ជម្ងឺក្រពះ ឬបញ្ហាប្រព័ន្ធរំលាយអាហារ គឺជាអ្វីដែលមនុស្សភាគច្រើនមិនចង់មានបទពិសោធជាមួយ ពីព្រោះអ្នកត្រូវការប្រើប្រាស់វាជារៀងរាល់ថ្ងៃ។ ហើយដើម្បីការពារមិនមានជម្ងឺក្រពះ ឬបញ្ហាប្រព័ន្ធរំលាយអាហារ គឺការជ្រើសរើសអាហារមកទទួលទានដោយភាពឆ្លាតវៃ។ ខ្ញុំបានរៀបរាប់នៅក្នុងអត្ថបទមួយទៀតអំពី អាហារដែលអ្នក “មិនគួរ” ទទួលទានដើម្បីកុំឲ្យប្រព័ន្ធរំលាយអាហាររបស់អ្នកមានបញ្ហា ហើយក្នុងអត្ថបទនេះផ្ទាល់ខ្ញុំនឹងធ្វើការរៀបរាប់ពីអាហារដែលអ្នក “គួរ” ទទួលទានដើម្បីជំនួយដល់ប្រព័ន្ធរំលាយអាហាររបស់អ្នក។
1. សាច់គ្មានខ្លាញ់
វាជារឿងសំខាន់ណាស់ ដែលអ្នកត្រូវទទួលទានប្រូតេអីនចូលក្នុងខ្លួនរបស់អ្នកជាប្រចាំដើម្បីការលូតលាស់ល្អ ហើយប្រូតេអីនភាគច្រើនគឺមាននៅក្នុងសាច់ តែយើងបាននិយាយពីផលប៉ះពាល់របស់សាច់ក្រហម (សាច់គោ សាច់ជ្រូក…) ដែលមានជាប់ជាតិខ្លាញ់ច្រើនលើប្រព័ន្ធរំលាយអាហារនៅក្នុងអត្ថបទមួយទៀត បើអញ្ចឹងអ្នកគួរធ្វើយ៉ាងដូចម្ដេច។ ដើម្បីរក្សារសុខភាពប្រព័ន្ធរំលាយអាហារ និងធ្វើឲ្យវាមានដំណើរការល្អ ហើយនិងដើម្បីទទួលទានប្រូតេអី៊នផងដែរនោះ អ្នកគួរពិសារសាច់ដែលមិនសូវមាន ឬគ្មានជាតិខ្លាញ់ ដូចជាសាច់មាន់ និងសាច់ត្រីជាដើម ជាជាងទទួលទានសាច់ក្រហមដូចជាសាច់គោ និងសាច់ជ្រូក ព្រោះសាច់ទាំងនោះ វាមានភាពងាយស្រួលក្នុងការរំលាយសម្រាប់អ្នកខ្លះ។
2. គ្រាប់ធញ្ញជាតិដែលមានជាតិស្ករទាប
យើងទាំងអស់គ្នាដឹងស្រាប់ហើយថា គ្រាប់ធញ្ញជាតិភាគច្រើនផ្ដល់អត្ថប្រយោជន៍ដល់រាងកាយយើងយ៉ាងច្រើនជាមួយនឹងសារជាតិបំប៉នដ៏សម្បូរបែបរបស់វា។ ហើយបន្ថែមពីលើការផ្ដល់នូវសារជាតិបំប៉នទាំងនោះ អាហារដែលមិនសូវមានជាតិ កាបូនអ៊ីដ្រាត ដូចជាគ្រាប់ធញ្ញជាតិដែលមានជាតិស្ករទាប (ស្រូវ ឬអង្ករ ជាដើម) អាចជួយសម្រួលដល់ការរំលាយអាហាររបស់អ្នកបានយ៉ាងល្អ។ អ្នកគួរតែទទួលទានអាហារដែលធ្វើពីគ្រាប់ធញ្ញជាតិមានជាតិស្ករតិចទាំងនោះ ដូចជា បាយ នំប័ុងស្រូវសាឡី ជាដើម ដើម្បីទទួលបាននូវជាតិកាបូនអ៊ីដ្រាតសមល្មម ដោយមិនធ្វើឲ្យប្រព័ន្ធរំលាយអាហាររបស់អ្នកមានបញ្ហា។
3. បន្លែបៃតងដែលចម្អិនហើយ
បន្លែបៃតង ជាធម្មតា គឺជាអាហារដ៏សំខាន់ ដែលជំនួយដល់សុខភាពរបស់អ្នក ជាមួយនឹងសារជាតិបំប៉នដ៏សម្បូរបែបរបស់វា។ ក៏ប៉ុន្តែ បន្លែមួយអាចមានភាពរឹងខ្លាំងនៅពេលដែលអ្នកទទួលទានវាឆៅ ដែលជាហេតុបណ្ដាលឲ្យមានបញ្ហាដល់ក្រពះក្នុងការធ្វើការរំលាយវា។ ដើម្បីធ្វើឲ្យវាទន់ និងបំបែកសារជាតិបំប៉នទាំងនោះ ដើម្បីឲ្យក្រពះរបស់អ្នកមានភាពងាយស្រួលក្នុងការរំលាយ អ្នកគួរតែចម្អិនវាជាមុនសិន។ អ្នកក៏អាចទទួលបានរសជាតិដ៏ឆ្ងាញ់បន្ថែមផងដែរ ដោយការដាក់បន្ថែមនូវគ្រឿងផ្សំពីលើនៅពេលចម្អិន។
4. ទឹកដោះគោជូរ ឬយ៉ាអួ
ទឹកដោះគោជូរ ឬយ៉ាអួ មានលក្ខណៈទន់ស្អិត ដែលងាយសម្រាប់ក្រពះធ្វើការរំលាយ។ ទឹកដោះគោជូរភាគច្រើនមានផ្ទុកនូវពពួកបាក់តេរីមានប្រយោជន៍ ដែលអាចទៅជំនួសបាក់តេរីដែលមាននៅក្នុងប្រព័ន្ធរំលាយអាហារផ្ទាល់បាន។ អ្នកអាចដឹងបានថាទឹកដោះគោជូរដែលអ្នកញ្ញាំុមានផ្ទុកនូវពពួកបាក់តេរីមានប្រយោជន៍ទាំងនោះបាន ដោយធ្វើការឆែកមើលនៅលើកំប៉ុងរបស់យ៉ាអួនោះថាតើវាមានដាក់សញ្ញា “Live and active cultures” ឬក៏អត់។
ទឹកដោះគោជូរ ឬយ៉ាអួ ផ្ដល់ផលប្រយោជន៍ដល់ប្រព័ន្ធរំលាយអាហារ ទោះបីជាវាជាផលិតផលដែលធ្វើពីទឹកដោះគោ (dairy products) ដែលធ្វើឲ្យមនុស្សភាគច្រើនមានបញ្ហាក្នុងការរំលាយ។ វាគឺដោយសារតែ ទឹកដោះគោជូរ ឬយ៉ាអួនេះ មានផ្ទុកនូវអង់ស៊ីម Lactose ដែលជាអង់ស៊ីមជួយដល់ក្រពះក្នុងការរំលាយម៉ូលេគុល lactose ដែលជាម៉ូលេគុលបណ្ដាលឲ្យមានបញ្ហាក្នុងការរំលាយអាហារ ចំពោះអ្នកដែលមិនទម្លាប់ជាមួយនឹងផលិតផលទឹកដោះគោ។