ដូចទៅតាមកាលវិភាគដែលខ្លួនបានកំណត់ នៅពេលនេះក្រុមហ៊ុន Xiaomi បានបញ្ចេញទូរស័ព្ទជំនាន់ក្រោយរបស់ខ្លួនគឺ Xiaomi Mi 5s និង Mi 5s Plus ជាផ្លូវការហើយ ។
Mi 5s មានតួខ្លួនអាលុយមីញ៉ូមដែលផ្ទៃខាងក្រោយមានរាងកោងទាំងសងខាងដូចទៅនិង S7 edge អញ្ចឹង ហើយខ្សែអង់តែនទាំងខាងលើនិងខាងក្រោមគឺស្រដៀងទៅនិងខ្សែអង់តែនរបស់ iPhone ផងដែរ ។ វាមានកាមេរ៉ាក្រោយថ្មីទំហំ 12 megapixel ដែលប្រើប្រាស់ sensor របស់ Sony IMX378 និងមាន aperture ទំហំ F/2.0 រីឯកាមេរ៉ាមុខមានទំហំ 4 megapixel ដែលមាន pixel ទំហំ 2μm និង aperture ទំហំ F/2.0 ។ អេក្រង់របស់វាមានទំហំ 5.15 អ៊ីញ FHD (1920×1080) ជាប្រភេទ IPS-LCD ដែលមានពន្លឺខ្ពស់បំផុតដល់ទៅ 600nits និង contrast 1500:1 ឯណោះ ។
ផ្នែកខាងក្នុងរបស់វាមានបំពាក់ដូចជា បន្ទះឈីប Snapdragon 821, Ram ទំហំ 3GB ឬ 4GB, អង្គផ្ទូកទិន្នន័យ 64GB ឬ 128GB ។ វាមាន Bluetooth 4.2, Wifi dual-band MU-MIMO 802.11ac និង NFC លើសពីនេះទៅទៀត វាក៏មានថាមពលថ្ម 3200mAh អមជាមួយបច្ចេកវិទ្យាសាកថ្មរហ័ស QuickCharge 3.0 តាមរយៈរន្ធដោតសាក USB Type-C ផងដែរ ។ អ្វីដែលថ្មីបំផុតរបស់ស្មាតហ្វូនទាំងពីរនេះគឺ ឧបករណ៍ស្កេនស្នាមម្រាមដៃ ultrasonic fingerprint ដែលជាបច្ចេកវិទ្យា Sense ID របស់ក្រុមហ៊ុន Qualcomm ដែលវាមានសមត្ថភាពអាចស្កេនម្រាមដៃរបស់អ្នកទោះបីជា សើម, មានជាតិខ្លាញ់, ប្រឡាក់ក៏ដោយ។
បើនិយាយពី Mi 5s Plus វិញគឺមានភាពខុសគ្នាខ្លះៗតែប៉ុណ្ណោះ ។ វាបានបំពាក់កាមេរ៉ាភ្លោះទំហំ 13 megapixel ដែលមួយមានសមត្ថភាពថតរូបភាពជាលក្ខណៈពណ៌ និងមួយទៀតថតជាលក្ខណៈសខ្មៅ ហើយវាមានអេក្រង់ទំហំ 5.7 អ៊ីញ FHD (1920×1080) ។ វាក៏បង្កើន Ram, អង្គផ្ទូកទិន្នន័យ, ថាមពលថ្មផងដែរគឺ 4GB/64GB, 6GB/128GB និង 3800mAh ចំនែកឯឧបករណ៍ស្កេនស្នាមម្រាមដៃគឺស្ថិតនៅផ្នែកខាងក្រោយវិញផ្ទុយពី Mi 5s ។
Mi 5s មានតម្លៃ 299$ សំរាប់ម៉ូដែល 3GB/64GB និង 344$ សំរាប់ម៉ូដែល 4GB/128GB Mi 5s Plus មានតម្លៃ 344$ សំរាប់ម៉ូដែល 4GB/64GB និង 389$ សំរាប់ម៉ូដែល 6GB/128GB ។ ស្មាតហ្វូនទាំងពីរម៉ូដែលមានពណ៌ដូចជា ប្រផេះ, មាស, ទឹកប្រាក់ និងផ្កាឈូក ហើយនឹងចេញលក់នៅថ្ងៃទី 29 ខែកញ្ញា សំរាប់តែប្រទេសចិនតែប៉ុណ្ណោះ ។