តើអ្នកទាំងអស់គ្នាមានធ្លាប់ឆ្ងល់ដែលទេថា ហេតុអ្វីនៅពេលដែលយើងទៅពិនិត្យសុខភាពម្តងៗ គ្រូពេទ្យតែងធ្វើការឆ្លុះមើលអណ្តាលរបស់យើង? ទាំងអស់នេះគឺដោយសារតែ សភាពអណ្តាតរបស់មនុស្សម្នាក់ៗមិនដូចគ្នានោះទេ ដែលការពិនិត្យមើលនៅត្រង់អណ្តាតនេះអាចឲ្យយើងដឹងពីបញ្ហាសុខភាពរបស់យើងបាន។ ទាំងរូបរាង ពណ៌សម្បូរ និងសញ្ញារមួយចំនួននៅលើអណ្តាតសុទ្ធតែអាចបញ្ជាក់ពីដែលទាក់ទងទៅនឹងប្រព័ន្ធរំលាយអាហារ និងអតុល្យភាពរាងកាយរបស់យើងបាន។

រូបភាពពីគេហទំព័រ health.com

គែមនៃសងខាងអណ្តាតមានសភាពជ្រួញ ឬអង្កាញ់

ប្រសិនបើមានគែមនៃអណ្តាតរបស់យើងមានសភាពជ្រួញ ឬអង្កាញ់ វាអាចមានន័យថាអណ្តាតរបស់យើងគឺកំពុងតែហើម។ ការហើមនេះហើយ ដែលបណ្តាលឱ្យវាទៅប៉ះទង្គេច និងផ្អឹបជាមួយនឹងធ្មេញ ដែលជាហេតុធ្វើឲ្យវាមានសភាពជ្រួញ ឬអង្កាញ់បែបនេះ។ មូលហេតុនៅពីក្រោយអាការនេះគឺអាចបណ្តាលមកពី បញ្ហាមិនប្រក្រតីមួយចំនួននៅក្នុងខ្លួនរបស់យើង ដូចជាអាឡែស៊ី បញ្ហាក្រពេញទីរ៉ូអ៊ីត ជំងឺគ្រុនក្តៅ ឬកង្វះជាតិទឹកជាដើម។ ដូចនេះអ្នកគួរតែណាត់ជួបជាមួយនឹងវិជ្ជបណ្ឌិត ដើម្បីស្វែងរកដំណោះស្រាយបញ្ហាសុខភាពរបស់អ្នកឲ្យបានឆាប់រហ័ស។

រូបភាពពីគេហទំព័រ health.com

មានផ្សឹតពណ៌ស លឿង ឬខ្មៅ យ៉ាងច្រើននៅលើអណ្តាត

ការកើតមាននូវផ្សឹតពណ៌ស ឬលឿងយ៉ាងច្រើននៅលើអណ្តាតដែលខ្មែរយើងតែងហៅថា កើតច្រាំងអណ្តានោះ ជាធម្មតាវាតែងកើតមានឡើងនៅលើកុមារ ឬទារកតូចៗ និងសម្រាប់អ្នកដែលពាក់ធ្មេញក្លែងក្លាយតែប៉ុណ្ណោះ មូលហេតុគឺដោយសារពួកគេទាំងនោះមានប្រព័ន្ធការពារសារពាង្គកាយខ្សោយ ឬក៏ពួកគេអាចកំពុងតែប្រើប្រាស់នូវថ្នាំអង់ទីបយ៉ូទិច។ អញ្ចឹងប្រសិនបើអ្នកកំពុងតែជួបប្រទះនូវ រោគសញ្ញាដូចខាងលើនេះអ្នកគួរតែធ្វើការណាត់ជួបជាមួយគ្រូពេទ្យដើម្បីធ្វើរោគវិនិឆ័យជាបន្ទាន់។ ចំណែកអ្នកដែលមានអណ្តាតពពេញទៅដោយផ្សឹតពណ៌ លឿង ឬខ្មៅវិញ មូលហេតុគឺដោយសារពួកគេទាំងនោះមានកង្វះខាតក្នុងថែរក្សារសុខភាពមាត់ធ្មេញ ពោលគឺពួកគេមិនមានទម្លាប់ដុះធ្មេញ និងកោសអណ្តាតទេ។

រូបភាពពីគេហទំព័រ health.com

រូបភាពពីគេហទំព័រ health.com

អណ្តាតដែលមានពណ៌ផ្កាឈូក ជាមួយនឹងគ្រាប់សាច់តូចៗបន្តិចបន្តួច

វាជារឿងមួយដែលល្អ ប្រសិនបើអណ្តាតរបស់អ្នកមានពណ៌ផ្កាឈូក ជាមួយនឹងគ្រាប់សាច់តូចៗបន្តិចបន្តួច ដោយគ្រាប់សាច់តូចៗទាំងនោះគឺមិនមែនជាងពោងបែកនោះទេ វាគឺជាប្រភេទដុំសាច់មានប្រយោជន៍មានឈ្មោះហៅថា papillae។ papillae ដើរតួនាទីយ៉ាងសំខាន់ក្នុងការរំគិលចំណីអាហារ ដើម្បីធ្វើឲ្យយើងមានភាពងាយស្រួលក្នុងការលេប។ ម៉្យាងទៀត នៅលើ papillae ក៏មានក្រពេញរសជាតិ ដែលក្រពេញទាំងអស់នោះជាអ្នកគ្រប់គ្រង និងផ្តល់រសជាតិរបស់គ្រប់ចំណីរអាហារ មិនថាសាប ប្រៃ ជូរ ល្វីង ឬហិលនោះឡើយ។

រូបភាពពីគេហទំព័រ health.com

អណ្តាតដែលមានស្នាមប្រះ

ស្នាមប្រះជាច្រើន ដែលកើតមានឡើងនៅលើអណ្តាតរបស់យើងអាចកើតមានឡើងទៅតាមការវិវត្តទៅរកភាពជរារបស់យើង។ ជាធម្មតាស្នាមប្រះដែលមាននៅលើអណ្តាតទាំងនេះគឺមិនមែនជារឿងធំដុំដែលគួរឲ្យភ័យក្លាចនោះទេ ពេលខ្លះវាអាចកើតចេញទម្លាប់ញ៉ាំអាហារហិលខ្លាំង ក្តៅខ្លាំង ឬទម្លាប់ប្រើប្រាស់ច្រាស់ដុះខ្លាំងៗទៅលើអណ្តាត។ មូលហេតុមួយទៀតគឺដោយសារការទទួលឥទ្ធិពលពីហ្សែនរបស់ឪពុកម្តាយ។

រូបភាពពីគេហទំព័រ health.com

កើតមានពោងបែកនៅលើអណ្តាត និងមាត់

ជាធម្មតាពោងបែកនៅក្នុងមាត់ ឬនៅលើអណ្តាតអាចកើតមានឡើងប្រសិនបើយើងខាំងត្រូវវាដោយមិនប្រយ័ត្ន ហើយពេលខ្លះពោងបែកទាំងនោះអាចវិវឌ្ឍន៍ទៅជាដំបៅផងដែរ។ មូលហេតុនៃការកើតមានពោងបែកនៅក្នុងមាត់គឺអាចកើតឡើងពីការ ក្តៅក្នុង ឬការទទួលទានចំណីរអាហារដែលមានជាតិខ្លាញ់ច្រើនផងដែរ ដូចនេះយើងគួរតែកាត់បន្ថយនូវរាល់អារម្មណ៍ស្ត្រេស ឬការទទួលទានអាហារដែលមានខ្លាញ់ ឬជាតិអាស៊ីតខ្ពស់ ព្រោះទង្វើទាំងអស់នេះនឹងបណ្តាល់ឲ្យពោងបែកកាន់តែឈឺខ្លាំង។ គួរប្រុងប្រយ័ត្ន ប្រសិនបើពោងបែកដែលមាននៅក្នុងមាត់របស់អ្នក នៅតែឈឺមិនបាត់ មានរយៈពេលលើសពីមួយខែនោះ អ្នកគួរតែទៅពិគ្រោះជាមួយនឹងគ្រូពេទ្យជាបន្ទាន់ ព្រោះពោងបែក និងដំបៅក្នុងមាត់ក៏អាចវិវត្តទៅជាជម្ងឺមហារីកបានផងដែរ។

រូបភាពពីគេហទំព័រ health.com

តើប្រិយមិត្តទាំងអស់គ្នាធ្លាប់ដឹងដែរ ឬទេថា ការប្រើប្រាស់ថ្នាំបាញ់មូស ឬធូបមូសអាចបង្ករឲ្យមានផលប៉ះពាល់យ៉ាងខ្លាំងដល់សុខភាពរបស់យើងបាន។ តែក្រៅពីជម្រើសខាងលើនេះ យើងអាចបណ្តេញពពួកសត្វមូសចង្រៃទាំងនោះមិនឲ្យមកក្បែរខ្លួនយើងបាន ជាមួយនឹងប្រភេទរុក្ខជាតិមួយចំនួនដែលងាយស្រួលដាំ មានក្លិនល្អ និងមិនប៉ះពាល់ដល់សុខភាព ដូចខាងក្រោមនេះ ៖

ស្លឹកគ្រៃ

ស្លឹកគ្រៃគឺជាគ្រឿងផ្សំចម្បងមួយ នៅក្នុងថ្នាំកំចាត់សត្វមូស ឬប្រេងលៀបមិនឲ្យមូសខាំ។ មូសនឹងមិនអាចមកខាំអ្នកទៀតបានទេ ដោយសារវានឹងគេចចេញឆ្ងាយពីទីកន្លែងដែលមានធំក្លិនស្លឹកគ្រៃ។ ដូចនេះបើសិនជាអាច យើងគួរតែដាំស្លឹកគ្រៃឲ្យបានច្រើន ឬប្រើប្រាស់ប្រភេទទៀនក្លិនស្លឹកគ្រៃនៅជុំវិញផ្ទះ ឬបន្ទប់របស់យើង ពីព្រោះពួកវាមានប្រសិទ្ធភាពក្នុងការបណ្តេញសត្វមូស ជាងប្រភេទថ្នាំមូសមួយចំនួនទៅទៀត។

រូបភាពពីគេហទំព័រ food.com

ស្លឹកជីនាងវង និងជីអង្កាម

នៅក្នុងពពួកជីនាងវង និងជីអង្កាម គឺមានផ្ទុកទៅដោយប្រភេទប្រេងម៉្យាងដែលមានសម្ថភាពអាចបណ្តេញពពួកសត្វមូសឲ្យចេញឆ្ងាយបាន។ ក្រៅពីនេះ អ្នកវិទ្យាសាស្ត្រក៏បានរកឃើញថា ប្រភេទប្រេងដែលមាននៅក្នុងជីនោះ មិនត្រឹមតែអាចបណ្តេញពួកមូសចេញឆ្ងាយតែប៉ុណ្ណោះទេ វាថែមទាំងអាចសម្លាប់ដង្គូវទឹកផងដែរ។ ដូចនេះ អ្នកទាំងអស់គ្នាគួរតែពិចារណាក្នុងការ ប្រើប្រាស់នូវស្លឹកជី ជំនួសឲ្យការប្រើប្រាស់ថ្នាំមូស ឬធូបមូស ពីព្រោះក្រៅពីមិនប៉ះពាល់ដល់សុខភាព យើងក៏អាចប្រើប្រាស់វាសម្រាប់បន្ថែមរសជាតិចំណីអាហាររបស់យើង ឲ្យកាន់តែឆ្ងុយឆ្ងាញ់ផងដែរ។

រូបភាពពីគេហទំព័រ food.com

រូបភាពពីគេហទំព័រ food.com

ផ្កាស្បៃរឿង

សម្រាប់នៅក្នុងផ្កាស្បៃរឿងក៏មានផ្ទុកទៅដោយជាតិប្រេង ដែលគេតែងយកទៅប្រើប្រាស់ក្នុងការផ្សំធ្វើថ្នាំសម្លាប់សត្វមូសផងដែរ។ ម៉្យាងវិញទៀត នៅក្នុងផ្កាស្បៃរឿងក៏ពោពេញទៅដោយក្លិន ដែលសត្វមូស និងសត្វល្អិតមួយចំនួនធំ មិនចូលចិត្តផងដែរ។ អញ្ចឹងការជ្រើសរើសយកផ្កាស្បៃរឿងមកបណ្តេញសត្វមូសក៏ជារឿងមួយល្អដែរ ពីព្រោះក្រៅពីបណ្តេញសត្វមូសមិនឲ្យនៅជិតហើយ យើងក៏អាចទុបតែងបន្ទុបរបស់យើងឲ្យមានភាពស្រស់ស្អាតផងដែរ។

រូបភាពពីគេហទំព័រ flower.com

ខ្ទឹមស

សូមអ្នកទាំងអស់គ្នាកុំយល់ច្រឡំថា ការញ៉ាំខ្ទឹមអាចជួយបណ្តេញសត្វមូសមិននៅជិតយើងបានឲ្យសោះនោះ។ តាមការពិតទៅគឺវាមិនមែនជារឿងពិតនោះទេ។ តាមអ្នកវិទ្យាសាស្ត្របានប្រាប់ឲ្យដឹងថា ការញ៉ាំខ្ទឹមពិតជាមិនមានប្រសិទ្ធភាពក្នុងការបណ្តេញសត្វមូសពិតមែន ប៉ុន្តែប្រសិនបើយើងមានខ្ទឹមនៅជិតខ្លួននោះ មូសនឹងមិនមកជិតយើងនោះទេ។ ដូចនេះក្រៅពីមានរសជាតិឆ្ងាញ់ និងផ្តល់ផលប្រយោជន៍ដល់សុខភាពទៅ ឥឡូវយើងទាំងអស់គ្នាបានដឹងហើយថា ខ្ទឹមក៏មានប្រសិទ្ធភាពក្នុងការបណ្តេញសត្វមូស ដូចទៅនឹងថ្នាំបាញ់មូស និងធូបមូសអញ្ចឹងដែរ។

រូបភាពពីគេហទំព័រ food.com

សម្រាប់រយៈពេលប៉ុន្មានឆ្នាំថ្មីៗនេះ យើងទាំងអស់គ្នាបានសង្កេតឃើញថា បញ្ហាឈឺចង្កេះបានកើតមានឡើងទៅលើមនុស្សសឹងតែគ្រប់វ័យទៅហើយ មិនថាតែមនុស្សដែលពេញវ័យ ឬចាស់ជរានោះទេ ដោយគេអាចនិយាយបានថា ក្នុងចំណោមមនុស្ស 10 គឺអាចមាន 6 ទៅ 7 នាក់កំពុងតែជួបនៅបញ្ហាមួយនេះ។ មានបញ្ហាមិនប្រក្រតីនៃរាងកាយមួយចំនួន ដែលអាចទាក់ទងទៅនឹងការឈឺចង្កេះនេះ ក្នុងនោះមានដូចជា បញ្ហាតម្រងនោម បញ្ហាសរសៃប្រាសាទ និងបញ្ហាចម្បងនោះគឺនៅត្រង់ឆ្អឹងកងរបស់យើងទាំងអស់គ្នាតែម្តង។

អញ្ចឹង តើអ្វីកត្តាអ្វីខ្លះដែលបណ្តាលឲ្យយើងទាំងអស់គ្នាជួបនូវបញ្ហាទាំងអស់នេះ?

ការទទួលរងគ្រោះថ្នាក់ចរាចរណ៍ គ្រោះថ្នាក់ដោយការអិលដួល និងការរងរបួសដោយកីឡា គឺជាមូលហេតុទូទៅបំផុតនៃការឈឺខ្នង និងចង្កេះរ៉ាំរ៉ៃ។ ប៉ុន្ដែ មានពេលខ្លះ សូម្បីតែសកម្មភាព ឬចលនាធម្មតា ដូចជាការពត់ខ្លួនអោន ដើម្បីចាប់យកវត្ថុអ្វីមួយពីដី ក៏អាចបង្កឲ្យមានការឈឺចាប់ផងដែរ។

ក្រៅពីនេះក៏មានកត្តាមួយចំនួនដែលជំរុញឲ្យយើងទាំងអស់គ្នាជួបប្រទះនូវបញ្ហានៃការឈឺខ្នង និងចង្គេះរ៉ាំរ៉ៃ នេះដូចជា៖

• ឥរិយាបថមិនសមរម្យ ឬមិនសមទំនង (កាយវិការនៃការគេង ដើរ ឈរ អង្គុយ និងការលើកដាក់របស់ធ្ងន់ៗ)
• ភាពទ្រុឌទ្រោម និងចុះខ្សោយនៃកាយសម្បទាបង្កឡើងដោយភាពអសកម្ម (មិនធ្វើលំហាត់ប្រាណ)
• ការមានទម្លាប់អង្គុយជាច្រើនម៉ោង
• បញ្ហាជំងឺមួយចំនួនដូចជាគ្រួសក្នុងតម្រងនោម ការលើសជាតិអាស៊ីត ឬខ្លាញ់ ការឆ្លងមេរោគ និងកំណកឈាម
• បញ្ហាលើសទំងន់
• បញ្ហាស្ត្រេសផ្លូវអារម្មណ៍
• ជំងឺពុកឆ្អឹង (ច្រើនកើតមាននៅលើមនុស្សចាស់ជរា)

 តើមានវិធីសាស្ត្រអ្វី ដើម្បីទប់ស្កាត់ដែរឬទេ?

• មុននឹងធ្វើសកម្មភាពកីឡា ឬលើករបស់ធ្ងន់ៗ យើងគួរធ្វើការកំដៅសាច់ដុំ និងហាត់ពត់សរសៃដៃជើងជាមុនសិន។
• ជៀសវាងសកម្មភាពពត់កោងខ្លួនខ្លាំង ដោយមិនមានទម្រ ឬឧបករណ៍ទប់ឆ្អឹងខ្នង។
• កាយវិការនៃការ គេង ដើរ ឈរ និងអង្គុយ ត្រូវតែឲ្យត្រង់ មិនកោងខ្នង។
• ប្រើប្រាស់កៅអី ឬកន្លែងអង្គុយ ដែលមានបន្ទះទប់ខ្នង និងចង្កេះឲ្យបានត្រឹមត្រូវ។
• សម្រាប់អ្នកដែលមានទម្លាប់អង្គុយជាច្រើនម៉ោង អ្នកគួរមានទម្លាប់ហាត់ពត់ឆ្អឹងខ្នង ដោយតម្រូវឲ្យយើងពើងទ្រូងទៅមុខ ផតពោះចូលក្នុង ហើយខំប្រឹងងើយក និងក្បាលរបស់យើងឡើងទៅលើត្រង់ ជាមួយនឹងស្មារក្តោបឲ្យកៀកទៅនឹងត្រចៀក ធ្វើបែបនេះវានឹងជួយតម្រង់ឆ្អឹងខ្នងរបស់យើងត្រង់ និងធូរស្បើយខ្លះពីអាការចុករោយ។
• បើសិនជាអ្នកចាំបាច់ត្រូវតែអង្គុយនោះ អ្នកគួរធ្វើការផ្លាស់ប្តូរឥរិយាបថនៃការអង្គុយឲ្យបានច្រើនរបៀប ម៉្យាងវិញទៀតការងើបដើរ និងធ្វើកាយវិការពត់ខ្លួនមួយពេលៗក៏អាចជួយកាត់បន្ថយនឹងការប្រឈមនឹងការឈឺខ្នង និងចង្កេះរ៉ាំរ៉ៃផងដែរ។
• សម្រាប់សុភាពនារីមិនគួរមានទម្លាប់ ប្រើប្រាស់ស្បែកជើងកែងគ្រប់ពេលវេលានោះទេ។
• បញ្ឈប់ទម្លាប់នៃការជក់បារី ពីព្រោះការជក់បារីនឹងកាត់បន្ថយលំហូរនៃសម្ពាធឈាមទៅផ្នែកខាងក្រោមនៃឆ្អឹងកង ហើយម៉្យាងវិញទៀតវាក៏អាចធ្វើឲ្យខូចខាតដល់ទម្រឆ្អឹងកងរបស់យើងផងដែរ។
• គ្រប់គ្រងទម្ងន់កុំឲ្យលើស។
• គួរមានទម្លាប់គេងបែរចំហៀងឲ្យត្រង់ និងគេងនៅលើពូករឹង ឬទីដែលរៀបស្មើរល្អ ព្រោះវាអាចជួយឲ្យឆ្អឹងកងរបស់យើងត្រង់បាន។
• ការទទួលទានទឹកឲ្យបានច្រើនគ្រប់គ្រាន់ អាចជួយថែរក្សារទម្រឆ្អឹងកងរបស់យើងឲ្យមានសុខភាពល្អ។
• ត្រូវចងចាំថា រាល់ពេលដែលយើងធ្វើការហាត់ប្រាណ ជាមួយនឹងការលើកទម្ងន់ដោយប្រើប្រាស់ជើង យើងត្រូវតែតម្រង់ឆ្អឹងខ្នងរបស់យើងឲ្យត្រង់ជានិច្ច។
• ការទទួលទានវីតាមីន D គ្រប់គ្រាន់អាចជួយឲ្យឆ្អឹង និងឆ្អឹងកងរបស់យើងរឹងមាំ។
• កំណត់របបអាហារឲ្យបានត្រឹមត្រូវ យើងមិនត្រូវញ៉ាំសាច់ និងខ្លាញ់ច្រើនពេកនោះទេ ព្រោះវានឹងធ្វើឲ្យយើងលើសជាតិអាស៊ីត និងខ្លាញ់បាន។