នៅក្នុងសប្ដាហ៍នេះ (ថ្ងៃទី ០៤ ខែមេសា ដល់ ថ្ងៃទី ១០ ខែមេសា ឆ្នាំ២០១៦) រោងភាពយន្តនៅប្រទេសកម្ពុជាដូចជារោងភាពយន្ត Major Cineplex និង Legend នឹងមានចាក់បញ្ចាំងនូវភាពយន្តថ្មីចំនួន 4 រឿង ដែលក្នុងនោះ បីរឿងជារឿងរបស់ប្រទេសអាមេរិក និងមួយរឿងទៀតគឺជារឿងស្នេហារបស់ថៃ។ ដូចសប្ដាហ៍មុនៗដែរ ខ្ញុំនឹងរៀបរាប់ពីខ្សែភាពយន្តនីមួយៗ ហើយនឹងភ្ជាប់ជាមួយនឹង trailer នៃភាពយន្តនីមួយៗក្នុងនោះផងដែរ។ សូមបញ្ជាក់ជាមុនថា ពួកខ្ញុំមិនមានការរក្សាសិទ្ធិលើវីដេអូ trailer ទាំងនោះទេ។

Midnight Special – (07.04.2016)

រឿង Midnight Special គឺជាខ្សែភាពយន្តបែបវិទ្យាសាស្ត្ររបស់ប្រទេសអាមេរិក ដែលត្រូវបានដឹកនាំសម្ដែងដោយលោក Jeff Nichols ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ០៧ ខែមេសា ឆ្នាំ ២០១៦​ នេះ។ រឿងនេះនិយាយអំពីក្មេងម្នាក់ ដែលមានថាមពលពិសេស ខុសប្លែកពីមនុស្សលោកដទៃ ហើយក្មេងត្រូវបានពួករដ្ឋាភិបាលអាមេរិកតាមចាប់ខ្លួន ព្រោះពួកគេគិតថាថាមពលរបស់ក្មេងនោះគឺគ្រោះថ្នាក់ខ្លាំង ហើយពួកគេក៏ចង់យកគេមកធ្វើការពិសោធន៍ដែរ។ ក៏ប៉ុន្តែ ឪពុករបស់ក្មេងនោះបានខិតខំរិះរកគ្រប់វិធីដើម្បីនាំកូនរបស់គាត់រត់ ព្រោះគាត់មិនចង់ឲ្យកូនរបស់គាត់ទៅជារបស់សម្រាប់ពិសោធន៍នោះទេ។

Trailer របស់រឿង Midnight Special

លោកស្រីប្រធាន ឬ The Boss – (07.04.2016)

រឿង លោកស្រីប្រធាន ឬ The Boss គឺជាខ្សែភាពយន្តបែបកំប្លែងរបស់ប្រទេសអាមេរិក ដែលត្រូវបានដឹកនាំសម្ដែងដោយលោក Ben Falcone ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ០៧ ខែមេសា ឆ្នាំ ២០១៦​ នេះ។ ជើងខ្លាំងផ្នែកសេដ្ឋកិច្ចម្នាក់ត្រូវជាប់គុកបន្ទាប់នាងត្រូវគេរកឃើញថាបានធ្វើការជួញដូរផ្ទៃក្នុង។ ពេលដែលនាងបានត្រៀមខ្លួនងើបឡើងវិញធ្វើជាយីហោថ្មីបំផុតរបស់អាមេរិក មិនមែនមនុស្សគ្រប់គ្នាដែលនាងបានធ្វើបាបអាចលើកលែងទោសនិងបំភ្លេចបានដោយងាយៗនោះទេ។

Trailer របស់រឿង លោកស្រីប្រធាន ឬ The Boss

ស្នេហាទសវត្សរ៍ 90 ឬ Back to 90s – (07.04.2016)

រឿង ស្នេហាទសវត្សរ៍ 90 ឬ Back to 90s គឺជាខ្សែភាពយន្តស្នេហាឆ្លងទៅកាន់អតីតកាលរបស់ប្រទេសថៃ ដែលនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ០៧ ខែមេសា ឆ្នាំ ២០១៦​ នេះ។ រឿងនេះនិយាយអំពីក្មេងប្រុសម្នាក់ឈ្មោះ Kong ដែលគាត់បានឆ្លងទៅកាន់ឆ្នាំ 1995 នៅពេលដែលគាត់បានប្រើប្រាស់ទូរស័ព្ទសាធារណៈមួយ។ គាត់ក៏បានជួបជាមួយនឹងប៉ាម៉ាក់របស់គាត់កាលពីនៅក្មេង ហើយគាត់ក៏បានជួបនឹងនារីដ៏ស្រស់ស្អាតម្នាក់ឈ្មោះ Som ដែលគាត់បានលង់ស្រឡាញ់ ដែលពួកគេគឺសុទ្ធតែមានអាយុស្របាលៗគ្នា។ ពេលនោះ Kong បានដឹងថាប៉ារបស់គាត់បានលង់ស្រឡាញ់នឹងនារីដែលមិនមានជាម្ដាយរបស់គាត់ ដូច្នេះគាត់បានខិតខំរកគ្រប់វិធីដើម្បីបំបែកពួកគេ ហើយធ្វើឲ្យប៉ារបស់គាត់ជួបជាមួយនឹងម៉ាក់របស់គាត់ ព្រោះថាបើប៉ាម៉ាក់របស់គាត់មិនបានជួបគ្នាទេគាត់នឹងបាត់រូបពីផែនដីនេះ។ ថាតើ Kong ខិតខំប្រើវិធីណាខ្លះ ហើយថាតើគាត់ធ្វើបានជោគជ័យឬក៏អត់ សូមរងចាំទស្សនាទាំងអស់គ្នា។

Trailer របស់រឿង 

Spotlight – (08.04.2016)

រឿង Spotlight គឺជាខ្សែភាពយន្តយោងតាមរឿងពិតរបស់ប្រទេសអាមេរិក ដែលត្រូវបានដឹកនាំសម្ដែងដោយលោក Tom McCarthy ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ០៨ ខែមេសា ឆ្នាំ ២០១៦​ នេះ។ រឿងនេះនិយាយពីក្រុមហ៊ុនសារពត៌មាន Boston Globe ដែលពួកគេបានខិតខំប្រឹងប្រែងដើម្បីលាតត្រដាងអំពីការជួញដូរក្មេង និងការធ្វើបាបកូនក្មេងខុសច្បាប់នៅក្នុងវិហារ កាតូលិក មួយដែលធ្វើឲ្យផ្អើលពេញពិភពលោក ហើយរឿងនេះផងដែរ គឺត្រូវបានដកស្រង់ចេញពីរឿងពិតតែម្តង។

Trailer របស់រឿង Spotlight

នៅក្នុងសប្ដាហ៍នេះ (ថ្ងៃទី ២១ ខែមិនា ដល់ ថ្ងៃទី ២៧ ខែមិនា ឆ្នាំ២០១៦) រោងភាពយន្តនៅប្រទេសកម្ពុជាដូចជារោងភាពយន្ត Major Cineplex និង Legend នឹងមានចាក់បញ្ចាំងនូវភាពយន្តថ្មីចំនួន ៤ រឿង ដែលក្នុងនោះ មួយរឿងជារឿងរបស់ប្រទេសបារាំង មួយរឿងគឺជារឿងបែបកំសត់របស់ប្រទេសជប៉ុន មួយរឿងជារឿងរបស់ប្រទេសកម្ពុជាយើង និងចុងក្រោយគឺជារឿង super hero របស់ប្រទេសអាមេរិក។ ដូចសប្ដាហ៍មុនៗដែរ ខ្ញុំនឹងរៀបរាប់ពីខ្សែភាពយន្តនីមួយៗ ហើយនឹងភ្ជាប់ជាមួយនឹង trailer នៃភាពយន្តនីមួយៗក្នុងនោះផងដែរ។ សូមបញ្ជាក់ជាមុនថា ពួកខ្ញុំមិនមានការរក្សាសិទ្ធិលើវីដេអូ trailer ទាំងនោះទេ។

The New Adventures of Aladdin  – (24.03.2016)

រឿង The New Adventures of Aladdin គឺជាខ្សែភាពយន្តបែបកំប្លែងរបស់ប្រទេសបារាំង ដែលត្រូវបានដឹកនាំសម្ដែងដោយលោក Arthur Benzaquen ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ២៤ ខែមិនា ឆ្នាំ ២០១៦​ នេះ។ នៅក្នុងរឿងនេះ Sam និងមិត្តសម្លាញ់របស់គាត់ Khalid បានបន្លំខ្លួនធ្វើជាលោកឪនៅក្នុងថ្ងៃបុណ្យណូអែល ដើម្បីទៅលួចរបស់ពី Galeries Lafayette។ ក៏ប៉ុន្តែ ពួកគេត្រូវបានពួកក្មេងៗចចេសសុំឲ្យពួកគេនិទានរឿងឲ្យពួកគេស្ដាប់ ដូច្នេះហើយពេលនោះ Sam ក៏បាននិទានពីរឿង Aladdin និង ចង្កៀងទិព្ធ ដែលអ្នកប្រហែលជាធ្លាប់បានស្គាល់រួចមកហើយ ជាលក្ខណៈរឿងបែបកំប្លែង ហើយគាត់ផ្ទាល់គឺជាតួរ​ឯនៅក្នុងរឿងនិទានរបស់គាត់នោះ។

Trailer របស់រឿង The New Adventures of Aladdin

Hana’s Miso Soup – (24.03.2016)

រឿង Hana’s Miso Soup គឺជាខ្សែភាពយន្តបែបកំសត់មនោសញ្ជេតនារបស់ប្រទេសជប៉ុន ដែលនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ២៤ ខែមិនា ឆ្នាំ ២០១៦​ នេះ។ Chie ជាក្មេងស្រីម្នាក់ដែលបានឈប់រៀននៅមហាវិទ្យាល័យ ហើយនាងបានកើតជម្ងឺមហារីកបន្ទាប់ពីបានភ្ជាប់ពាក្យរួច។ សំណាងល្អនាងអាចព្យាបាលមហារីករបស់នាងបាន តែនាងមិនអាចឲ្យមានកូនបានទេ បន្ទាប់មកជីវិតរៀបការរបស់នាងចាប់ផ្តើមមានសុភមង្គល។ បន្ទាប់ពីរឿងទុក្ខសោក អព្ភូតហេតុបានកើតឡើងបន្ទាប់ពី Chie បានដឹងថានាងមានផ្ទៃពោះ។ តែនាងបានសម្រេចចិត្តរក្សាកូនទុកដោយប្រថុយនឹងគ្រោះថ្នាក់ក្នុងការមានជម្ងឺមហារីកម្តងទៀត។ ក្រោយពីបានពិភាក្សារជាមួយនឹងដុកទ័រស្រុកស្រែ នាងបានផ្លាស់ប្តូរនូវរបបអាហាតាមបែបប្រពៃណីរបស់ជប៉ុនគឺពិសារសុ៊បមីសូ ដើម្បីឲ្យរាងកាយនាងមានសុខភាពល្អ។ ដោយដឹងថាពេលវេលារបស់នាង និងកូនស្រីមានរយៈពេលខ្លី Chie បានរៀបចំដំណើរជីវិតឲ្យកូនរបស់នាងនៅពេលដែលគ្មាននាងនៅក្បែរខ្លួន ហើយក៏បានបង្រៀនឲ្យកូនរបស់នាងជាងធ្វើស៊ុបមីសូផងដែរ។

Trailer របស់រឿង Hana’s Miso Soup

https://youtu.be/nb5MSbah0gU

ប្រាសាទកំបាំងមុខ – (24.03.2016)

រឿង ប្រាសាទកំបាំងមុខ គឺជាខ្សែភាពយន្តបែបផ្សងព្រេងឆ្លងភពទៅអតីតកាលរបស់ប្រទេសកម្ពុជាយើង ដែលនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ២៤ ខែមិនា ឆ្នាំ ២០១៦​ នេះ។ រឿងនេះនិយាយអំពីការផ្សងព្រេងរបស់មនុស្សមួយក្រុមដែលបានឆ្លងទៅកាន់សម័យបុរាណដោយចៃដន្យ។ ក្ដីស្រលាញ់របស់នារីបុរាណម្នាក់ដែលរស់នៅដោយអថ័នអស់ជិត១ពាន់ឆ្នាំ ទឹកភ្នែកស្រក់រាប់រយឆ្នាំរស់នៅទាំងភាពងងឹតនិងស្ងាត់ច្រងំម្នាក់ឯងក្នុងប្រាសាទ ព្រោះតែសេចក្តីស្នេហារងចាំបុរសម្នាក់ដែរនាងស្រលាញ់ ទាំងគេចាប់ជាតិថ្មីលែងស្គាល់រូបនាងបាត់ទៅហើយ តែនាងនូវតែមិនអស់អាល័យ ភាពក្ដុកក្ដួល ស្នេហាជ្រាលជ្រៅរវាងមនុស្សបុរាណ និងមនុស្សសម័យបច្ចុប្បន្ន តើស្នេហាមួយនេះអាចរួមរស់នឹងគ្នាបានដែរឬទេ? ការប៉ះទង្គិចគ្នារវាងគ្រាប់កាំភ្លើងនិងមនុស្សបុរាណដែលជាស្ដេចអាគមន៍ខ្មៅ តើទៅជាយ៉ាងណា? ការស្រាយនូវជំនឿតៗគ្នាមកថា ខ្មែរយើងមានប្រាសាទកំបាំង ដែលជួនកាលឃើញ ជួនកាលបាត់។ រឿងនេះជារឿងបែបកំប្លែង រន្ធត់ ខ្មោចព្រាយ និង អាគមន៏សា្រស្តនៃពិធីចាប់ព្រាយកន្ទោងខៀវ មានក្បាច់គុណបុរាណដែលបានដកស្រង់ពីអថ័ន និងសិលាចារិកដូចជា យ័នព្រះខ្វាម  របាំគ្រុឌនាគរាជ និងក្បាច់គុណកុងហ្វូ។ តើឥសាន្ត តួរអង្គប្រុសដែលជាមនុស្សសម័យយើងនេះ យកអ្វីមកតតាំងនឹងស្តេចអថ័នខ្មៅដែលមានអាយុកាលរាប់ពាន់ឆ្នាំបានទៅ?

Trailer របស់រឿង ប្រាសាទកំបាំងមុខ

https://youtu.be/O1srSJt4680

Batman Vs Superman: Dawn of Justice – (25.03.2016)

រឿង Batman Vs Superman: Dawn of Justice គឺជាខ្សែភាពយន្តបែប action មាន superhero របស់ប្រទេសអាមេរិក ដែលត្រូវបានដឹកនាំសម្ដែងដោយលោក Zack Snyder ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ២៥ ខែមិនា ឆ្នាំ ២០១៦​ នេះ។ អ្នកទាំងអស់គ្នាប្រហែលជាធ្លាប់បានស្គាល់វីរបុរសទាំពីរនេះហើយ Superman និង Batman ហើយនៅក្នុងរឿងនេះពួកគេនឹងមានជម្លោះខ្លះជាមួយនឹងគ្នា។ ដោយគិតថាទង្វើរបស់ Superman ក្នុងការជួយផែនដីពីការគម្រាមកំហែងរបស់មនុស្សភពក្រៅ ពោលគឺមនុស្សភពរបស់ Superman ផ្ទាល់ បានបំផ្លាញនូវរបស់ជាច្រើននៅលើផែនដី Batman បានមកប្រឆាំងជាមួយនឹង Superman អំពីរឿងនេះ។ ហើយពិភពលោក ក៏កំពុងតែឈ្លោះគ្នាខ្លាំងផងដែរ ថាតើវីរបុរសមួយណាដែលពួកគេត្រូវការ។ ក្នុងខណៈពេលដែល Superman និង Batman កំពុងតែមានជម្លោះនឹងគ្នា ការគម្រាមកំហែងរបស់សត្វចម្លែកមួយឈ្មោះថា Doomsday ដែលត្រូវបានបង្កើតឡើងដោយ Lex Luthor បានបង្កជាបញ្ហាដល់ពិភពលោក។ នៅពេលនេះគឺវាអាស្រ័យលើ Superman, Batman និង​ Wonder Woman ហើយ ក្នុងការធ្វើការសហការគ្នា ដើម្បីបញ្ឈប់ Lex Luthor និង Doomsday ពីការប៉ងចង់បំផ្លាញទីក្រុង Metropolis ដែលជាទីក្រុងរបស់ Batman។

Trailer របស់រឿង Batman Vs Superman: Dawn of Justice

https://youtu.be/Xc2aa6fkRqM

នៅក្នុងសប្ដាហ៍នេះ (ថ្ងៃទី ១៤ ខែមិនា ដល់ ថ្ងៃទី ២០ ខែមិនា ឆ្នាំ២០១៦) រោងភាពយន្តនៅប្រទេសកម្ពុជាដូចជារោងភាពយន្ត Major Cineplex និង Legend នឹងមានចាក់បញ្ចាំងនូវភាពយន្តថ្មីចំនួន ៤ រឿង ដែលក្នុងនោះ ពីររឿងជារឿងរបស់ប្រទេសអាមេរិក មួយរឿងគឺជារឿងកំប្លែងរបស់ប្រទេសថៃ និងមួយរឿងទៀតជារឿងខ្មោចបែបកំប្លែងរបស់ប្រទេសកម្ពុជាយើង។ ដូចសប្ដាហ៍មុនៗដែរ ខ្ញុំនឹងរៀបរាប់ពីខ្សែភាពយន្តនីមួយៗ ហើយនឹងភ្ជាប់ជាមួយនឹង trailer នៃភាពយន្តនីមួយៗក្នុងនោះផងដែរ។ សូមបញ្ជាក់ជាមុនថា ពួកខ្ញុំមិនមានការរក្សាសិទ្ធិលើវីដេអូ trailer ទាំងនោះទេ។

Kung Fu Panda 3 – (17.03.2016)

រឿង Kung Fu Panda 3 គឺជាខ្សែភាពយន្តគំនូរជីវចលបែបកំប្លែងរបស់ប្រទេសអាមេរិកបង្ហាញពីក្បាច់គុណចិន ដែលត្រូវបានដឹកនាំសម្ដែងដោយ Alessandro Carloni និង Jennifer Yuh ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ១៧ ខែមិនា ឆ្នាំ ២០១៦​ នេះ។ រឿងនេះនិយាយពីវីរៈបុរស Panda ឈ្មោះ Po ដែលជា Dragon Warrior ប្រចាំជ្រលងភ្នំដែលគាត់រស់នៅ ហើយគាត់បានការពារភូមិរបស់គាត់ពីការឈ្លានពានផ្សេងៗពីខាងក្រៅមកលើភូមិរបស់គាត់។ បើសិនជាអ្នកធ្លាប់បានទស្សនាខ្សែភាពយន្តជីវចលបែបកំប្លែងមួយនេះកាលពីវគ្គ ១ និង ២ រួចហើយ នោះអ្នកនឹងដឹងហើយថាវាកំប្លែង និងមានមនោសញ្ជេតនាយ៉ាងណានោះ ហើយនៅក្នុងវគ្គទី៣ នេះ Po នឹងក្លាយទៅជាគ្រូបង្រៀនក្បាច់គុណ Kung Fu ទាំងគាត់នៅមិនទាន់ត្រៀមខ្លួនរួចនៅឡើយទេ។ ថាតើគាត់អាចធ្វើវាបានឬក៏អត់សូមរងចាំទស្សនាទាំងអស់គ្នា។

បញ្ជាក់៖ រឿង Kung Fu Panda 3 នេះត្រូវបានចាក់បញ្ជាំងហើយនៅឯរោងភាពយន្ត Legend មុននេះប្រហែលប៉ុន្មានថ្ងៃមកហើយ។

Trailer របស់រឿង Kung Fu Panda 3

https://youtu.be/lpm30lgbf84

The Divergent Series: Allegiant – (17.03.2016)

រឿង Allegiant គឺជាខ្សែភាពយន្ត action បាញ់គ្នារបស់ប្រទេសអាមេរិក ដែលត្រូវបានដឹកនាំសម្ដែងដោយលោក Robert Schwentke ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ១៧ ខែមិនា ឆ្នាំ ២០១៦​ នេះ។ រឿងនេះគឺជាវគ្គបន្តរបស់ The Divergent Series ដែលបង្ហាញពីការខិតខំប្រឹងប្រែងរបស់ក្រុមមនុស្សមួយក្រុម ដើម្បីជៀសឲ្យផុតពីការគៀបសង្កត់របស់អ្នកមានអំណាច។ នៅក្នុងរឿង Allegiant នេះ Beatrice Prior និង Tobias Eaton ដែលជាតួរឯកនៅក្នុងរឿងនេះ និងគ្នារបស់ពួកគាត់មួយចំនួនទៀត បានធ្វើការប្រឆាំងនិងវាយលុករហូតបានចេញផុតពីរបងដែលពួកអ្នកមានអំណាចដាក់ពួកគេក្នុងនោះអស់រយៈពេលជាយូរមកហើយ ហើយនៅពេលដែលពួកគេបានចេញពីរបងនោះ ពួកគេត្រូវបានគេចាប់ខ្លួនឃុំឃាំងដោយក្រុមភ្នាក់​ងារសំងាត់មួយ ដែលត្រូវបានគេស្គាល់ឈ្មោះថាជា ការិយាល័យហ្សែនសុខុមាលភាព (the Bureau of Genetic Welfare)។ ថាតើពួកគេអាចគេចផុតពីការគៀបសង្កត់ និងអាចយកឈ្នះស្ថានភាពនេះបានឬក៏អត់សូមរងចាំទស្សនាទាំងអស់គ្នា។

Trailer របស់រឿង The Divergent Series: Allegiant

https://youtu.be/Ntbe_2GHBPE

មីងក្រញាញ់ ឬ Miss Happy – (17.03.2016)

រឿង មីងក្រញាញ់ ឬ Miss Happy គឺជាខ្សែភាពយន្តបែបកំប្លែងរបស់ប្រទេសថៃ ដែលនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ១៧ ខែមិនា ឆ្នាំ ២០១៦​ នេះ។ រឿងនេះនិយាយពីកញ្ញាម្នាក់ដែលមានឈ្មោះថា​ Pesuk ឬ កញ្ញារីករាយ ដែលគាត់តែងតែជឿថាក្នុងលោកនេះ ភាពរីករាយគឺជាអ្វីដែលយើងត្រូវការដើម្បីជំនះអ្វីៗទាំងអស់សូម្បីតែយើងនៅក្នុងការលំបាក ឬជួបបញ្ហាអ្វីក៏ដោយ។ ជីវិតរបស់នាងគឺមានតែភាពសប្បាយ រហូតដល់ថ្ងៃមួយនាងបានជួបនឹងរឿងមិនល្អផ្ទួនៗគ្នាដូចជា នាងត្រូវបានគេដេញចេញពីកន្លែងធ្វើការ មិត្តប្រុសរបស់នាងបានក្បត់នឹងនាង ហើយត្រូវបានពេទ្យពិនិត្យឃើញថានាងមានជម្ងឺមហារីកបេះដូង ដែលនឹងត្រូវស្លាប់ក្នុងរយៈពេលមួយខែទៀត, វាពិតជាសំណាងអាក្រក់សម្រាប់នាងណាស់មែនទេ? ក្រោយពីពេលនោះនាងពិបាកចិត្តខ្លាំងណាស់ ថ្ងៃមួយនាងក៏ចាប់ផ្ដើមព្យាយាមរិះរកវិធីដើម្បីធ្វើឲ្យជីវិតរបស់នាងមានភាពសប្បាយរីករាយឡើងវិញ។ ថាតើនាងអាចធ្វើវាបានឬអត់សូមរងចាំទស្សនាទាំងអស់គ្នា។

Trailer របស់រឿង មីងក្រញាញ់ ឬ Miss Happy

https://youtu.be/elkLsEh_O94

ដៃគូកំចាត់ខ្មោច – (17.03.2016)

រឿង ដៃគូកំចាត់ខ្មោច គឺជាខ្សែភាពយន្តខ្មោចបែបកំប្លែងរបស់ប្រទេសកម្ពុជា ដែលនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ១៧ ខែមិនា ឆ្នាំ ២០១៦​ នេះ។ រឿងនេះមានលាយលំឈុតឆាកខ្មោចលង ឈុតឆាកកំប្លែងជាច្រើន ហើយបើសិនជាអ្នកគាំទ្រ និងចូលចិត្តខ្សែភាពយន្តខ្មែរប្រភេទនេះ អ្នកប្រហែលជាចូលចិត្តខ្សែភាពយន្តនេះផងដែរ។

Trailer របស់រឿង  ដៃគូកំចាត់ខ្មោច

https://youtu.be/NHMKm1GL7EY

នៅក្នុងសប្ដាហ៍នេះ (ថ្ងៃទី ០៧ ខែមិនា ដល់ ថ្ងៃទី ១៣ ខែមិនា ឆ្នាំ២០១៦) រោងភាពយន្តនៅប្រទេសកម្ពុជាដូចជារោងភាពយន្ត Major Cineplex និង Legend នឹងមានចាក់បញ្ចាំងនូវភាពយន្តថ្មីចំនួន ៤ រឿង ដែលក្នុងនោះ មួយរឿងជារឿងស្នេហារបស់ប្រទេសថៃ ពីររឿងគឺជារឿងកំប្លែងរបស់ប្រទេសអាមេរិកនិងបារាំង និងមួយរឿងទៀតជារឿងស្នេហាកំប្លែងរបស់ប្រទេសកម្ពុជាយើង។ ដូចសប្ដាហ៍មុនៗដែរ ខ្ញុំនឹងរៀបរាប់ពីខ្សែភាពយន្តនីមួយៗ ហើយនឹងភ្ជាប់ជាមួយនឹង trailer នៃភាពយន្តនីមួយៗក្នុងនោះផងដែរ។ សូមបញ្ជាក់ជាមុនថា ពួកខ្ញុំមិនមានការរក្សាសិទ្ធិលើវីដេអូ trailer ទាំងនោះទេ។

367 Days Him and Her – (08.03.2016)

រឿង 367 Days Him and Her គឺជាខ្សែភាពយន្តស្នេហា របស់ប្រទេសថៃ ដែលនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ០៨ ខែមិនា ឆ្នាំ ២០១៦​ នេះ។ រឿងនេះនិយាយអំពីការស្រឡាញ់គ្នារវាង Head និង Tine តាំងពីនៅរៀនៅវិទ្យាល័យ រហូតដល់មហាវិទ្យាល័យ ហើយក្រោយពីនោះស្នេហារបស់ពួកគេបានក្លាយទៅជាស្នេហាពីចម្ងាយដោយ Tine ត្រូវទៅនៅជាមួយនឹងម៉ាក់របស់នាងនៅឯហុងកុង។

Trailer របស់រឿង 367 Days Him and Her

https://youtu.be/qYgEiFzqSzU

How to Be Single – (08.03.2016)

រឿង How to Be Single គឺជាខ្សែភាពយន្តបែបកំប្លែងរបស់ប្រទេសអាមេរិក ដែលត្រូវបានដឹកនាំសម្ដែងដោយលោក Christian Ditter ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ០៨ ខែមិនា ឆ្នាំ ២០១៦​ នេះ។ នៅក្នុងទីក្រុង New York គឺសម្បូរទៅដោយអ្នកដែលនៅលីវ និងកំពុងរុករកស្នេហាពិតណាស់ ហើយអ្វីដែល Alice, Robin, Lucy, Meg, Tom និង David ត្រូវការនោះគឺរៀនរស់ដោយខ្លួនឯង ឬរៀនរស់នៅបែបជីវិតអ្នកនៅលីវ ក្រោយពីពួកគេបានបែកបាក់ពីស្នេហាចាស់របស់ពួកគេ។

Trailer របស់រឿង How to Be Single

https://youtu.be/NX8dbN-VPh8

ដំណើរកំសាន្តបែកស្លុយ ឬ All Gone South – (10.03.2016)

រឿង ដំណើរកំសាន្តបែកស្លុយ ឬ All Gone South គឺជាខ្សែភាពយន្តបែបកំប្លែងរបស់ប្រទេសបារាំង ដែលត្រូវបានដឹកនាំសម្ដែងដោយលោក Nicolas Benamou និងលោក Philippe Lacheau ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ១០ ខែមិនា ឆ្នាំ ២០១៦​ នេះ។ Franck ហើយនឹងសង្សាររបស់គាត់ Sonya រួមជាមួយនឹងមិត្តភ័ក្តិរបស់គាត់ប៉ុន្មាននាក់ទៀតបានធ្វើដំណើរកំសាន្តទៅប្រទេសប្រេសីល។ Franck មិត្តភ័ក្តិរបស់គាត់ នារីពីរនាក់ រួមទាំងលោកយាយរបស់ Sonya បាននាំគ្នាទៅលេងនៅក្នុងរូងភ្នំមួយ តែពេលរឿងអាក្រក់ និងសយមួយចំនួនបានកើតឡើងចំពោះពួកគេ ហើយដំណើរផ្សងព្រេងដ៏រញ៉េរញ៉ៃបានចាប់ផ្ដើម។ ថាតើពួគគេអាចគេចផុតពីស្ថានភាពនេះបានទេ សូមរងចាំទស្សនាទាំងអស់គ្នា។

Trailer របស់រឿង ដំណើរកំសាន្តបែកស្លុយ ឬ All Gone South

បេះដូង Copy – (11.03.2016)

រឿង បេះដូងCopy គឺជាខ្សែភាពយន្តខ្មោចនិងស្នេហាបែបកំប្លែង របស់ប្រទេសកម្ពុជាយើង ដែលនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ១១ ខែមិនា ឆ្នាំ ២០១៦​ នេះ។ រឿងនេះជារឿងបែបកំប្លែង ដែលមានលាយលំជាមួយនឹង ឈុតខ្មោច និង ឈុតស្នេហា ដែលធ្វើឲ្យអ្នកសើចចុកពោះ។ ថាតើរឿងនោះវាល្អសើចប៉ុនណានោះ សូមរងចាំទស្សនាទាំងអស់គ្នា។

Trailer របស់រឿង  បេះដូងCopy

https://youtu.be/s4bI9NJ_7WU

នៅក្នុងសប្ដាហ៍នេះ (ថ្ងៃទី ២៩ ខែកុម្ភៈ ដល់ ថ្ងៃទី ០៦ ខែមិនា ឆ្នាំ២០១៦) រោងភាពយន្តនៅប្រទេសកម្ពុជាដូចជារោងភាពយន្ត Major Cineplex និង Legend នឹងមានចាក់បញ្ចាំងនូវភាពយន្តថ្មីចំនួន ២ រឿង ដែលក្នុងនោះ ទាំងពីររឿងគឺសុទ្ធតែជារឿងរបស់ប្រទេសអាមេរិក។ ដូចសប្ដាហ៍មុនៗដែរ ខ្ញុំនឹងរៀបរាប់ពីខ្សែភាពយន្តនីមួយៗ ហើយនឹងភ្ជាប់ជាមួយនឹង trailer នៃភាពយន្តនីមួយៗក្នុងនោះផងដែរ។ សូមបញ្ជាក់ជាមុនថា ពួកខ្ញុំមិនមានការរក្សាសិទ្ធិលើវីដេអូ trailer ទាំងនោះទេ។

Contracted Phase II – (03.03.2016)

រឿង Contracted Phase II គឺជាខ្សែភាពយន្តបែបភ័យរន្ធត់មានខ្មោច zombies របស់ប្រទេសអាមេរិក ដែលត្រូវបានដឹកនាំសម្ដែងដោយលោក Josh Forbes ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ០៣ ខែមិនា ឆ្នាំ ២០១៦​ នេះ។ រឿងនេះនិយាយអំពីការរីករាលដាលនៃវីរុសម្យ៉ាងដែលឆ្លងពីមនុស្សម្នាក់ទៅមនុស្សម្នាក់តាមរយៈការខាំ និងការរួមភេទដោយមិនបានការពារ ហើយវាមានមុខសញ្ញាធ្វើឲ្យសាច់មនុស្សរលួយក្លាយទៅជាខ្មោចឆៅ។ ហើយរឿងនេះផងដែរ កាលពី Phase I ឬវគ្គមួយ គឺនិយាយអំពីការចាប់ផ្ដើមនៃវីរុសនេះ ហើយនៅក្នុង Phase II ឬវគ្គពីរនេះ គឺនិយាយអំពីការរីករាលដាល និងផលប៉ះពាល់នៃវីរុសថ្មីនេះ។ ក្នុងរឿងនេះ Riley បានខិតខំរុករកថ្នាំដើម្បីព្យាបាល និងកម្ចាត់វីរុសនេះដែលបានឆ្លងលើ Samantha មុនពេលដែលជម្ងឺនេះបានរាតត្បាតពាសពេញពិភពលោក។ ថាតើពួកគេអាចរុករកវាក់សាំងការពារវីរុសនេះ ហើយបញ្ឈប់ការរាតត្បាតនៃជម្ងឺនេះបានឬក៏អត់នោះ សូមរងចាំទស្សនាទាំងអស់គ្នា។

Trailer របស់រឿង Contracted Phase II

London Has Fallen – (04.03.2016)

រឿង London Has Fallen គឺជាខ្សែភាពយន្តបែប action មានការបាញ់ប្រហារគ្នា របស់ប្រទេសអាមេរិក ដែលត្រូវបានដឹកនាំសម្ដែងដោយលោក Babak Najafi ហើយនឹងត្រូវបានចាក់បញ្ចាំងនៅរោងភាពយន្តក្នុងប្រទេសកម្ពុជានៅថ្ងៃទី ០៤ ខែមិនា ឆ្នាំ ២០១៦​ នេះ។ រឿងនេះនិយាយពីការវាយប្រហាររបស់ភេរវករ ទៅលើមេដឹកនាំជុំវិញពិភពលោក នៅពេលដែលពួកគាត់បានមកប្រជុំគ្នានៅទីក្រុង London ដើម្បីចូលរួមរំលែកទុកការស្លាប់របស់ប្រធានាធិបតីរបស់ចកភពអង់គ្លេស។ បើសិនជាអ្នកបានទស្សនា និងចូលចិត្តរឿង Olympus Has Fallen កាលពីឆ្នាំមុន នោះអ្នកនឹងចូលចិត្តរឿងនេះដែរ ពីព្រោះវាមានសាច់រឿងប្រហាក់ប្រហែលគ្នា ហើយមានតួរសម្ដែងដូចគ្នា និយាយឲ្យចំគឺវាជារឿងបន្តពីរឿង Olympus Has Fallen​ តែម្ដង។ ដូច្នេះបើសិនជាអ្នកចូលចិត្តរឿងបែបបាញ់ប្រហារ និងការដោះស្រាយបញ្ហាដែលពួកភេរវករបានបង្កឡើង នោះអ្នកគួរតែទស្សនាខ្សែភាពយន្តមួយនេះ។

Trailer របស់រឿង London Has Fallen

https://youtu.be/MBAwYL07K9E