទេ ជាពិសេសវាពេញនិយមយ៉ាងខ្លាំងពីសំណាក់យុវវ័យ។ ប៉ុន្តែអ្នកទាំងអស់គ្នាពិតជាស្មានមិនដល់ទេថា ការស្លៀកសំលៀកបំពាក់ទាំងនេះ គឺមិនល្អដល់ឆ្អឹងខ្នង និងចង្កេះរបស់យើងនោះទេ ដោយសារតែខោប្រភេទរឹប ឬគូទខ្លីនេះ អាចធ្វើឲ្យមានការគាបនៅសាច់ដុំខ្នង និងធ្វើឲ្យមានការគាំង ឬខ្ទាស់ជាប់នូវចលនារបស់ឆ្អឹងត្រគាកយើងផងដែរ។ បញ្ហាទាំងអស់នេះ នឹងបង្កជាសំពាធទៅលើឆ្អឹងកង និងខ្នងរបស់យើង ដែលជាហេតុធ្វើឲ្យយើងតែងមានអាការៈឈឺចុកចាប់ខ្លាំង នៅត្រង់ខ្នង និងចង្កេះ។ ដូចនេះ ប្រសិនបើអ្នកចង់កាត់បន្ថយអាការៈឈឺចុកចាប់នៅត្រង់បរិវេណទាំងនេះ អ្នកគួរតែបោះបង់ចោល ការស្លៀកពាក់សំលៀកបំពាក់ប្រភេទរឹបនេះឲ្យបានឆាប់កាន់តែប្រសើរ។

រូបភាពពីគេហទំព័រ health.com

ការឈឺពើត ឬស្ពឹកនៅត្រង់ភ្លៅ

អាការៈឈឺពើត ឬស្ពឹកនៅត្រង់ភ្លៅ គឺជាបញ្ហាដល់ប្រព័ន្ធសរសៃរប្រសាទ ដែលតែងកើតមានឡើងនៅពេលដែលយើងមានទម្លាប់ស្លៀកខោខូវប៊ូយរឹបៗ។ ខោខូវប៊ូយប្រភេទនេះ នឹងធ្វើឲ្យមានជាសំពាធខ្លាំងទៅលើសរសៃប្រសាទ ដែលមាននៅត្រង់ឆ្អឹងត្រគាករបស់យើង ដែលជាហេតុធ្វើឲ្យយើងមានអារម្មណ៍ថាឈឺពើតៗ ឬក៏ពេលខ្លះមានអារម្មណ៍ថារ៉ោយស្ពឹកនៅត្រង់ភ្លៅ។

រូបភាពពីគេហទំព័រ health.com

ការឈឺចុកចាប់នៅត្រង់ពោះ

សម្រាប់សុភាពនារី នៅពេលដែលពួកគេមានទម្លាប់ស្លៀកពាក់ រ៉ូប សំពត់ ឬខោ ដែលមានលក្ខណៈរឹបខ្លាំងនៅត្រង់ពោះ សម្លៀកបំពាក់ប្រភេទនេះ នឹងបង្កឲ្យមានសំពាធខ្លាំងនៅចំណុចពោះ ដែលជាហេតុធ្វើឲ្យមានការឈឺចុកចាប់នៅត្រង់បរិវេណនោះ។ ការស្លៀកពាក់បែបនេះ នឹងធ្វើឲ្យជាតិអាស៊ីតនៅក្នុងក្រពះច្រាលឡើង ដែលជាហេតុធ្វើឲ្យយើងមានអារម្មណ៍ក្តៅឈួលនៅដើមទ្រូង ឬ heartburn។ លើសពីនេះទៀត វាក៏អាចធ្វើឲ្យប៉ះពាល់ដល់ដំណើរការរំលាយអាហាររបស់ក្រពះ និងពោះវៀនយើងផងដែរ។ អញ្ចឹង ប្រសិនបើអ្នកបានដឹងអំពីមូលហេតុទាំងអស់នេះហើយ អ្នកគួរតែផ្លាស់ប្តូរទម្លាប់មិនល្អរបស់អ្នក ដោយជ្រើសរើសយកខោអាវណាដែលមិនចង្អៀត ឬរឹបពេក ឬក៏ប្រើប្រាស់ខ្សែក្រវ៉ាត់ មិនឲ្យតឹងពេកជាដើម។

រូបភាពពីគេហទំព័រ health.com

វាអាចធ្វើឲ្យយើងសន្លប់បាន!

ការមានទម្លាប់ស្លៀកពាក់រឹបៗ ជាប្រចាំ អាចធ្វើឲ្យយើងជួបនូវបញ្ហាថប់ដង្ហើម ដែលជាហេតុអាចបង្កឲ្យយើងពិបាកក្នុងការដកដង្ហើម និងបែកញើសខ្លាំង ហើយលើសពីនេះទៅទៀតវាក៏អាចធ្វើឲ្យយើងវិលមុខ ធីងធោង ឬក៏អាចដល់ថ្នាក់សន្លប់ផងដែរ។

រូបភាពពីគេហទំព័រ health.com

ក្រៅពីបញ្ហាទាំងប៉ុន្មាននៅខាងលើនេះ អ្នកដែលមានទម្លាប់ស្លៀកពាក់រឹប ក៏នឹងជួបប្រទះបញ្ហាសុខភាពមួយចំនួនផ្សេងទៀតផងដែរ ដូចជាបញ្ហាមុនខ្នង ឈឺក្បាល និងស្រវ៉ាងភ្នែកជាដើម។ ដូចនេះ ទោះបីជាភាពទាន់សម័យរបស់សំលៀកបំពាក់សំខាន់យ៉ាងណាក្តី ក៏ប៉ុន្តែអ្នកគួរតែគិតឲ្យច្បាស់ពីផលប៉ះពាល់ដល់សុខភាពជាមុនសិន មុននឹងធ្វើការសម្រេចចិត្តជ្រើសរើស។

អានបន្ត

Like 3222

ពណ៌ហុងស៊ុយមួយចំនួន ដែលអាចនាំសំណាងដល់អ្នករកស៊ី

សង្គម

24/11/2016

ហុងស៊ុយ (Feng Shui) គឺជាជំនឿដ៏ពូកែ និងពេញនិយមមួយ ដែលមនុស្សមួយចំនួនធំជឿជាក់ ជាពិសេស គឺសម្រាប់អ្នកដែលមានខ្សែស្រឡាយជាជនជាតិចិន និងអ្នកដែលមានមុខរបររកស៊ីមួយចំនួន។ តាមជំនឿនេះ ពណ៌ដែលមានហុងស៊ុយ គឺពិតជាមានអំណាច និងប្រសិទ្ធភាពយ៉ាងខ្លាំង ដែលអាចធ្វើឲ្យមុខរបររកស៊ីរបស់យើងដំណើរការទៅមុខបានយ៉ាងរលូន និងរីកចំរើន។ ការរៀបចំ និងការជ្រើសរើសពណ៌ហុងស៊ុយសម្រាប់បរិយាកាស ឬកន្លែង អាចជះឥទ្ធិពលដល់ការប្រកបមុខរបររបស់លោកអ្នកបាន វាអាចជួយឲ្យការគិតរបស់យើងមានភាពរីកចំរើន រឹងមាំ ហើយវាក៏អាចធ្វើឲ្យការគិតរបស់យើងមានភាពសុញ និងស្រអាប់ផងដែរ ប្រសិនបើយើងមិនបានធ្វើការជ្រើសរើសពណ៌ឲ្យបានត្រឹមត្រូវទៅតាមក្បួននោះ។ ដូចនេះនៅក្នុងអត្ថបទនេះ យើងនឹងធ្វើការបង្ហាញជូនដល់ប្រីយមិត្តនូវពណ៌មួយចំនួន ជាមួយនឹងអត្ថន័យរបស់ពួកវា ដែលត្រឹមត្រូវទៅតាមក្បួនហុងស៊ុយ សម្រាប់តុបតែងការិយាល័យ និងទីតាំងប្រកបមុខរបររបស់លោកអ្នក ដើម្បីជួយឲ្យមុខរបររបស់លោកអ្នកមានភាពរីចំរើនទៅមុខ។

ពណ៌ទឹកក្រូច

ពណ៌ទឹកក្រូច គឺជាពណ៌ដ៏ល្អមួយសម្រាប់ក្រុមហ៊ុន។ វា គឺជាពណ៌ជួយបង្កើននូវការផ្តោតអារម្មណ៍ និងគំណិតច្នៃប្រឌិតរបស់យើង។ វាគឺជាប្រភេទពណ៌ដិត និងឆើត បូករួមជាមួយនឹងការបង្កប់ទៅដោយថាមពល និងភាពសប្បាយរីករាយ ភាគច្រើននៃពណ៌នេះ គឺមានជាប់ទាក់ទងទៅនឹងមនុស្សដែលមានគំណិតបើកចំហ សុទិដ្ឋិនិយម និងចំណង់ចំណូលចិត្តក្នុងការផ្សងព្រេង។

រូបភាពពីគេហទំព័រ beliefnet.com

ជាទូទៅគេតែងប្រើពណ៌ទឹកក្រូចនៅក្នុង ភោជនីយដ្ឋាន ហាងកាហ្វេ និងក្រុមហ៊ុនទេសចរណ៍ជាដើម។ ពណ៌នេះក៏ស័កសមផងដែរ សម្រាប់ប្រភេទនៃអាជីវកម្មណា ដែលមានជាប់ទាក់ទងជាមួយនឹងកូនក្មេង ព្រោះក្មេងៗតូចៗភាគច្រើន គឺចូលចិត្តពណ៌ទឹកក្រូច។ ទោះបីជាយ៉ាងដូចនេះក្តីក៏ពណ៌ទឹកក្រូចមិនមែនជាពណ៌មួយដ៏ល្អបំផុតសម្រាប់ការប្រកបអាជីវកម្មនោះទេ មូលហេតុគឺដោយសារប្រសិនបើយើងប្រើតែពណ៌នេះច្រើនហួសហេតុពេក អាចធ្វើឲ្យក្រុមហ៊ុន ឬមុខរបររបស់យើងមើលទៅមិនសូវជាមានតម្លៃ មិនសូវជាមានសុវត្ថភាព និងពោរពេញទៅដោយភាពក្រអើតក្រទមផងដែរ។ យល់ល្អបើអ្នកចូលចិត្ត និងចង់ប្រើពណ៌ទឹកក្រូច អ្នកគួរតែប្រើពណ៌ផ្សេងលាយជាមួយវា ដោយមិនត្រូវប្រើពណ៌ទឹកក្រូចឲ្យលេចខ្លាំងពេកនោះទេ។

ពណ៌ស្វាយ

តាមជំនឿហុងស៊ុយ ពណ៌ស្វាយគឺជាពណ៌ ដែលអាចជួយធ្វើឲ្យមានភាពប្រសើរឡើង ទាំងផ្នែករាងកាយ និងសតិអារម្មណ៍របស់មនុស្ស។ វាគឺជាពណ៌មួយ ដែលមានឥទ្ធិពលធ្វើឲ្យអារម្មណ៍របស់យើងស្ងប់ និងជួយកាត់បន្ថយភាពតានតឹងរបស់យើង ហើយវាក៏តំណាងឲ្យភាពរុងរឿង និងភាពមានបានផងដែរ។

រូបភាពពីគេហទំព័រ beliefnet.com

ដោយសារតែពណ៌ស្វាយ គឺជាពណ៌ដែលបង្ហាញអំពីអំណាច និងភាពឆ្លាតវ័យ ភាគច្រើន ពណ៌នេះត្រូវបានគេប្រើប្រាស់សម្រាប់មុខរបរ ដែលទាក់ទងទៅនឹងស្ត្រី និងកូនក្មេង ប៉ុន្តែសម្រាប់បុរសគឺមិនសូវជាពេញនិយមប៉ុន្មាននោះទេ។ ពណ៌នេះ គឺមានភាពស័កសមបំផុតសម្រាប់អាជីវកម្មមួយចំនួនដូចជាអាជីវកម្មដែលទាក់ទងទៅនឹង៖

វិស័យសុខាភិបាល ដូចជាមន្ទីពេទ្យ ឳសថស្ថាន
វិស័យអប់រំ ដូចជាសាលាមតេយ្យ
មុខរបរដែលទាក់ទងទៅនឹងចំណីអាហារផ្អែមៗ ដូចជាស្ករគ្រាប់ នំខេក ឬស្ករសូកូឡាជាដើម។

ដូចនេះអ្នកគួរតែជ្រើសរើសយកពណ៌ស្វាយ ប្រសិនបើអាជីវកម្មរបស់លោកអ្នកតែងជួបប្រទះទៅនឹងភាពតានតឹង ពីព្រោះពណ៌ស្វាយអាចជួយធ្វើឲ្យអតិថិជនរបស់អ្នកមានអារម្មណ៍ធូរស្បើយ និងត្រជាក់បាន។

ពណ៌ក្រហម

តាមក្បួនតម្រារបស់ហុងស៊ុយ ពណ៌ក្រហមគឺជាពណ៌ដែលនាំមកនូវវាសនាល្អ សំណាងល្អ ទំនុកចិត្ត និងជាពិសេសនោះ គឺមាសប្រាក់តែម្តង។ តែសម្រាប់ក្នុងន័យអវិជ្ជមានវិញ ពណ៌ក្រហមគឺជាពណ៌នៃកំហឹង និងភាពមួរម៉ៅ ដូចនេះយល់ល្អអ្នកមិនត្រូវប្រើប្រាស់ពណ៌ក្រហមឲ្យច្រើន ឬដិតខ្លាំងពេកនោះទេ គួរតែមានលាយជាមួយពណ៌ដទៃទៀតផងដែរ។ បន្ថែមពីលើនេះ ពណ៌ក្រហម គឺជាពណ៌ ដែលបង្ហាញពីថាមពល និងគំណិតវិជ្ជមាន ហើយវាក៏ជាពណ៌ ដែលទាក់ទងទៅនឹងលោហិត សង្គ្រាម និងអំពើហិង្សាដែរ។

ពណ៌ក្រហម គឺជាពណ៌ស័កសមជាមួយអាជីវកម្ម ដែលទាក់ទងទៅនឹងសេចក្តីស្រលាញ់ និងភាពអន្លង់អន្លោច មានដូចជាហាងផ្កា ហាងលក់ស្កសូកូឡា ភោជនីយដ្ឋានសម្រាប់គូរស្នេហ៍ ឬសណ្ឋាគារជាដើម។

រូបភាពពីគេហទំព័រ beliefnet.com

ពណ៌លឿង

ទោះបីថាពណ៌លឿង គឺជាពណ៌មួយដែលភ្លឺដូចទៅនឹងពណ៌របស់ពន្លឺព្រះអាទិត្យក៏ដោយ ក៏ប៉ុន្តែមិនមែនរាល់អាជីវកម្មសុទ្ធតែត្រូវគ្នាជាមួយវានោះទេ។ តាមក្បួនហុងស៊ុយបានបញ្ជាក់ឲ្យដឹងថា ពណ៌លឿង គឺជាពណ៌នាំមកនូវ ទំនាក់ទំនងល្អ មិត្តភាព និងសុខភាព ប៉ុន្តែបើតាមការសិក្សាស្រាវជ្រាវបែបវិទ្យាសាស្ត្របានបង្ហាញថា ការមើល ឬសំលឹងទៅកាន់របស់ដែលមានពណ៌លឿងក្នុងរយៈពេលយូរ អាចធ្វើឲ្យយើងកើតមានអារម្មណ៍មិនសប្បាយចិត្ត។

teen-tastic-contemporary-home-office-in-black-and-yellow

រូបភាពពីគេហទំព័រ beliefnet.com

ពណ៌លឿង គឺជាពណ៌ដែលអាចរំញោចសមត្ថភាពបែងចែកខុសត្រូវរបស់ខួរក្បាល និងបង្កើនភាពច្បាស់លាស់ជាក់លាក់នៃស្មារតីរបស់យើង ពោលគឺវាអាចជួយជំរុញឲ្យមានភាពប្រសើរឡើងនូវការគិតវិភាគ និងការវិនិច្ឆ័យនៅក្នុងខួរក្បាលរបស់យើង។ ថ្វីបើភាគច្រើននៃបុរសមិនសូវចូលចិត្តពណ៌នេះក្តី ក៏ប៉ុន្តែសម្រាប់កូនក្មេងតូចៗ គឺងាយនឹងចាប់អារម្មណ៍ទៅនឹងវាខ្លាំងណាស់ មូលហេតុគឺដោយសារតែពណ៌លឿង គឺជាពណ៌ដែលមានពន្លឺ។

រាល់អាជីវកម្មដែលមានទាក់ទងជាមួយនឹងក្មេងៗគួរតែប្រើប្រាស់ពណ៌លឿង ដូចជាហាងលក់សំភារៈក្មេងលេង និងសាលារៀនមតេយ្យ ជាដើម ក្រៅពីនេះហាងលក់គ្រឿងសំអាងរបស់ស្ត្រីក៏អាចប្រើជាមួយនឹងពណ៌លឿងបានផងដែរ ពីព្រោះពណ៌នេះមើលទៅងាយទាក់ភ្នែក ដែលអាចធ្វើឲ្យមនុស្សឆាប់ចាប់អារម្មណ៍។

ពណ៌ខៀវ

ដូចគ្នាទៅនឹងពណ៌ស្វាយ ពណ៌ខៀវក៏ជាពណ៌ដែលមានឥទ្ធិពលធ្វើឲ្យអារម្មណ៍របស់យើងស្ងប់ និងជួយកាត់បន្ថយភាពតានតឹងរបស់យើងបានដូចគ្នា ម៉្យាងវិញទៀត ដោយសារតែពណ៌ខៀវ គឺជាពណ៌នៃទឹកសមុទ្រ និងមេឃ ដូចនេះពណ៌ខៀវ គឺទាក់ទងទៅនឹងសេរីភាព និងការផ្សងព្រេងផងដែរ។
ពណ៌ខៀវត្រូវបានគេប្រើប្រាស់យ៉ាងច្រើននៅក្នុងការធ្វើមុខជំនួញ ដោយសារតែពណ៌នេះ គឺតំណាងឲ្យការជឿទុកចិត្ត ភាពស្មោះត្រង់ ភាពជឿជាក់ និងការចេះទទួលខុសត្រូវ ហើយវាក៏តំណាងឲ្យផងដែរនូវចរិកអភិរក្សនិយម។

រូបភាពពីគេហទំព័រ beliefnet.com

អ្នកគួរតែប្រុងប្រយ័ត្ននៅពេលប្រើប្រាស់ពណ៌ខៀវនៅក្នុងអាជីវកម្មរបស់អ្នក ព្រោះការប្រើពណ៌នេះច្រើនហួសហេតុពេក អាចបង្កើតភាពស៊ាំញ៉ាំ មើលទៅគួរឲ្យធុញ ហើយក៏មិនអាចទាក់ទាញអតិថិជនវ័យក្មេងបានផងដែរ។ ជាធម្មតាពណ៌ខៀវ ត្រូវបានគេប្រើប្រាស់សម្រាប់ធនាគារ ក្រុមហ៊ុនធានារ៉ាប់រង ក្រុមហ៊ុនថែទាំសុខភាព និងអាជីវកម្មណាដទៃផ្សេងទៀត ដែលការជឿទុកចិត្ត និងភាពជឿជាក់ ត្រូវបានគេចាត់ទុកជារឿងដ៏សំខាន់។

ពណ៌បៃតង

ពណ៌បៃតង គឺជាពណ៌នៃធម្មជាតិ ភាពស្រស់ត្រកាល តុល្យភាព និងភាពសុខដុមរមនា។ រាល់អាជីវកម្ម ដែលកំពុងតែដំណើរការ គួរតែមានការរួមបញ្ចូលជាមួយនឹងពណ៌បៃតងខ្លះៗ។ ពណ៌បៃតងក្រម៉ៅ គឺតំណាងឲ្យប្រាក់កាស កិត្យានុភាព និងទ្រព្យសម្បត្តិ ហើយសម្រាប់ពណ៌បៃតងស្រាល គឺតំណាងឱ្យភាពស្រស់ស្រាយ ភាពរីចំរើន សេចក្ដីសប្បុរស និងការអាណិតអាសូរ។

រូបភាពពីគេហទំព័រ beliefnet.com

បៃតងជាជម្រើសល្អឥតខ្ចោះសម្រាប់គ្រប់មូលដ្ឋានអាជីវកម្ម ហើយវាក៏ជាពណ៌មួយដ៏ចាំបាច់ត្រូវតែមានផងដែលសម្រាប់បរិស្ថាន ឬទីកន្លែងដែលទាក់ទងទៅនឹង ចំណីសរីរាង្គធម្មជាតិ សុខភាព និងអាជីវកម្ម ដែលទាក់ទងទៅនឹងម្ហូបអាហារ។ ពណ៌បៃតងរំញ៉ោចចំណង់អាហារ ដូច្នេះវាជារឿងដ៏ល្អមួយប្រសិនបើមានពណ៌នេះជាពិសេសសម្រាប់អ្នកដែលកំពុងដំណើរការភោជនីយដ្ឋាន ឬអាជីវកម្មម្ហូបអាហារណាមួយ។

អានបន្ត

Like 3312

ស្បែកជើងចងខ្សែដោយស្វ័យប្រវត្តិ HyperAdapt របស់ក្រុមហ៊ុន Nike នឹងចេញលក់នៅថ្ងៃ 28 ខែវិច្ឆកាខាងមុខនេះ

បច្ចេកវិទ្យា, សំលៀកបំពាក់

09/10/2016

ក្រុមហ៊ុន Nike បានប្រកាសពីថ្ងៃ ដែលពួកគេនឹងដាក់លក់ស្បែកជើងចងខ្សែដោយស្វ័យប្រវត្តិខ្លួនឯង ដែលត្រូវបានអភិវឌ្ឍឡើងតាមស្បែកជើងពាក់ដោយតួរឯកប្រុសក្នុងរឿង Back To The Future II លោក Michael J. Fox។ ក្រោយពីការអភិវឌ្ឍបច្ចេកវិទ្យាស្បែកជើងចងខ្សែដោយស្វ័យប្រវត្តិនេះអស់រយៈពេលប៉ុន្មានឆ្នាំកន្លងទៅ ក្រុមហ៊ុន Nike នឹងដាក់ស្បែកជើង HyperAdapt 1.0 ឲ្យមានលក់ក្នុងទីផ្សារសម្រាប់ការជាវ និងធ្វើបទពិសោធ នៅថ្ងៃទី 28 ខែវិច្ឆកាខាងមុខនេះហើយ ក៏ប៉ុន្តែមាននៅតែក្នុងហាង Nike មួយចំនួននៅសហរដ្ធអាមេរិកតែប៉ុណ្ណោះ។ សម្រាប់តម្លៃវិញ គឺយើងនៅមិនទាន់ដឹងច្បាស់នៅឡើយទេ ក៏ប៉ុន្តែយើងអាចរំពឹងទុកថាវានឹងមានតម្លៃថ្លៃបន្តិច។

លោក Michael J. Fox ក្នុងរឿង Back to The Future II

លក្ខណៈពិសេសនៃដំណើរការ និងការឌីហ្សាញរបស់ស្បែកជើងចងខ្សែដោយស្វ័យប្រវត្តិ HyperAdapt នេះ គឺថាស្បែកជើងទាំងសងខាង មានបំពាក់នូវខ្សែធ្វើពីខ្សែនីឡុង ឬខ្សែសន្ទូចត្រីនៅខាងក្នុងដើម្បីរឹតបន្តឹងស្បែកជើងទៅនឹងជើងរបស់អ្នក បូករួមជាមួយនឹងសិនស័រសម្ពាធ (Pressure Sensor) នៅចំកណ្ដាលស្បែកជើង។ នៅពេលដែលអ្នកដាក់ជើងរបស់អ្នកចូលទៅក្នុងស្បែកជើងនោះ សិនស័រសម្ពាធនោះនឹងដឹង ហើយទាញខ្សែនីឡុងដែលនៅក្នុងស្បែកជើងនោះបន្តឹងជុំវិញជើងរបស់អ្នក។ ហើយអ្នកក៏អាចសារ៉េផ្លាស់ប្តូរឲ្យវាតឹង ឬធូរបានដោយចុចប៊ូតុងមួយគូរ ដែលមានបង្កប់នៅកស្បែកជើងនេះបានផងដែរ។

ស្បែកជើង Nike HyperAdapt 1.0

LED នៅកែងស្បែកជើងនឹងបំភ្លឺឡើង នៅពេលដែលខ្សែក្នុងស្បែកជើង HyperAdapt ធ្វើការរឹតបន្តឹង ឬនៅពេលដែលវាជិតអស់ថ្ម។ ត្រឹមត្រូវណាស់ ជាមួយនឹងរាល់គ្រឿងអេឡិចត្រូនិចនៅក្នុងស្បែកជើងនេះ វានឹងត្រូវទាមទារឲ្យមានការបញ្ចូលថ្ម។ អ្នកត្រូវការចំណាយពេល 3 ម៉ោងដើម្បីបញ្ចូលថ្មមួយពេញ ជាមួយនឹងប្រដាប់សាកថ្មឆក់របស់ Nike ដូចទៅនឹងប្រដាប់សាកថ្មរបស់ Apple Watch ដែរ ហើយថ្មមួយពេញរបស់វា គឺអាចប្រើប្រាស់បានរយៈពេលដល់ទៅ 2 អាទិត្យឯណោះ។ ហើយអ្នកអាចកត់សំគាល់បានដែរថា ខ្សែនីឡុង ដែលអ្នកឃើញនៅខាងលើស្បែកជើង គឺគ្រាន់តែជាការឌីហ្សាញតែប៉ុណ្ណោះ អ្វីដែលរឹតបន្តឹងស្បែកជើងនេះ គឺជាខ្សែនីឡុង ដែលបង្កប់នៅពីក្រោមខ្សែទាំងនោះទេ។

អ្នកអាចស្វែងយល់បន្ងែមអំពីស្បែកជើង HyperAdapt របស់ Nike នេះបានក្នុងវីដេអូខាងក្រោម៖

អានបន្ត

Like 3836

ម៉ូដសម្លៀកបំពាក់ទាន់សម័យសមរម្យ ដែលមិត្តនារីៗអាចជ្រើសរើសសំរាប់ចូលរួមពិធីបុណ្យភ្ជុំបិណ្ឌបាន

សង្គម, សំលៀកបំពាក់

24/09/2016

កម្ពុជា គឺជាប្រទេស ដែលគោរពប្រតិបត្តិ និងយកព្រះពុទ្ធសាសនាជាសាសនាផ្លូវការរបស់រដ្ឋ ដោយក្នុងនោះប្រជាជនភាគច្រើនគឺជាពុទ្ធសាសនិក។ សម្រាប់ប្រទេសខ្មែរយើង គឺមានពិធីបុណ្យជាតិ អន្តរជាតិ និងបុណ្យប្រពៃណីជាតិជាច្រើន ដែលរាជរដ្ឋាភិបាល និងប្រជាជនតែងតែប្រារព្ធធ្វើឡើងជារៀងរាល់ឆ្នាំ ក្នុងនោះផងដែរ បុណ្យភ្ជុំបិណ្ឌ គឺជាពិធីបុណ្យដ៏ធំមួយក្នុងចំណោមពីធីបុណ្យប្រពៃណីជាតិដ៏ទៃៗ ដោយពិធីបុណ្យនេះ គឺតែងប្រារព្ធឡើងនៅក្នុងខែភទ្របទពីថ្ងៃទី 01 រោចដល់ ថ្ងៃទី 14 រោច ហៅថាថ្ងៃកាន់បិណ្ឌ និង នៅថ្ងៃទី 15 រោចហៅថាថ្ងៃភ្ជុំបិណ្ឌ។

Pchum Ben Ancestors Festival, Battambang, Cambodia. Copyright 2014 Terence Carter / Grantourismo. All Rights Reserved.

ចំពោះឆ្នាំ 2016 នេះ ពីធីបុណ្យកាន់បិណ្ឌនឹងត្រូវធ្វើឡើងចាប់ពីថ្ងៃទី 17 ដល់ថ្ងៃទី 30 កញ្ញា និងសម្រាប់ថ្ងៃភ្ជុំបិណ្ឌគឺត្រូវនឹងថ្ងៃទី 01 ខែតុលា ដោយក្នុងរយៈពេលចំនួន 15 ថ្ងៃនេះប្រជាជនខ្មែរយើងទាំងប្រុស ស្រី និងចាស់ ក្មេង តែងនាំគ្នាយកចម្ហាន់ ស្លាដក និងបច្ច័យទៅប្រគេនព្រះសង្ឃ និងបោះបាយបិណ្ឌនៅតាមទីវត្តអារាមនានា ដើម្បីឧទ្ទិសដល់វិញ្ញាណខណ្ឌរបស់សាច់ញាតិ ដែលបានស្លាប់ទៅហើយ របស់ពួកគេ។

ដោយមូលហេតុថាទីវត្តអារាម គឺជាទីកន្លែងសការៈបូជា ដូចនេះការប្រារព្ធពិធីបុណ្យនេះ គឺតម្រូវឲ្យអ្នកដែលចូលរួមត្រូវមានទឹកចិត្តជ្រះថ្លា និងស្លៀកសម្លៀកបំពាក់ឲ្យបានសមរម្យ ដោយពាក្យថាសមរម្យនេះ គឺសំដៅទៅលើការស្លៀកពាក់ដែលមិនបង្ហាញ ឬបញ្ចេញសាច់ជ្រុលហួសហេតុពេក ជាពិសេសសម្រាប់នារីៗ។ ប្រសិនបើយើងចូលចិត្តសម្លៀកបំពាក់រៀងខ្លី យើងអាចប្រើប្រាស់សម្លៀកបំពាក់ណាដែលខ្លីសមរម្យ មិនឲ្យលើជង្គង់ពេក ដោយការគោរពប្រតិបត្តិនេះ គឺមិនមែនសម្រាប់តែក្នុងពីធីបុណ្យភ្ជុំបិណ្ឌតែប៉ុណ្ណោះទេ គឺសម្រាប់រាល់គ្រប់ពេលវេលា ដែលយើងចូលទៅក្នុងវត្តអារាម ឬទីកន្លែងសការៈដ៏ទៃទៀត ដូចជានៅតំបន់ប្រាសាទ និងព្រះរាជវាំងជាដើម។ តែទោះបីជាយ៉ាងដូចនេះក្តី ក៏មិនមានន័យថា យើងទាំងអស់គ្នាមិនអាចប្រើប្រាស់សម្លៀកបំពាក់ផ្សេងក្រៅពីសម្លៀកបំពាក់បែបប្រពៃណីដូចជាអាវប៉ាក់ ហូលផាមួង នោះដែរ ពោលគឺយើងក៏អាចជ្រើសរើសយកម៉ូដសម្លៀកបំពាក់ទាន់សម័យបានផងដែរ ឲ្យតែវាមានលក្ខណៈសមរម្យ មិនលើសលុបនោះ។

សម្រាប់ខាងក្រោមនេះគឺជាម៉ូដសម្លៀកបំពាក់ទាន់សម័យមួយចំនួនមានលក្ខណៈសមសម្យ ដែលអាចឲ្យយើងប្រើប្រាស់សម្រាប់ចូលរួមពីធីបុណ្យភ្ជុំបិណ្ឌបានសម្រាប់មិត្តនារីៗទាំងឡាយ៖

រូបភាពដោយ KhmerLife.style និង សម្លៀកបំពាក់ដោយ A-Y Collection

សម្លៀកបំពាក់ខាងលើនេះ គឺត្រូវបានឧបត្ថម្ភដោយហាងលក់សម្លៀកបំពាក់ A-Y Collection ដែលមានលក់ខោអាវនារីៗ និងរបស់ផ្សេងៗទៀតដូចជា កាបូប មួក នាឡិកាដៃជាដើម តាមអនឡាញ ដែលមានទំនិញមកថ្មីជារៀងរាល់អាទិត្យ។ ហើយអ្វីដែលពិសេសជាងនេះនោះ ហាង A-Y Collection ឥឡូវនេះមាន promotion បញ្ចុះតម្លៃ 10% លើរាល់ទំនិញទាំងអស់រហូតដល់ថ្ងៃទី 29 ខែកញ្ញា សម្រាប់ឳកាសបុណ្យភ្ជុំបិណ្ឌនេះ។

អានបន្ត

Like 4275

ប្រភេទនាឡិកាដៃ 5 ប្រភេទ ដែលសុភាពបុរសគ្រប់រូបគួរដឹង

សំលៀកបំពាក់

17/09/2016

ចំពោះសុភាពបុរសទាំងឡាយ តើអ្នកដឹងទេថា នាឡិកាដៃ ដែលអ្នកកំពុងពាក់ជាប្រភេទនាឡិកាដៃអ្វី? គោលបំណងចម្បងរបស់នាឡិកាដៃ គឺដើម្បីប្រាប់ពីពេលវេលា ហើយនាឡិកាដៃ ត្រូវបានបង្កើតឡើងជាច្រើនប្រភេទ និងត្រូវបានដាក់បញ្ចូលនូវមុខងារផ្សេងៗជាច្រើន សម្រាប់ងាយស្រួលក្នុងការប្រើប្រាស់ក្នុងស្ថានភាពជាក់លាក់ណាមួយ។ ខាងក្រោមនេះ គឺជាប្រភេទនាឡិកាដៃ 5 ប្រភេទ ដែលសុភាពបុរសទាំងឡាយគួរដឹង និងមាន ដើម្បីជ្រើសរើសពាក់ប្រភេទនាឡិកាដៃឲ្យបានត្រឹមត្រូវតាមកាលៈទេសៈ។

1. Dress Watch

Dress Watch គឺជាប្រភេទនាឡិកាដៃ ដែលត្រូវបានពាក់ជាមួយនឹងអាវធំឈុត (Suit) ដើម្បីចូលរួមកម្មវិធីផ្លូវការធំៗផ្សេងៗ។ ភាគច្រើន ការឌីហ្សាញរបស់នាឡិកាដៃប្រភេទនេះ គឺមានភាពសាមញ្ញបំផុតបែបក្លាសីក (classic) និង ហាយក្លាស (high class) ដើម្បីឲ្យស័ក្តិសមនឹងអាវឈុត និងគោលបំណងរបស់វា។ នៅខាងមុខរបស់នាឡិកាដៃប្រភេទនេះ គឺភាគច្រើនមិនសូវមានអ្វីរញ៉េរញ៉ៃច្រើនទេ ការឌីហ្សាញខ្លះ គឺមិនមានលេខលើនោះទេ មានតែគំណូសឆ្នូតៗមួយចំនួន ឬជាលេខរ៉ូមាំុង (I, II, III, …) សម្រាប់ប្រាប់ពីពេលវេលាតែប៉ុណ្ណោះ។

នាឡិកាដៃប្រភេទនេះ គឺភាគច្រើនមានកម្រាស់ស្ដើង ដើម្បីភាពងាយស្រួលដាក់ចូលក្នុងដៃអាវរបស់អ្នក។ ហើយពិសេសជាងនេះនោះ អ្នកតែងមានឃើញនូវថ្មមានតម្លៃដាំនៅលើនាឡិកាដៃប្រភេទនេះ ដូចជា ត្បូង ពេជ្រ ជាដើម ឬវាមានវត្ថុធាតុដើមធ្វើពីមាស ឬប្រាក់ ឬលោហៈធាតុមានតម្លៃផ្សេងៗទៀត។ ខ្សែរបស់វា ភាគច្រើនធ្វើពីស្បែកសុទ្ធ ដែលបញ្ជាក់ពីភាពហាយក្លាស និងភាពសង្ហាសម្រាប់សុភាពបុរស។ នាឡិកាដៃប្រភេទនេះ គឺស័ក្តិសមបំផុតសម្រាប់ទុកធ្វើជាកេរ្តិ៍ទៅឲ្យអ្នកជំនាន់ក្រោយរបស់អ្នក។

2. Field Watch

Field Watch គឺជាប្រភេទនាឡិកាដៃសម្រាប់ចុះ field ឬសម្រាប់ទាហានចុះធ្វើបេសកកម្មផ្សេងៗ ដែលវាមានដើមកំណើតមកពីសម័យសង្គ្រាមលោកលើកទី 1។ លក្ខណៈពិសេសរបស់នាឡិកាដៃប្រភេទនេះ គឺអ្នកអាចធ្វើការផ្លាស់ប្តូរ ឬបញ្ជារទ្រនិចនាឡិកាបានយ៉ាងងាយស្រួល និងរហ័ស ដូចជាចុចឲ្យវាឈប់ដើរ ឬសារ៉េឲ្យត្រូវម៉ោងគ្នាជាមួយនឹងក្រុមបេសកកម្មរបស់អ្នក ដើម្បីឲ្យមានម៉ោងដូចគ្នាជាដើម សម្រាប់ធ្វើកិច្ចការអ្វីមួយ ដែលពឹងលើម៉ោងជាក់លាក់។

ការឌីហ្សាញរបស់នាឡិកាដៃប្រភេទនេះ ភាគច្រើនមានមុខនាឡិកាធំ និងលេខមានពណ៌ច្បាស់ និងធំល្អងាយស្រួលមើល ជាពិសេសនៅក្នុងស្ថានភាពតឹងតែង ដូចជាពេលចុះបេសកកម្មរបស់ទាហានជាដើម។ ខ្សែរបស់វា ភាគច្រើន ធ្វើពីខ្សែនីឡុង (Nylon) ឬវត្ថុធាតុផ្សេងៗទៀត ដែលងាយស្រួលក្នុងការផ្លាស់ប្តូរ និងមិនងាយខូចខាត។

3. Aviator Watch

Aviator Watch គឺជាប្រភេទនាឡិកាដៃ ដែលត្រូវបានពាក់ដោយអ្នកបើកយន្តហោះ ហើយតាមពិតទៅវាមានលក្ខណៈដើមជា Field Watch តែក្រោយពីអ្នកបើកយន្តហោះបានប្រើប្រាស់វាយូរៗទៅ គេក៏បានធ្វើការឌីហ្សាញនាឡិកាដៃនេះឡើង ដោយដាក់បន្ថែមនូវមុខងារថ្មីៗសម្រាប់តម្រូវឲ្យអ្នកបើកយន្តហោះប្រើប្រាស់ជាពិសេស។

ការឌីហ្សាញរបស់វា គឺស្រដៀងទៅនឹង Field Watch ដែរ ភាគច្រើនមានផ្ទៃមុខនាឡិកាពណ៌ខ្មៅ និងលេខធំៗពណ៌ស ដើម្បីឲ្យមានភាពងាយស្រួលក្នុងការមើលពេលបើកយន្តហោះ។ បន្ថែមពីនេះទៀត គឺមានមុខងារផ្សេងជាច្រើនទៀត ដែលត្រូវបានដាក់បញ្ចូលក្នុងប្រភេទនាឡិកាដៃនេះ ដូចជា whiz wheel និង time zone ជាដើម ហើយវាក៏មានប៊ូតុងចុចថែម សម្រាប់ Start ឬ Stop ពេល ឬសម្រាប់បញ្ជារមុខងារថ្មីៗទាំងនោះផងដែរ ក្រៅពីកងសម្រាប់សារ៉េម៉ោង។

នេះគឺជា Whiz Wheel ដែលប្រើដោយអ្នកបើកយន្តហោះ។

Whiz Wheel នៅលើមុខនាឡិកាដៃ Aviator

4. Dive Watch

Dive Watch គឺជាប្រភេទនាឡិកាដៃ ដែលពាក់ដោយអ្នកជ្រមុជទឹក។ លក្ខណៈពិសេសរបស់នាឡិកាដៃប្រភេទនេះ គឺវាមានភាពរឹងមាំ អាចប្រើប្រាស់ក្នុងទឹក និងអាចរ៉ាប់រងនឹងសម្ពាធនៅក្រោមទឹកបានជ្រៅ យ៉ាងតិចណាស់ក៏ 100 ម៉ែត្រដែរ។ ដើម្បីឲ្យមានភាពរឹងមាំ កញ្ចក់នាឡិកាដៃប្រភេទនេះ ភាគច្រើនត្រូវបានធ្វើពី ត្បូងកណ្ដៀង (Sapphire) ហើយទ្រនិច និងលេខនៅមុខនាឡិកា ភាគច្រើនមានភ្ជាប់នូវជាតិ Tritium Luminous Paint ដែលជាធាតុអាចភ្លឺនៅពេលងងឹតបាន និងអាចភ្លឺបានរហូតដល់ទៅ 15 ឆ្នាំឯណោះបើវាសុទ្ធ។ រីឯខ្សែរបស់វាវិញ ភាគច្រើនធ្វើពីជ័រ ឬស៊ីលីខូន (silicon) ហើយមានទំហំធំ អាចពាក់នៅពីលើអាវជ្រមុជទឹកបាន។ បន្ថែមពីនេះ នាឡិកាដៃប្រភេទនេះ ក៏មាននូវមុខងារអាចវាស់នូវពេលវេលា ដែលអ្នកនៅក្រោមទឹកបានផងដែរ ហើយវារាប់ពេលទៅមុខរហូតមិនរាប់មកក្រោយវិញទេ ទោះបីអ្នកទើសវាដោយចៃដន្យក៏ដោយ ដូច្នេះអ្នកអាចដឹងថាសល់អុកស៊ីសែនប៉ុន្មានពេលនៅក្រោមទឹក។

ជាតិ Tritium Luminous Paint ភ្លឺនៅកន្លែងងងឹត

ទ្រនិចវាស់ពេលវេលានៅជុំវិញមុខនាឡិកាដៃ

5. Racing Watch

Racing Watch គឺជាប្រភេទនាឡិកាដៃ ដែលពាក់ដោយអ្នកប្រណាំងឡាន។ លក្ខណៈពិសេសរបស់នាឡិកាដៃប្រភេទនេះ គឺការឌីហ្សាញរបស់វាមានលក្ខណៈលេចធ្លោ មានលេងនូវពណ៌ឆើតៗជាងប្រភេទនាឡិកាដៃប្រភេទផ្សេងៗទៀត ដូចជាពណ៌ក្រហម ទឹកក្រូច ខៀវ ជាដើម ហើយពេលខ្លះក៏មានដាំនូវថ្មមានតម្លៃផងដែរដូចជាត្បូង និងពេជ្រជាដើម។

ភាគច្រើនការឌីហ្សាញនៅខាងមុខនាឡិកា យើងឃើញមានមុខងារពិសេស 2 យ៉ាង គឺ Chronograph Dials ដែលជា stopwatch តូចសម្រាប់កំណត់ពេលវេលា និង Tachymeter សម្រាប់វាស់ពីរយៈពេល និងល្បឿន នៅពេលអ្នកជិះឡាន ឬម៉ូតូ ជាដើម។

graham_silverstone_rs_endurance_24hr_560

Tachymeter នៅជុំវិញមុខនាឡិកាដៃ

សរុបមក ខាងលើនេះ គឺជាប្រភេទនាឡិកាដៃ 5 ប្រភេទ ដែលសុភាពបុរសទាំងឡាយគួរដឹង និងមាន។ សូមបញ្ជាក់ថា ទាំងនេះគឺគ្រាន់តែជាប្រភេទនាឡិកាដៃគោលតែប៉ុណ្ណោះ នៅក្នុងពិភពម៉ូដនាឡិកាដៃ គឺមានច្រើនប្រភេទទៀត ភាគច្រើន គឺជាប្រភេទកាត់គ្នារវាងប្រភេទនាឡិកាដៃខាងលើ។ បន្ថែមពីនេះ នាពេលបច្ចុប្បន្ននេះ យើងក៏មានឃើញការកើនឡើងនូវនាឡិកាដៃឆ្លាត (Smart Watches) ចូលក្នុងពិភពម៉ូដរបស់នាឡិកាដៃផងដែរ។

អានបន្ត

Like 5949

គន្លឹះ 3 យ៉ាងក្នុងការជ្រើសរើសសំលៀកបំពាក់សម្រាប់បុរសមានកំពស់មិនសូវខ្ពស់

សំលៀកបំពាក់

02/09/2016

ចំពោះសុភាពបុរសទាំងឡាយ ដែលមានកំពស់មិនសូវខ្ពស់ វាពិតជាពិបាកណាស់ក្នុងការស្វែងរកសំលៀកបំពាក់ ដែលសម។ ក្នុងអត្ថបទនេះ យើងនឹងលើកឡើងនូវគន្លឹះ 3 យ៉ាង ដែលសុភាពបុរសទាំងឡាយអាចយកទៅពិចារណា មុននឹងជ្រើសរើសសំលៀកបំពាក់ ដើម្បីឲ្យមើលទៅឃើញខ្ពស់ និងសង្ហា។

1. ជ្រើសរើសសំលៀកបំពាក់ ដែលមានសមាមាត្រល្អ

ដើម្បីឲ្យមើលទៅឃើញរាងខ្ពស់ អ្នកគួរជ្រើសរើសយកសំលៀកបំពាក់ណា ដែលមានសមាមាត្រល្អ ដូចជាទំហំរវាងអាវ ឬខោ និងហោប៉ៅ ប្រវែងរវាងលេវអាវនីមួយៗ ទំហំកអាវ និងកដៃអាវជាដើម។ ប្រសិនបើអ្នកជ្រើសរើសយកអាវ ដែលមានហោប៉ៅមុខធំពេក អ្នកនឹងមើលទៅដូចជាកូនក្មេងពាក់អាវមនុស្សចាស់អីញ្ជឹង ពីព្រោះថាខួរក្បាលរបស់មនុស្ស តែងតែប្រៀបធៀបរបស់ទាំងអស់ដែលនៅជិតៗគ្នា ដូច្នេះអ្នកគួរជ្រើសរើសឲ្យបានល្អ។ ជម្រើសល្អមួយទៀត គឺជ្រើសរើសអាវ ដែលមិនមានហោប៉ៅ។ ដូចគ្នាផងដែរ ចំពោះប្រវែងរវាងលេវអាវនីមួយៗ ទំហំកអាវ និងកដៃអាវ អ្នកត្រូវប្រាកដថាវាមានទំហំតូចល្មមសមនឹងរាងរបស់អ្នក ពេលមើលពីចំងាយ។

2. ជ្រើសរើសសំលៀកបំពាក់ ដែលមានទំហំសមនឹងរាងរបស់អ្នក

គន្លឹះសំខាន់ទី 2 គឺជ្រើសរើសសំលៀកបំពាក់ ដែលត្រូវនឹងរាងរបស់អ្នក។ អ្នកមិនគួរជ្រើសរើសខោអាវ ដែលមានទំហំធំពេក ឬតូចពេកនោះទេ។ បើសិនជាអ្នកជ្រើសរើសខោអាវ ដែលធំពេក អ្នកនឹងមើលទៅដូចជាមនុស្សធាត់ ហើយបើកំពស់អ្នកមិនសូវខ្ពស់ទៀតនោះ វានឹងមើលទៅកាន់តែយ៉ាប់។ ដោយឡែកសំលៀកបំពាក់ ដែលតូច ឬតឹងពេក នឹងធ្វើឲ្យអ្នកមើលទៅដូចជាពាក់អាវកូនក្មេង ឬអាវខើច។ តែទោះជាយ៉ាងណា វាពិបាកណាស់ក្នុងការជ្រើសរើសសំលៀកបំពាក់ ដែលត្រូវនឹងរាងរបស់អ្នក 100% នោះ ដូច្នេះហើយ រាល់សំលៀកបំពាក់ ដែលអ្នកទិញ អ្នកត្រូវប្រាកដថាវាត្រូវនឹងអ្នក តាមតែអាចធ្វើទៅបាន ហើយអ្នកអាចយកវាទៅសារ៉េតាមក្រោយបាន។

អាវ ដែលសមនឹងរាងអ្នក គឺមានខ្សែស្មាត្រឹមចុងស្មារបស់អ្នក មិនហៀរចុះដល់ដើមដៃ ហើយដៃអាវមិនវែងពេកដល់គ្របដៃរបស់អ្នក ទំហំអាវជុំវិញទ្រូង និងចង្កេះរបស់អ្នកមិនធូរ ឬតឹងពេក និងប្រវែងអាវមិនហៀរចុះក្រោមហួសគូទរបស់អ្នក លើកលែងតែអាវនោះ គឺជាអាវសម្រាប់ទ្រនុយ។ រីឯខោវិញ គឺមិនធូរ ឬតឹងពេក ហើយវាមានប្រវែងជើងខោត្រឹមកស្បែកជើងរបស់អ្នក មិនសល់ក្រណាត់ច្រើនជ្រល់ពេក ព្រោះថាបើខោអ្នកនៅសល់ក្រណាត់រួញនៅកជើងអ្នកច្រើនពេក អ្នកនឹងមើលទៅដូចជាមនុស្សមានជើងខ្លី ធ្វើឲ្យមើលទៅកាន់តែទាប។ បន្ថែមពីនេះ អ្នកត្រូវជៀសវាងខោ ដែលសល់សាច់ក្រណាត់នៅចន្លោះជើងធ្លាក់ចុះក្រោមខ្លាំងពេក ព្រោះវាក៏ធ្វើឲ្យអ្នកមើលទៅមានជើងខ្លីផងដែរ។

3. ស្លៀកសំលៀកបំពាក់ ដែលមានពណ៌ស្រដៀងគ្នាពីក្បាលដល់ចុងជើង

គន្លឹះចុងក្រោយ ក្នុងការជ្រើសរើសសំលៀកបំពាក់ ដែលធ្វើឲ្យអ្នកមើលទៅឃើញខ្ពស់ គឺត្រូវជ្រើសរើសសំលៀកបំពាក់ ដែលអនុញ្ញាតឲ្យភ្នែកអ្នកដទៃងាយស្រួលក្នុងការមើលអ្នកពីក្បាលដល់ចុងជើង។ វិធីសាស្ត្រមួយដ៏ល្អ គឺជ្រើសរើសសំលៀកបំពាក់ ដែលមានពណ៌ស្រដៀងគ្នាពីក្បាលដល់ចុងជើង ទាំងមួក អាវ ខ្សែក្រវ៉ាត់ ខោ និងស្បែកជើង។ បើអ្នកចូលចិត្តខោ ដែលមានពណ៌ដិត ដូចជាពណ៌ខ្មៅ ឬត្នោត អ្នកអាចពាក់អាវ ខ្សែក្រវ៉ាត់ ស្រោមជើង និងស្បែកជើងពណ៌ដិតដូចគ្នា តែបើអ្នកចូលចិត្តពណ៌ស្រាលៗ អ្នកគួរជ្រើសរើសអ្វីផ្សេងទៀតឲ្យមានពណ៌ស្រាលដូចគ្នា ទើបអ្នកមើលទៅឃើញខ្ពស់។ អ្វីដែលល្អបំផុតនោះ អ្នកគួរជ្រើសរើសសំលៀកបំពាក់ ដែលមានពណ៌ស្រដៀងនឹងពណ៌ស្បែករបស់អ្នក។

សរុបមក គន្លឹះសំខាន់ៗទាំងបីខាងលើ នឹងជួយអ្នកក្នុងការស្វែងរកសំលៀកបំពាក់ ដែលអាចធ្វើឲ្យអ្នកមើលទៅឃើញខ្ពស់ និងក្លាយជាសុភាពបុរសទាន់សម័យ ទោះបីអ្នកមានកំពស់មិនសូវខ្ពស់ក៏ដោយ។ បន្ថែមពីលើគន្លឹះទាំងនេះ អ្នកក៏អាចលេងម៉ូដសក់បែបបះឡើងលើ ដើម្បីឲ្យមើលទៅឃើញខ្ពស់បានផងដែរ (ស្វែងយល់ពីម៉ូដសក់ ដែលត្រូវនឹងទម្រង់មុខរបស់អ្នក)។ តើអ្នកគិតយ៉ាងណាចំពោះគន្លឹះទាំងបីខាងលើ ហើយបើអ្នកមានគន្លឹះអ្វីផ្សេង ដើម្បីឲ្យមើលទៅឃើញរាងខ្ពស់ក្នុងសំលៀកបំពាក់ ដែលអ្នកពាក់ អ្នកអាចចែករំលែកវាបាននៅក្នុងប្រអប់បញ្ចេញមតិខាងក្រោម។

អានបន្ត

1 25839

វិធីមួលដៃអាវ 5 របៀបសម្រាប់សុភាពបុរស

សំលៀកបំពាក់

02/09/2016

ការមួលដៃអាវ (អាវក្រណាត់) គឺមានច្រើនរបៀប ហើយហេតុផល ដែលសុភាពបុរសទាំងឡាយមួលដៃអាវរបស់ពួកគេឡើង គឺដើម្បីភាពងាយស្រួលក្នុងការធ្វើការមួយចំនួន។ អ្នកត្រូវចាំថា អ្នកមិនគួរមួលដៃអាវនៅក្នុងកម្មវិធីផ្លូវការធំៗនោះឡើយ ដោយឡែកអ្នកអាចមួលដៃអាវរបស់អ្នកបានតាមកាលៈទេសៈមួយចំនួន នៅពេលដែលអ្នកនៅក្រៅជាមួយមិត្តភក្តិ ឬគ្រួសារ នៅទីកន្លែងធម្មតា ដូចជាហាងកាហ្វេ ឬនៅផ្ទះជាដើម។ ខាងក្រោមនេះ គឺជារបៀបមួលដៃអាវ 5 របៀប ដែលពេញនិយមសម្រាប់សុភាពបុរសទាំងឡាយ។

1. AIFA Roll

របៀបមួលដៃអាវ 2 តង់ឡើងមកលើ គឺគេហៅថា AIFA roll ។ ចំពោះរបៀបមួលដៃអាវប្រភេទនេះ អ្នកមួលដៃអាវរបស់អ្នក 2 តង់ឡើងមកលើត្រឹមកំភួនដៃរបស់អ្នក។ ការមួលដៃអាវរបៀបនេះវាអាចនឹងឆាប់របូតមកវិញ បើសិនជាដៃអាវរបស់អ្នករៀងធំខ្លាំង។

របៀបមួលដៃអាវ 2 តង់ ឬ AIFA Roll

2. Basic Roll

Basic roll គឺជារបៀបមួលដៃអាវ 3 តង់មកត្រឹមកែងដៃ ឬក្រោមកែងដៃបន្តិច។ របៀបមួលដៃប្រភេទនេះ គឺមានភាពសាមញ្ញ និងពេញនិយមបំផុតសម្រាប់សុភាពបុរសទាំងឡាយ ដែលពាក់អាវក្រណាត់ ហើយចង់មួលដៃអាវ។ វារៀងជាប់បានយូរជាង AIFA roll បន្តិច។

របៀបមួលដៃអាវ 3 តង់ ឬ Basic Roll

3. High Roll

High roll គឺជារបៀបមួលដៃអាវពីលើ basic roll ថែមមួយតង់ទៀត និយាយឲ្យខ្លី គឺការមួលដៃអាវ 4 តង់រហូតដល់ពាក់កណ្ដាលដើមដៃរបស់អ្នក។ ប្រសិនជាអ្នកមានរូបសាក់នៅដើមដៃ ហើយអ្នកចង់បង្ហាញឲ្យអ្នកដទៃឃើញ អ្នកអាចប្រើរបៀបមួលដៃអាវប្រភេទនេះបាន។

របៀបមួលដៃអាវ 4 តង់ ឬ High Roll

4. Master Roll

ចំពោះរបៀបមួលដៃអាវ Master roll ឬក៏អាចហៅបានឈ្មោះជាច្រើនទៀត ដំបូងអ្នកមួលដៃអាវឡើងមួយតង់ដោយទាញកដៃអាវអ្នកពន្លាត់ឡើងប្រវែងវែងល្មម រួចទាញផ្នែកខាងក្នុងនៃដៃអាវរបស់អ្នកមួលឡើងពីលើកដៃអាវរបស់អ្នក។ របៀបមួលដៃអាវប្រភេទនេះ គឺល្អបំផុតប្រសិនបើអាវរបស់អ្នកមានកដៃអាវពណ៌ផ្សេងពីពណ៌អាវរបស់អ្នក ព្រោះថាអ្នកផ្សេងអាចមើលឃើញពណ៌កដៃអាវនោះបាន ហើយក៏បង្ហាញនូវស្ទីលដ៏ឡូយផងដែរ។

របៀបមួលដៃអាវបញ្ចេញកដៃអាវ ឬ Master Roll

របៀបមួលដៃអាវបញ្ចេញកដៃអាវ ឬ Master Roll

5. The Garter/Band Roll

ចុងក្រោយគេ របៀបមួលដៃអាវ Garter/Band roll គឺអ្នកប្រើខ្សែក្រវ៉ាត់ដៃអាវ (Garter) ឬកៅស៊ូមកចង់ពីលើដៃអាវ រួចទាញវាឡើងមកត្រឹមដើមដៃ។ ខ្សែក្រវ៉ាត់ដៃអាវនោះនឹងគៀបដៃអាវរបស់អ្នកជាប់ជាមួយនឹងដៃរបស់អ្នកមិនឲ្យវារបូតចុះមកក្រោមវិញនោះទេ។ របៀបមួលដៃអាវប្រភេទនេះ គឺត្រូវបាននិយមប្រើដោយអ្នកលេងឧបករណ៍តន្ត្រី និងអ្នកធ្វើការខាងឌីហ្សាញ ឬគូរប្លង់នានាជាដើម។

របៀបមួលដៃអាវដោយប្រើខ្សែរក្រវ៉ាត់ដៃអាវ ឬ Garter/Band Roll

10pairs-lot-New-arrive-fashion-men-Shirt-Sleeve-Holder-adjustable-new-2014-man-Arm-Bands-Garter

ខ្សែក្រវ៉ាត់ដៃអាវ (Garter)

តើអ្នកចូលចិត្តរបៀបមួលដៃអាវតាមវិធីណាខាងលើ? បើអ្នកមានវិធីមួលដៃអាវថ្មីផ្សេងពីនេះ អ្នកអាចចែករំលែកវិធីសាស្ត្ររបស់អ្នកនៅក្នុងកន្លែងបញ្ចេញមតិនៅខាងក្រោមបាន។

អានបន្ត

1 9436

តើបុរស ដែលមានទម្រង់មុខបែបនេះ គួរតែកាត់សក់ម៉ូដណាសម?

សង្គម, សំលៀកបំពាក់

08/07/2016

សំរាប់សុភាពបុរស មុននឹងយើងធ្វើការសំរេចចិត្តជ្រើសរើសម៉ូដសក់ ការទុកពុកមាត់ ឬវ៉ែនតានោះ យើងទាំងអស់គ្នាគួរតែស្វែងយល់អំពីលក្ខណៈនៃទម្រង់មុខរបស់យើងជាមុនសិន។ អញ្ចឹង!! តើហេតុអ្វីបានជាយើងចាំបាច់ត្រូវតែដឹងអំពីទម្រង់មុខរបស់យើង?? មូលហេតុគឺ ដោយសារតែរាល់ម៉ូដសក់ ដែលមើលទៅសក្តិសមជាមួយនឹងអ្នកដ៏ទៃ មិនប្រាកដថាវានឹងមើលទៅសក្តិសមជាមួយនឹងទម្រង់មុខរបស់យើងនោះទេ ដូចនេះដើម្បីជៀសវាង មានភាពឆ្គាំឆ្គង មិនសក្តិសមជាមួយនឹងម៉ូដសក់ អ្នកគួរតែស្វែងយល់ឲ្យច្បាស់ជាមួយនឹងទម្រង់មុខរបស់អ្នកជាមុនសិន។

អញ្ចឹង តើមុខរបស់អ្នកមានទម្រង់បែបណាដែរ? ខាងក្រោមនេះ គឺជាប្រភេទទម្រង់មុខ របស់បុរស ដែលមានលក្ខណៈ និងប្រវែងផ្ទៃមុខខុសៗគ្នា៖

ទម្រង់មុខជ្រុង

ប្រវែងនៃគ្រប់ជ្រុងជ្រោយ របស់ទម្រង់មុខប្រភេទនេះ គឺប្រហាក់ប្រហែលគ្នា ចំណុចសំខាន់ គឺនៅត្រង់ឆ្អឹងថ្គាមទាំងសងខាងដ៏ធំ ដែលយើងអាចមើលឃើញយ៉ាងច្បាស់។

សំរាប់ទម្រង់មុខប្រភេទនេះ សក្តិសមជាមួយទាំងម៉ូដសក់ខ្លី និងវែងល្មម។ ជម្រើសដែលល្អបំផុត គួរតែជ្រើសរើសយកម៉ូដសក់ខ្លីៗ ទាំងខាងមុខ ក្រោយនិងចំហៀង រឹតតែខ្លី គឺរឹតតែសក្តិសម។

ម៉ូដសក់មួយចំនួន ដែលសក្តិសមនឹងទម្រង់មុខជ្រុង

ទម្រង់មុខមូល

ទម្រង់មុខប្រភេទនេះ គឺមានប្រវែងឆ្អឹងថ្ពាល់ និងប្រវែងកំពស់ផ្ទៃមុខ ប្រហាក់ប្រហែលគ្នា តែវាមានប្រវែង និងទំហំធំជាងត្រង់ចំណុចថ្ងាស់ និងឆ្អឹងថ្គាម ដោយមុមរបស់ថ្គាមមិនសូវជាលេចចេញរូបរាងច្បាស់នោះទេ។

សំរាប់ទម្រង់មុខប្រភេទនេះ សក្តិសមជាមួយម៉ូដសក់ខាងមុខដែលមានប្រវែងវែងល្មម ហើយចូកទៅក្រោយ ឬប្រភេទម៉ូដសក់វែងល្មមដែលជ្រងឡើងទៅលើ ធ្វើបែបនេះ ដើម្បីជួយឲ្យទម្រង់មុខ ដ៏មូលធំរបស់យើង មានសភាពរាងវែងបន្តិច។ ការបណ្តុះពុកមាត់ និងពុកចង្ការ ក៏អាចជួយធ្វើឲ្យទម្រង់មុខរបស់យើង មានមុមស្រួចផងដែរ ជាពិសេសគឺនៅត្រង់បរិវេណថ្គាមតែម្តង។

ម៉ូដសក់មួយចំនួន ដែលសក្តិសមនឹងទម្រង់មុខមូល

ទម្រង់មុខពងក្រពើ

ទម្រង់មុខពងក្រពើ គឺជាប្រភេទទម្រង់មុខមួយដ៏ពេញនិយមជាងគេបំផុត មិនថាសំរាប់បុរស ឬស្ត្រីនោះទេ តែងប្រាថ្នាចង់បាននូវទម្រង់មុខបែបនេះ ហើយទម្រង់មុខប្រភេទនេះ ក៏សក្តិសមជាមួយនឹងសឹងតែគ្រប់ប្រភេទម៉ូដសក់ផងដែរ។

ទោះបីជា មានម៉ូដសក់ជាច្រើនដែលសាកសមទៅនឹងទម្រង់មុខនេះក្តី ក៏ប៉ុន្តែយើងគួរជៀសវាងម៉ូដសក់ណា ដែលមានលក្ខណៈវែងទម្លាក់មកខាងមុខ បិទបាង់ថ្ងាស់ ព្រោះវាអាចធ្វើឲ្យមុខរបស់យើងមើលទៅប្រែជារាងមូលទៅវិញ។

ម៉ូដសក់មួយចំនួន ដែលសក្តិសមនឹងទម្រង់មុខពងក្រពើ

ទម្រង់មុខវែង

ទម្រង់មុខប្រភេទនេះ គឺមានប្រវែងរបស់ផ្ទៃមុខវែង ចំណែកឯប្រវែង និងទំហំរបស់ថ្ងាស់ ឆ្អឹងថ្ពាល់ និងថ្គាម គឺប្រហាក់ប្រហែលគ្នា។

ដោយសារតែទម្រង់មុខប្រភេទនេះ មានលក្ខណៈវែង យើងគួរតែជ្រើសរើសម៉ូដសក់ដែលវែងល្មម ទាំងខាងមុខ និងចំហៀង។ ការទម្លាក់សក់ខ្លះៗ មកគ្របថ្ងាស់ខាងមុខ អាចជួយបិទបាំងទម្រង់មុខដ៏វែងរបស់យើងបាន ក្រៅពីនេះការទុកពុកមាត់ និងពុកចង្ការដែលមានប្រវែងខ្លីៗ ក៏ជាជម្រើសមួយដ៏ល្អផងដែរ។

ម៉ូដសក់មួយចំនួន ដែលសក្តិសមនឹងទម្រង់មុខវែង

ទម្រង់មុខត្រីកោណ ឬថ្គាមខ្លា

ទម្រង់មុខប្រភេទនេះ គឺមានទំហំថ្គាមធំ និងមានប្រវែងទទឹងវែងជាង ថ្ពាល់ និងថ្ងាស់។

ទម្រង់មុខប្រភេទនេះ ទាមទារនូវម៉ូដសក់ ដែលមានប្រវែងវែងល្មម នៅខាងចំហៀង ដើម្បីជួយឲ្យថ្ងាស់របស់យើង មើលទៅ មានទំហំប្រហាក់ប្រហែល ទៅនឹងថ្គាមដ៏ធំរបស់យើង។ ជៀសវាងម៉ូដសក់ណា ដែលមានចំហៀងខ្លី ឬស្តើងខ្លាំង ព្រោះវានឹងធ្វើឲ្យថ្ងាស់របស់យើងមើលទៅកាន់តែតូច បើប្រៀបធៀបជាមួយនឹងថ្គាម។

ម៉ូដសក់មួយចំនួន ដែលសក្តិសមនឹងទម្រង់មុខត្រីកោណ ឬថ្គាមខ្លា

ទម្រង់មុខរាងដូចគ្រាប់ពេជ្រ

ទម្រង់មុខប្រភេទនេះ គឺមានប្រវែងផ្ទៃមុខវែងជាងគេ បន្ទាប់មកគឺប្រវែង និងទំហំរបស់ថ្ពាល់ ហើយប្រវែង និងទំហំរបស់ថ្ងាស់ ជាមួយនឹងប្រវែង និងទំហំតូចជាងគេនៃថ្គាម និងចំណុចពិសេសមួយទៀតរបស់ទម្រង់មុខប្រភេទនេះ គឺចង្ការដ៏ស្រួច។

ដោយសារតែទម្រង់មុខប្រភេទនេះ មានទំហំថ្ពាល់វែង និងធំ ដូចនេះយើងគួរតែជ្រើសរើសម៉ូដសក់ដែលមានចំហៀងវែងល្មម និងក្រាស់ ដើម្បីជួយឲ្យមានតុល្យភាពប្រវែង និងទំហំរវាង ថ្ងាស់ និងថ្ពាល់របស់យើង។

ម៉ូដសក់មួយចំនួន ដែលសក្តិសមនឹងទម្រង់មុខរាងដូចគ្រាប់ពេជ្រ

អានបន្ត

Like 3146

អាថ៌កំបាំង ឬការបំផុសគំនិត នៅពីក្រោយការឌីហ្សាញ Logo របស់ម៉ូដសំលៀកបំពាក់ម៉ាកល្បីៗទាំង ១០

សំលៀកបំពាក់

07/03/2016

នៅក្នុងពិភពម៉ូដសំលៀកបំពាក់ គឺមានក្រុមហ៊ុនជាច្រើនដែលបង្កើតនូវសំលៀកបំពាក់ និងគ្រឿងអលង្ការផ្សេងៗជាច្រើន ហើយក្នុងនោះផងដែរ មានក្រុមហ៊ុនមួយចំនួនដែលមានឈ្មោះល្បីល្បាញទូទាំងពិភពលោក។ ក្រុមហ៊ុនទាំងអស់គឺសុទ្ធតែមាន Logo រៀងៗខ្លួនដើម្បីបង្ហាញពីអត្តសញ្ញាណរបស់ម៉ាកយីហោរបស់ពួកគេ និងដើម្បីឲ្យមនុស្ស ឬអតិថិជនរបស់ពួកគេ ងាយស្រួលសំគាល់ពីផលិតផលរបស់ពួកគេ។ យ៉ាងណាមិញ ការឌីហ្សាញ Logo របស់ម៉ាកនីមួយៗ គឺមានអត្ថន័យខុសៗគ្នា ទៅតាមផលិតផល និងសេវាកម្មដែលពួកគេផ្ដល់ឲ្យអតិថិជនរបស់ពួកគេ ហើយអ្វីដែលបំផុសគំនិត ឬអ្វីដែលជំរុញឲ្យពួកគេជ្រើសយកការឌីហ្សាញរបស់ Logo ពួកគេគឺមានមកពីប្រភពផ្សេងៗគ្នា។ ក្នុងអត្ថបទនេះ ពួកខ្ញុំនឹងធ្វើការរៀបរាប់អំពីអ្វីដែលជាការបំផុសគំនិតដល់ការឌីហ្សាញ Logo របស់ម៉ាកទាំង 10 ដែលល្បីល្បាញទូទាំងពិភពលោក។

Louis Vuitton – Monogram

រូបឌីហ្សាញជាពុម្ពរបស់ Louis Vuitton ត្រូវបានណែនាំ និងឌីហ្សាញដោយកូនប្រុសរបស់លោក Louis ឈ្មោះ Georges Vuitton។ រូបភាពពុម្ពនោះគឺត្រូវបានឌីហ្សាញយោងតាមរូបគំនូររបស់ផ្កាម្យ៉ាងនៅប្រទេសជប៉ុន ហើយគោលបំណងចម្បងដំបូងបំផុតរបស់រូបពុម្ពនេះ គឺដើម្បីទប់ស្កាត់ការក្លែងបន្លំផលិតផលរបស់ពួកគេ ដោយក្រុមហ៊ុន Parisian ដែលផលិតកាតាបដាក់ឥវ៉ាន់ ហើយរូបពុម្ពរបស់ Louis Vuitton នេះគឺជាស្លាកសញ្ញាដំបូងបង្អស់មួយក្នុងចំណោមស្លាកសញ្ញាមួយចំនួននៅក្នុងពិភពម៉ូដសំលៀកបំពាក់។ Pattern របស់រូបពុម្ពដែលមានពណ៌ត្នោត និងត្នោតខ្ចី គឺត្រូវបានគេស្គាល់ថា Damier ជាភាសាបារាំង ឬ Checkerboard ជាអង់គ្លេស។

Chanel – ការដាក់ភ្ជាប់គ្នារវាងអក្សរ “C” ទាំងពីរ (Interlocking C’s)

Logo របស់ Chanel គឺត្រូវបានឌីហ្សាញដោយ Coco Chanel ខ្លួនគាត់ផ្ទាល់តាំងពីឆ្នាំ ១៩២៥ ហើយនៅមិនទាន់មានផ្លាស់ប្តូរអ្វីឡើយមកទល់បច្ចុប្បន្ននេះ។ មានរឿងមួយដំណាលថា ការឌីហ្សាញ Logo របស់ម៉ាក Chanel នេះគឺត្រូវបានបំផុសគំនិតតាមអក្សរ “C” ពីរជាប់គ្នានៅលើបង្អួចកញ្ចក់នៅឯវិហារ Aubazine ដែលជាវិហារដែល Coco Chanel ខ្លួនគាត់ផ្ទាល់ធ្លាប់ស្នាក់នៅកាលពីគាត់នៅជាកុមារកំព្រា។

Gucci – ការដាក់ភ្ជាប់គ្នារវាងអក្សរ “G” ទាំងពីរ

វាជាការពិតណាស់ Logo របស់ Gucci គឺជាអក្សរដំបូងរបស់ស្ថាបនិករបស់ Gucci ផ្ទាល់ ដែលគាត់មានឈ្មោះថា Guccio Gucci ហើយ Logo នេះគឺត្រូវបានឌីហ្សាញដោយកូនប្រុសរបស់គាត់ឈ្មោះ Aldo កាលពីឆ្នាំ ១៩៩៣។ យើងមើលឃើញផ្ទាល់ហើយថា ការឌីហ្សាញ Logo របស់ Gucci គឺមានលក្ខណៈស្រដៀងគ្នាទៅនឹង Logo របស់ Chanel ក៏ប៉ុន្តែទោះជាយ៉ាងណា យើងនៅមិនទាន់ឃើញមានវិវាទ ឬ ជម្លោះទាក់ទងនឹងការឌីហ្សាញស្រដៀងគ្នានេះរវាងក្រុមហ៊ុនទាំងពីរនោះទេ។

The Hermés – រូបភាពរទេះសេះរាជវង្ស (Carriage)

Hermés ចាប់ផ្ដើមឡើងជាកន្លែងបង្កើតរទេះសេះ និងរបស់បំពាក់លើសេះ ដ៏តូចមួយនៅឯទីក្រុងប៉ារីស ដែលផ្ដោតសំខាន់ទៅលើការបម្រើដល់មន្រ្តី និងពួកត្រកូលអភិជនធំៗនៅអឺរ៉ុប ដើម្បីបង្កើតរទេះសេះ និងគ្រឿងបំពាក់លើសេះប្រណីតៗ។ Logo របស់ Hermés គឺជារូបរទេះសេះរបស់រាជវង្ស និងសេះ ហើយនិង font អក្សរឈ្មោះ Memphis ដែលត្រូវបានឌីហ្សាញផ្ទាល់ដោយលោក Dr. Rudolf Wolf នៅឆ្នាំ ១៩២៩។

Versace – រូបភាពក្បាលរបស់ Medusa (Medusa’s Head)

ទោះពីមុនយើងគិតថារូបភាពក្បាលរបស់ Medusa គឺជារូបភាពដែលមិនសូវគួរឲ្យចាប់អារម្មណ៍ ក៏ប៉ុន្តែគឺនៅពេលដែលនាងបានប្រែកាយទៅជាបិសាចក្បាលពោះដោយព្រះ Athena នោះទេ ដែលលោក Gianni Versace បានគិតដល់នៅពេលដែលលោកធ្វើការឌីហ្សាញ Logo របស់ម៉ាក Versace កាលពីឆ្នាំ ១៩៧៨។ រូបភាពក្បាលរបស់ Medusa នេះបានក្លាយទៅជារូបតំណាងមួយនៅក្នុងពិភពម៉ូដសំលៀកបំពាក់ ដោយវាតំណាងឲ្យ អាជ្ញាធរមាន ភាពទាក់ទាញ និងភាពគួរឲ្យចាប់អារម្មណ៍ ដែលជាគុណលក្ខណៈទាំងបីរបស់ Medusa។

Ralph Lauren’s Polo Player – រូបអ្នកលេងកីឡា Polo

កាលពីឆ្នាំ ១៩៧០, Ralph Lauren បានបង្កើតម៉ូដសំលៀកបំពាក់ឈុតសម្រាប់នារីៗ ដោយយកម៉ូដតាមម៉ូដខោអាវឈុតរបស់សុភាពបុរស ហើយវាជាលើដំបូងដែលនិមិត្តរូប Logo របស់ Polo បានចេញមកជាសាធារណៈ (ហើយពីរឆ្នាំក្រោយ អាវម៉ាក Polo របស់មនុស្សប្រុសបានចេញមកម្ដង)។ ដើម្បីយល់ឲ្យច្បាស់ពីរូប Logo របស់ម៉ាក Polo នេះ យើងត្រូវដឹងឲ្យច្បាស់ថាហេតុអ្វីបានជាលោក Ralph Lifshitz ជ្រើសរើសយកឈ្មោះ Polo ធ្វើជាម៉ាកខោអាវរបស់គាត់។ សម្រាប់គាត់ផ្ទាល់ គាត់ចាប់អារម្មណ៍ទៅលើការលើកស្ទួយនូវរបៀបរស់នៅទាន់សម័យ និងកីឡា Polo ដែលតំណាងឲ្យភាពឆើតឆាយ និងស្ទីលទាន់សម័យ។

The Rolex – រូបម្កុដ (Crown)

និមិត្តរូប Logo របស់ Rolex គឺត្រូវបានឌីហ្សាញឡើងយោងតាមពាក្យស្លោករបស់ពួកគេ “A Crown for Every Achievement” ដែលត្រូវបានប្រើប្រាស់តាំងពីម៉ាកនេះចេញមកដំបូងកាលពីឆ្នាំ ១៩០៣។ សម្រាប់ស្ថាបនិកទាំងពីររបស់ម៉ាក Rolex, លោក Hans Wilsdorf និងលោក Alfred Davis, ម្កុដនោះគឺតំណាងឲ្យ កិត្យានុភាព ភាពជោគជ័យ និងភាពល្អឥតខ្ចោះ។

Burberry – រូបភាពមេទ័ពសេះ Prorsum (Prorsum Knight)

Logo ដែលមានរូបមេទ័ពសេះ Prorsum របស់ Burberry គឺត្រូវបានឌីហ្សាញឡើងនៅក្នុងឆ្នាំ ១៩០១។ នៅក្នុង Logo របស់ Burberry គឺមានអក្សរ “Prorsum” ជាភាសាឡាទីន ដែលមានន័យថាសម្រុកទៅមុខ ហើយមនុស្សជាច្រើនបានយល់ថា អាវក្រោះរបស់មេទ័ពសេះក្នុង Logo នេះគឺឆ្លុះបញ្ចាំងពីគំនិតច្នៃប្រឌីត និងការបង្កើតថ្មីរបស់ក្រុមហ៊ុនផ្ទាល់ទៅលើអាវធំខាងក្រៅ។

Paul Smith – ឈ្មោះម៉ាកជាហត្ថលេខា (Signature)

Logo ដែលជាហត្ថលេខារបស់ម៉ាក Paul Smith ដែលពួកយើងឃើញគ្រប់ទីកន្លែងនេះ តាមការពិតទៅគឺវាមិនមានជាហត្ថលេខាផ្ទាល់របស់លោក Paul Smith នោះទេ តែវាត្រូវបានឌីហ្សាញឡើងដោយលោក Zena Marsh ដែលត្រូវជាមិត្តភ័ក្តិរបស់លោក Smith ហើយគាត់បានឌីហ្សាញវាឡើងនៅក្នុងទស្សវ័ត្តន៍ទី 70 នៅពេលដែលគាត់កំពុងធ្វើការនៅហាងខោអាវគាត់មួយនៅឯស្រុកកំណើតរបស់គាត់នៅ Nottingham Byard Lane។ logo ហត្ថលេខានេះតាមពិតទៅត្រូវបានឌីហ្សាញឡើងជានិមិត្តរូប និងមិនមានន័យបង្កប់អ្វីច្រើនឡើយ ក៏ប៉ុន្តែការឌីហ្សាញនេះគឺមានភាសាមញ្ញបំផុត។ ហើយ logo ហត្ថលេខានេះត្រូវបានធ្វើឲ្យជិតៗគ្នាជាងមុនបន្តិចនៅឆ្នាំ ១៩៨០ នៅពេលដែល Smith បើកហាងដំបូងរបស់គាត់នៅឯទីក្រុងឡុង (London)។

Prada – រូបខ្សែព័ទ្ធជុំវិញ (Rope Emblem)

ទោះបីក្រុមហ៊ុន Prada តែងតែប្រើឈ្មោះរបស់ពួកគេផ្ទាល់សម្រាប់ធ្វើជាម៉ាកនៅលើផលិតផលជាច្រើន ពួកគេក៏មាននិមិត្តរូប logo របស់ម៉ាកពួកគេ ដែលមានបង្កប់ន័យយ៉ាងជ្រាលជ្រៅផងដែរ។ រូបឌីហ្សាញជាខ្សែពួរនៅជុំវិញអក្សរ Prada នោះគឺត្រូវបានឌីហ្សាញនៅពេលដែល Italian House ត្រូវបានតែងតាំងឲ្យទៅជាអ្នកផ្គត់ផ្គង់ជាផ្លូវការឲ្យរាជវាំងរបស់ប្រទេសអុីតាលីនៅឆ្នាំ ១៩១៩ ដែលអនុញ្ញាតឲ្យពួកគេប្រើប្រាស់អាវក្រោះនៅឯ Savoy (House of Savoy’s coat of arms) ដែលជាកន្លែងមួយនៅប៉ែកអាស៊ីអាគ្នេយ៍នៃប្រទេសបារាំង ជាប់ព្រំប្រទល់នឹងប្រទេសអុីតាលី។

អានបន្ត

fashion Tag Archive

ការឈឺឆ្អឹងខ្នង និងចង្កេះ

ការឈឺពើត ឬស្ពឹកនៅត្រង់ភ្លៅ

ការឈឺចុកចាប់នៅត្រង់ពោះ

វាអាចធ្វើឲ្យយើងសន្លប់បាន!

ពណ៌ទឹកក្រូច

ពណ៌ស្វាយ

ពណ៌ក្រហម

ពណ៌លឿង

ពណ៌ខៀវ

ពណ៌បៃតង

1. Dress Watch

2. Field Watch

3. Aviator Watch

4. Dive Watch

5. Racing Watch

1. ជ្រើសរើសសំលៀកបំពាក់ ដែលមានសមាមាត្រល្អ

2. ជ្រើសរើសសំលៀកបំពាក់ ដែលមានទំហំសមនឹងរាងរបស់អ្នក

3. ស្លៀកសំលៀកបំពាក់ ដែលមានពណ៌ស្រដៀងគ្នាពីក្បាលដល់ចុងជើង

1. AIFA Roll

2. Basic Roll

3. High Roll

4. Master Roll

5. The Garter/Band Roll

Louis Vuitton – Monogram

Chanel – ការដាក់ភ្ជាប់គ្នារវាងអក្សរ “C” ទាំងពីរ (Interlocking C’s)

Gucci – ការដាក់ភ្ជាប់គ្នារវាងអក្សរ “G” ទាំងពីរ

The Hermés – រូបភាពរទេះសេះរាជវង្ស (Carriage)

Versace – រូបភាពក្បាលរបស់ Medusa (Medusa’s Head)

Ralph Lauren’s Polo Player – រូបអ្នកលេងកីឡា Polo

The Rolex – រូបម្កុដ (Crown)

Burberry – រូបភាពមេទ័ពសេះ Prorsum (Prorsum Knight)

Paul Smith – ឈ្មោះម៉ាកជាហត្ថលេខា (Signature)

Prada – រូបខ្សែព័ទ្ធជុំវិញ (Rope Emblem)

បណ្ដាញសង្គម

ផ្សេងៗ

fashion
Tag Archive