ទូរស័ព្ទស៊េរីថ្មីម៉ាក P9 ដែលជាទូរស័ព្ទ flagship របស់ក្រុមហ៊ុន Huawei គឺត្រូវបានរំពឹងទុកថានឹងចេញប្រកាសនៅក្នុងទីផ្សារនៅក្នុងដើមឆ្នាំ ២០១៦ នេះ ហើយគេក៏ឃើញមានរូបភាពដែលបែកធ្លាយតាមអ៊ីនធឺណេតរបស់ទូរស័ព្ទម៉ាក P9 នេះ ដែលបង្ហាញពីរូបរាងរបស់វា និងមានភ្ជាប់ជាមួយនឹងបច្ចេកវិទ្យាប្រព័ន្ធកាមេរ៉ាពីរ ឬ Dual Camera នៅពីក្រោយផងដែរ។ ទូរស័ព្ទស្មាតហ្វូនរបស់ Huawei ម៉ាក P9 ថ្មីនេះគឺនឹងមានភ្ជាប់ជាមួយនឹងកាមេរ៉ាដែលមានទំហំ sensor 12-megapixel (មេហ្គាភិចស៊ែល) ចំនួនពីរ រួមជាមួយនឹង lens ដែលឌីហ្សាញ និងបង្កើតដោយក្រុមហ៊ុន Leica ដែលអាចនឹងជួយដល់ការថត និងការ focus នៃកាមេរ៉ាក្នុងស្មាតហ្វូនម៉ាក P9 នេះឲ្យកាន់តែច្បាស់និងត្រឹមត្រូវល្អ។

ទូរស័ព្ទស្មាតហ្វូនម៉ាក P9 របស់ Huawei នេះ គឺជាម៉ាកជំនាន់ទី៥ របស់ទូរស័ព្ទ Huawei ស៊េរី P ដែលកំពុងតែមានការគាំទ្រ និងមានឥទ្ធិពលខ្លាំង។ ក៏ប៉ុន្តែ ក្រុមហ៊ុន Huawei នៅមិនទាន់ប្រកាសថាពួកគេនឹងបង្កើតទូរស័ព្ទស្មាតហ្វូន P9 នេះទេ ហើយពួកគេក៏មិនបាននិយាយអ្វីពីទូរស័ព្ទស៊េរីថ្មីរបស់ពួកគេមួយនេះក្នុង Mobile World Congress កាលពីអាទិត្យមុនផងដែរ តែយ៉ាងណាមិញ តាមរយៈរូបភាពបែកធ្លាយរបស់ទូរស័ព្ទម៉ាក P9 នេះ រួមទាំងប្រភពដែលគួរឲ្យទុកចិត្តមួយចំនួន យើងអាចប្រាកដបានថា ក្រុមហ៊ុន Huawei គឺកំពុងតែធ្វើការបង្កើតនូវទូរស័ព្ទដែលជាស៊េរីថ្មីរបស់ P-series បន្ទាប់ពី P8 ដែលចេញកាលពីឆ្នាំមុន។

ទូរស័ព្ទស្មាតហ្វូនម៉ាក P9 របស់ Huawei នេះ គឺត្រូវបានគេជឿថានឹងចេញមក ៤ ម៉ូដែលផ្សេងគ្នា ដែលមានដូចជាម៉ូដែលស្តង់ដាមានអេក្រង់ទំហំ 5.2 អ៊ីញ (inch), ម៉ូដែលដែលមានតម្លៃសមរម្យ សម្រាប់តម្រូវដល់អ្នកចង់ចំណាយតិច, ម៉ូដែលដែលមានអេក្រង់ធំជាងម៉ូដែលស្តង់ដា, និងម៉ូដែលដែលមានគ្រឿងខាងក្នុងមានឥទ្ធិពលខ្លាំងក្នុងការដំណើរការសម្រាប់អ្នកចង់យកទៅប្រើប្រាស់ជាមួយនឹងកម្មវិធីធំៗច្រើនតាមទូរស័ព្ទ។ បន្ថែមពីនេះផងដែរ វាក៏មានភ្ជាប់មកជាមួយនឹងគ្រឿងក្នុងដែលមានឥទ្ធិពលខ្លាំងមួយចំនួនផងដែរ ដូចជា HiSilicon Kirin 950 octa-core processor និង RAM ចំនួន 3GB ក៏ដូចជាថ្មដែលមានទំហំដល់ទៅ 3900mAh (មីលីអំពែម៉ោង) ផងដែរ។ ឥឡូវនេះ គេនៅមិនទាន់ដឹងពីតម្លៃ និងពត៌មានអំពីទូរស័ព្ទ Huawei P9 នេះច្បាស់លាស់នៅឡើយទេ ក៏ប៉ុន្តែគេរំពឹងថានឹងដឹងពីពត៌មានទាំងនោះនៅក្នុងដើមឆ្នាំ ២០១៦ នេះ។