ការមួលដៃអាវ (អាវក្រណាត់) គឺមានច្រើនរបៀប ហើយហេតុផល ដែលសុភាពបុរសទាំងឡាយមួលដៃអាវរបស់ពួកគេឡើង គឺដើម្បីភាពងាយស្រួលក្នុងការធ្វើការមួយចំនួន។ អ្នកត្រូវចាំថា អ្នកមិនគួរមួលដៃអាវនៅក្នុងកម្មវិធីផ្លូវការធំៗនោះឡើយ ដោយឡែកអ្នកអាចមួលដៃអាវរបស់អ្នកបានតាមកាលៈទេសៈមួយចំនួន នៅពេលដែលអ្នកនៅក្រៅជាមួយមិត្តភក្តិ ឬគ្រួសារ នៅទីកន្លែងធម្មតា ដូចជាហាងកាហ្វេ ឬនៅផ្ទះជាដើម។ ខាងក្រោមនេះ គឺជារបៀបមួលដៃអាវ 5 របៀប ដែលពេញនិយមសម្រាប់សុភាពបុរសទាំងឡាយ។
1. AIFA Roll
របៀបមួលដៃអាវ 2 តង់ឡើងមកលើ គឺគេហៅថា AIFA roll ។ ចំពោះរបៀបមួលដៃអាវប្រភេទនេះ អ្នកមួលដៃអាវរបស់អ្នក 2 តង់ឡើងមកលើត្រឹមកំភួនដៃរបស់អ្នក។ ការមួលដៃអាវរបៀបនេះវាអាចនឹងឆាប់របូតមកវិញ បើសិនជាដៃអាវរបស់អ្នករៀងធំខ្លាំង។
2. Basic Roll
Basic roll គឺជារបៀបមួលដៃអាវ 3 តង់មកត្រឹមកែងដៃ ឬក្រោមកែងដៃបន្តិច។ របៀបមួលដៃប្រភេទនេះ គឺមានភាពសាមញ្ញ និងពេញនិយមបំផុតសម្រាប់សុភាពបុរសទាំងឡាយ ដែលពាក់អាវក្រណាត់ ហើយចង់មួលដៃអាវ។ វារៀងជាប់បានយូរជាង AIFA roll បន្តិច។
3. High Roll
High roll គឺជារបៀបមួលដៃអាវពីលើ basic roll ថែមមួយតង់ទៀត និយាយឲ្យខ្លី គឺការមួលដៃអាវ 4 តង់រហូតដល់ពាក់កណ្ដាលដើមដៃរបស់អ្នក។ ប្រសិនជាអ្នកមានរូបសាក់នៅដើមដៃ ហើយអ្នកចង់បង្ហាញឲ្យអ្នកដទៃឃើញ អ្នកអាចប្រើរបៀបមួលដៃអាវប្រភេទនេះបាន។
4. Master Roll
ចំពោះរបៀបមួលដៃអាវ Master roll ឬក៏អាចហៅបានឈ្មោះជាច្រើនទៀត ដំបូងអ្នកមួលដៃអាវឡើងមួយតង់ដោយទាញកដៃអាវអ្នកពន្លាត់ឡើងប្រវែងវែងល្មម រួចទាញផ្នែកខាងក្នុងនៃដៃអាវរបស់អ្នកមួលឡើងពីលើកដៃអាវរបស់អ្នក។ របៀបមួលដៃអាវប្រភេទនេះ គឺល្អបំផុតប្រសិនបើអាវរបស់អ្នកមានកដៃអាវពណ៌ផ្សេងពីពណ៌អាវរបស់អ្នក ព្រោះថាអ្នកផ្សេងអាចមើលឃើញពណ៌កដៃអាវនោះបាន ហើយក៏បង្ហាញនូវស្ទីលដ៏ឡូយផងដែរ។
5. The Garter/Band Roll
ចុងក្រោយគេ របៀបមួលដៃអាវ Garter/Band roll គឺអ្នកប្រើខ្សែក្រវ៉ាត់ដៃអាវ (Garter) ឬកៅស៊ូមកចង់ពីលើដៃអាវ រួចទាញវាឡើងមកត្រឹមដើមដៃ។ ខ្សែក្រវ៉ាត់ដៃអាវនោះនឹងគៀបដៃអាវរបស់អ្នកជាប់ជាមួយនឹងដៃរបស់អ្នកមិនឲ្យវារបូតចុះមកក្រោមវិញនោះទេ។ របៀបមួលដៃអាវប្រភេទនេះ គឺត្រូវបាននិយមប្រើដោយអ្នកលេងឧបករណ៍តន្ត្រី និងអ្នកធ្វើការខាងឌីហ្សាញ ឬគូរប្លង់នានាជាដើម។
តើអ្នកចូលចិត្តរបៀបមួលដៃអាវតាមវិធីណាខាងលើ? បើអ្នកមានវិធីមួលដៃអាវថ្មីផ្សេងពីនេះ អ្នកអាចចែករំលែកវិធីសាស្ត្ររបស់អ្នកនៅក្នុងកន្លែងបញ្ចេញមតិនៅខាងក្រោមបាន។