សំរាប់អ្នកដែលចូលចិត្តញ៉ាំស្រាក្រឡុក ( Cocktail ) ឬប្រភេទភេសជ្ជៈផ្លែឈើលាយចំរុះ ឥឡូវនេះយើងអាចទទួលបាននូវភេសជ្ជៈ ដ៏ឆ្ងាញ់ទាំងអស់នេះមកទទួលទានបានដោយងាយស្រួល និងឆាប់រហ័ស ដោយយើងពុំចាំបាច់ព្រួយបារម្មណ៍ អំពីវិធីសាស្ត្រ ឬរូបមន្តនៃការលាយភេសជ្ជៈ ទាំងអស់នោះទៀតទេ។ ជាមួយនឹង Somabar យើងនឹងមានពេលវេលាកាន់តែសប្បាយរីករាយ ជាមួយនឹងមិត្តភក្តិ និងក្រុមគ្រួសារ នៅរាល់គ្រប់កម្មវិធីជប់លៀង គ្រប់ស្ថានភាព និងគ្រប់ទីកន្លែង ដោយមិនចាំបាច់មានអ្នក ជំនាញក្រឡុកស្រានោះឡើយ។

Somabar ជាប្រភេទម៉ាស៊ីនលាយស្រា  និងប្រភេទភេសជ្ជៈផ្លែឈើលាយចំរុះស្វ័យប្រវត្តិ ដោយយើងទាំងអស់គ្នា មិនចាំបាច់ដឹងអំពីរូបមន្តនៃភេសជ្ជៈ វិធីសាស្ត្រនៃការក្រឡុក ឬរង្វាស់រង្វាល់នោះទេ។ យើងអាចទទួលបានភេសជ្ជៈដែលយើងពេញចិត្ត យ៉ាងឆាប់រហ័ស ដោយគ្រាន់តែធ្វើការជ្រើសរើសប្រភេទភេសជ្ជៈ និងធ្វើការបញ្ជានៅក្នុងទូរស័ព្ទស្មាតហ្វូនរបស់យើង តាមរយៈ WiFi តែប៉ុណ្ណោះ។ ហើយរឿងដែលយើងចាំបាច់ត្រូវធ្វើបន្ទាប់ទៀតនោះគឺ ចាក់បំពេញនូវរាល់ប្រភេទស្រា ឬទឹកផ្លែឈើដែលយើងចូលចិត្ត ចូលទៅក្នុងដប់ទាំង 6 ដែលមានភ្ជាប់មកជាមួយនឹងម៉ាស៊ីននេះស្រាប់ ហើយចុងក្រោយគឺយើងអាច ធ្វើការលាយភេសជ្ជៈទាំងអស់នោះជាមួយនឹងការចុចប៊ុតុងមួយតែប៉ុណ្ណោះ។ សំរាប់រយៈពេលនៃការលាយភេសជ្ជៈនេះ គឺត្រឹមតែ 5 វិនាទីតែប៉ុណ្ណោះ គឺវារហ័សមែនទែន។ ការលាយភេសជ្ជៈចំរុះចូលគ្នា សំរាប់ Somabar គឺមិនចាំបាច់មានមុខងារក្នុងការក្រឡុកនោះទេ ម៉ាស៊ីនដ៏ឆ្លាតវ័យនេះនឹងធ្វើការលាយភេសជ្ជៈចំរុះ ទាំងនោះ តាមរយៈការកូរយ៉ាងសព្វ ដើម្បីផ្តល់នូវភេសជ្ជៈដែលត្រឹមត្រូវ និងមានរសជាតិទៅតាមរូបមន្ត។

អ្វីដែលកាន់តែអស្ចារ្យទៀតនោះគឺ ក្រៅពីជម្រើសភេសជ្ជៈលាយ ដែលយើងបានជ្រើសរើស កម្មវិធីរបស់ Somabar ដែលមាននៅក្នុងទូរស័ព្ទដៃរបស់យើង ក៏មានផ្តល់នូវជម្រើសមួយចំនួនទៀត ដែលមានគ្រឿងផ្សំពីប្រភេទភេសជ្ជៈទាំងឡាយនៅក្នុងម៉ាស៊ីននេះ ឬក៏យើងអាចបង្កើត ជារូបមន្តភេសជ្ជៈផ្ទាល់ខ្លួនដែលយើងចង់បានផងដែរ។ សំរាប់ចំណង់ចំណូលចិត្តក្នុងការទទួលទាន ភេសជ្ជៈដែលមានជាតិអាកុលខ្លាំង ឬខ្សោយ កម្មវិធីរបស់ Somabar ក៏មានមុខងារអាចឲ្យយើងធ្វើការកំណត់នូវកម្រិតជាតិអាកុលនៅក្នុងភេសជ្ជៈរបស់យើងផងដែរ។

កម្មវិធីសំរាប់បញ្ជាម៉ាស៊ីន  Somabar នេះគឺអាចប្រើបានទាំងនៅលើប្រភេទស្មាត្រហ្វូនដែលដំណើរការដោយប្រព័ន្ធ  Android និង iOS សំរាប់តម្លៃរបស់វាគឺប្រហាក់ប្រហែលនឹង 400 ដុល្លា។

វិដេអូអំពីម៉ាស៊ីន Somabar