នៅពេលនេះមិនមានពាក្យចចាមអារាម ឬពត៌មានបែកធ្លាយទៀតឡើយ អំពីស្មាតហ្វូនរបស់ក្រុមហ៊ុន Google។ Google ទើបតែបានបញ្ចេញស្មាតហ្វូនដំបូងរបស់ខ្លួនកាលពីថ្មីៗនេះចំនួន 2 ម៉ូដែលមានឈ្មោះថា Pixel និង Pixel XL ។
ទូរស័ព្ទទាំងពីរនេះបានបង្កើតឡើងដោយក្រុមហ៊ុន Google ទាំងផ្នែកខាងក្នុងនិងខាងក្រៅ (ការរចនារូបរាង, ល្បឿន, កាមេរ៉ា)។ អ្នកទាំងអស់គ្នាប្រាកដជាឆ្ងល់ហើយថា តើស្មាតហ្វូនរបស់ Google ទាំង 2 នេះមានអ្វីពិសេសខ្លះ ដូច្នេះទស្សនាមើលលក្ខណៈសម្បត្តិរបស់វាជាមួយក្រុមការងារ Khmerlife.Style ទាំងអស់គ្នា។
ការឌីហ្សាញ (Design)
រូបភាពស្មាតហ្វូន Pixel
ទូរស័ព្ទទាំងពីរ ត្រូវបានធ្វើឡើងពីអាលុយមីញ៉ូមជាមួយនឹងកញ្ចក់គ្របដណ្តប់ផ្នែកខាងមុខនិងផ្នែកខាងលើនៃផ្នែកខាងក្រោយ ។ ផ្នែកកោងជំុវិញទូរស័ព្ទ ត្រូវបានរចនាឡើងអោយងាយស្រួលក្នុងការកាន់ផងដែរ។ នៅផ្នែកខាងក្រោយរបស់ Pixel ទាំងពីរមានបំពាក់ឧបករណ៍ស្កេនស្នាមម្រាមដៃ ដែល Google បានហៅវាថា Pixel Imprint។ លើសពីនេះទៅទៀត វាក៏បានបំពាក់អាវក្រោះការពារការជ្រាបទឹក និងធូលីដី IP53 ផងដែរ។
ទំហំអេក្រង់ Pixel និង Pixel XL
Google Pixel មានអេក្រង់ទំហំ 5 អ៊ីញ ដែលមាន resolution 1920 x 1080 FHD រីឯ Pixel XL វិញមានអេក្រង់ទំហំដល់ទៅ 5.5 អ៊ីញ ជាមួយនិង resolution 2560 x 1440 QHD។ ទូរស័ព្ទទាំងពីរនេះ ក៏មានអេក្រង់ប្រភេទ AMOLED រួមជាមួយការបំពាក់បន្ទះកញ្ចក់ Gorilla Glass 4 ផងដែរ។
Hardware
ក្រឡែកមើលគ្រឿងខាងក្នុងវិញម្តង ខួរក្បាលរបស់ Pixel និង Pixel XL បានបំពាក់បន្ទះឈីប Snapdragon 821 SoC ដែលជាបន្ទះឈីបដ៏មានអនុភាពមួយរបស់ក្រុមហ៊ុន Qualcomm។ វាមាន RAM ទំហំ 4GB LPDDR4 មិនតែប៉ុណ្ណោះ ទូរស័ព្ទទាំងពីរនេះនឹងមកជាមួយអង្គផ្ទុកទិន្នន័យ 32GB ឬ 128GB ប៉ុន្តែមិនអាចបន្ថែមមេម៉ូរីកាតខាងក្រៅបាននោះទេ។
វាមានតំណរភ្ជាប់ USB Type-C បំលែងទៅ Type-A រួចជាស្រេចនៅក្នុងប្រអប់។ វាអាចប្រើដើម្បីតភ្ជាប់ឧបករណ៍ជាច្រើនទៅទូរស័ព្ទ Pixel បានដើម្បីអោយអ្នកអាចផ្ទេរឯកសារពីឧបករណ៍ចាស់ទៅឧបករណ៍ថ្មីបានយ៉ាងងាយស្រួល (Pixel)។ Pixel មានថាមពលថ្ម 2770 mAh និងម៉ូដែល XL មានថាមពលថ្ម 3450 mAh ហើយមួយទៀតគឺឧបករណ៍ទាំង 2 មានរន្ធដោតកាស 3.5 mm ផងដែរ។
Software
ប្រព័ន្ធដំណើរការនិងកម្មវិធី គឺជាកត្តាដ៏សំខាន់សំរាប់ Pixel និង Pixel XL។ ពួកវានឹងដំណើរការដោយប្រព័ន្ធដំណើរការចុងក្រោយបង្អស់របស់ Google គឺ Android 7.1 Nougat។ លោកអ្នកអាចធ្វើការ ផ្ញើរសារ, ផ្តល់ទិសដៅធ្វើដំណើរ, ធ្វើការកក់ និងអ្វីៗផ្សេងជាច្រើនទៀត តាមកម្មវិធី Google Assistant បានផងដែរ។ លើសពីនេះទៅទៀតឧបករណ៍ Daydream VR អាចប្រើប្រាស់ជាមួយ Pixel និង Pixel XL បាន។
កម្មវិធី Google Assistant
កម្មវិធី Google Assistant
ឧបករណ៍ Daydream VR
កាមេរ៉ា Camera
កាមេរ៉ា Pixel
សមត្ថភាពរបស់កាមេរ៉ា គឺជាឧបករណ៍ចម្បងសម្រាប់អ្នកប្រើស្មាតហ្វូនទាំងអស់។ ហើយ Google ក៏បានបំពាក់ image sensor ប្រភេទ IMX378 របស់ក្រុមហ៊ុន Sony ដែលមានទំហំ 12.3MP និង 1.55um pixels ដើម្បីថតបានពន្លឺកាន់តែភ្លឺ។ វាមាន aperture ទំហំ f/2.0 និងមាន Phase-detection autofocus ផងដែរ។ ចំនែកកាមេរ៉ាមុខរបស់វាមានទំហំ 8MP រួមជាមួយ aperture ទំហំ f/2.4 ។
កាមេរ៉ានៅលើស្មាតហ្វូនទាំង 2 នេះត្រូវបានគ្រប់គ្រងដោយកម្មវិធីដែលមានមុខងារពិសេសជាច្រើន និងមានល្បឿនលឿនទៀតផង។ Smartburst គឺជាលក្ខណៈពិសេសថ្មីមួយដែលអនុញ្ញាតឱ្យអ្នកថតរូបជាច្រើនសន្លឹកជាប់គ្នា ហើយវានឹងជ្រើសរើសយករូបភាពណាដែលច្បាស់ និងម៉ត់បំផុត ។ ចំនែក HDR+ ក៏ត្រូវបានធ្វើអោយប្រសើរឡើងផងដែរ។
រូបភាព HDR+ ថតដោយ Google Pixel
ចំនែកការថតវីដេអូរបស់វា គឺមិនមានបច្ចេកវិទ្យាទប់លំនឹងទេ (optical image stabilization) ប៉ុន្តែ Google បានប្រើប្រាស់កម្មវិធី (stabilization) ជំនួសវិញ ដែលខ្លួនបានអះអាងថាទទួលបានលទ្ធផលល្អគួរសម ដោយពឹងផ្អែកលើ gyroscope របស់ទូរស័ព្ទដើម្បីទប់នូវលំញ័រនៃស្មាតហ្វូននេះ។
Google បានរំពឹងថាអ្នកប្រើប្រាស់ Pixel នឹងប្រើកាមេរ៉ាជាញឹកញាប់ជាមិនខាន ដូច្នេះខ្លួននឹងផ្តល់ជូនការផ្ទុកទិន្នន័យជា Cloud ដោយគ្មានដែនកំណត់ជាទំហំពេញលេញ (full resolution) ទាំងរូបថត និងវីដេអូកំរិត 4K ផងដែរ ។
តម្លៃ និងថ្ងៃចេញលក់ជាផ្លូវការ
Pixel និង Pixel XL មាន 3 ពណ៌សំរាប់ជ្រើសរើសដូចជា ខ្មៅ (Quite Black), ទឹកប្រាក់ (Very Silver), ខៀវ (Really Blue)។ សម្រាប់ការបញ្ជាទិញមុន គឺបានចាប់ផ្តើមហើយនៅឯសហរដ្ឋអាមេរិក ក្នុងតម្លៃ 650$ សម្រាប់ Pixel និង 770$ សម្រាប់ Pixel XL រីឯប្រភេទ 128GB ត្រូវបន្ថែម 100$ ពីលើទៀតសំរាប់ម៉ូដែលទាំងពីរ។
ពណ៌ទាំង 3 នៃ Pixel និង Pixel XL
ពណ៌ខ្មៅ
ពណ៌ខៀវ
ពណ៌ទឹកប្រាក់