ជាធម្មតាសំរាប់ការថែរក្សារអាហារឲ្យនៅមានគុណភាពល្អ និងស្រស់បានយូរ យើងចាំបាច់ត្រូវការទូរទឹកកក។ ដោយទូរទឹកកកគឺជាឧបករណ៍ដែលអាចរក្សារគុណភាពម្អូបអាហារ និងភេសជ្ជៈបានតាមរយៈការបញ្ចេញនៅចំហាយត្រជាក់ដើម្បីរក្សាររាល់ចំណីអាហារ និងភេសជ្ជៈឲ្យស្ថិតនៅសីតុណ្ហភាពទាប ឬត្រជាក់។ ទោះបីជាយ៉ាងដូចនេះក្តី មិនមែនរាល់ចំណីអាហារទាំងអស់គឺសុទ្ធតែអាចរក្សារនូវគុណភាពតាមរយៈការដាក់ក្នុងទូរទឹកកកនោះទេ ក្នុងនោះក៏មានចំណីអាហារមួយចំនួននឹងត្រូវខូច ឬអន់ថយនៅគុណភាពប្រសិនបើយើងដាក់ពួកវានៅក្នុងទូរទឹកក។
ខាងក្រោមនេះគឺជាប្រភេទអាហារមួយចំនួនដែលយើងមិនគួររក្សារទុកក្នុងទូរទឹកកក ៖
មើមដំឡូង
កន្លែងដែលសាកសម្យបំផុតសំរាប់ការរក្សារទុកមើមដំឡូងគឺនៅត្រង់បរិវេណដែលមានសីតុណ្ហភាពត្រជាក់ល្មម មិនក្តៅពេក និងមិនត្រជាក់ពេក ហើយគឺជាកន្លែងដែលស្ងួតមិនមានសំណើមផងដែរ។ យើងអាចរក្សារទុកវានៅក្នុងកេសក្រដាស់ ឬមួយក៏នៅក្នុងថង់ប្លាស្ទិកក៏បាន ក៏ប៉ុន្តែជៀសវាងការដាក់វានៅក្នុងទូរទឹកកក ពីព្រោះសីតុណ្ហភាពដ៏ត្រជាក់នៅក្នុងទូរទឹកកកនឹងកែប្រែម្សៅដំឡូងឲ្យក្លាយទៅជាស្ក ដែលជាហេតុធ្វើឲ្យដំឡូងអន់ថយទ្រង់ទ្រាយ ពណ៌សំបូរ និងមានរស់ជាតិផ្អែមផងដែរ។
ផ្លែចេក និងផ្លែប័រ
សំរាប់ផ្លែចេក និងផ្លែប័រដែលទុំហើយ បើសិនជាអ្នកដាក់វានៅក្នុងទូរទឹកកកវានឹងជួយកាត់បន្ថយរយៈពេលវិវត្តទៅភាពរលួយរបស់ផ្លែឈើទាំងពីរប្រភេទនេះបានពីរទៅបីថ្ងៃដែរ។ ប៉ុន្តែបើសិនជាអ្នកដាក់ផ្លែចេក និងផ្លែប័រដែលខៀវខ្ចីចូលទៅក្នុងទូរទឹកកនោះពួកវានឹងមិនប្រែក្លាយជាទុំបានឡើយ ទោះបីជាបន្ទាប់ពីអ្នកបានយកវាចេញពីទូរទឹកកកហើយក្តី ដោយសំបកវានឹងប្រែទៅជារលួយជាមួយសាច់ដែលមិនទាន់ទុំនៅខាងក្នុង។
ខ្ទឹមស ក្រហម និងខ្តឹមបារាំង
បើសិនជាអ្នកគិតថាការដាក់ពពួកអាហារនេះចូលទៅក្នុងទូរទឹកកកអាចរក្សារវាមិនឲ្យខូចនោះ ការគិតរបស់អ្នកនេះពិតជាខុសខ្លាំងណាស់។ ដោយសារពពួកខ្ទឹមងាយនឹងកើតផ្សឹត បើសិនជាយើងរក្សារទុកពួកវានៅក្នុងទូរទឹកកកក្នុងរយៈពេលមួយដែលយូរ។ ម៉្យាងវិញទៀតទោះបីជាខ្ទឹមនោះត្រូវបានបកសំបក និងចិតជាចំណិតៗហើយត្រូវបានរុំដោយថង់ប្លាស្ទិកយ៉ាងជិតក៏ដោយ ក៏វានឹងប្រែក្លាយទៅជាស្ងួត អស់ជាតិសំណើមផងដែរ។ ក្រៅពីនេះការដាក់ខ្ទឹមបារាំងនៅក្នុងទូរទឹកកកអាចធ្វើឲ្យមានក្លឹនរបស់វាជាប់នៅខាងក្នុង និងជាប់ទៅនឹងអាហារផ្សេងៗដែលមាននៅក្នុងនោះផងដែរ។
ទឹកឃ្មុំ
បើតាមការសិក្សារស្រាវជ្រាវរបស់អ្នកវិទ្យាសាស្ត្របានប្រាប់ឲ្យដឹងថាទឹកឃ្មុំគឺជាប្រភេទអាហាររាវម៉្យាងដែលមិនចេះខូច ឬហួសការបរិច្ឆេទនោះឡើយ មិនថាទោះបីជាអ្នករក្សារទុកវាប៉ុន្មានឆ្នាំនោះឡើយ។ ផ្ទុយទៅវិញប្រសិនបើអ្នករក្សារទុកវានៅក្នុងទូរទឹកកកនោះ វានឹងធ្វើឲ្យជាតិផ្អែមរបស់ទឹកឃ្មុំចាប់ផ្តើមកកយ៉ាងឆាប់រហ័ស ដែលជាមូលហេតុធ្វើឲ្យទឹកឃ្មុំក្លាយទៅជាកករឹង ប៉ុន្តែអ្នកនៅតែអាចពិសារវាបានដដែល។
នុំប៉័ង
សំរាប់អ្នកដែលមានទំលាប់ដាក់នុំប៉័ងនៅក្នុងទូរទឹកកក តើអ្នកធ្លាប់ឆ្ងល់ដែល ឬទេថានុំប៉័ងរបស់អ្នកតែងប្រែក្លាយទៅជាសភាពរឹងៗ ហើយពិបាកទំពារយ៉ាងនេះ? នេះគឺដោយសារតែម្សៅនុំប៉័ងបានចាប់ផ្តើមកក ដែលជាហេតុធ្វើឲ្យនុំប៉័ងក្លាយជារឹង និងខូចរស់ជាតិនៅពេលដែលវាស្ថិតនៅបរិយាកាសត្រជាក់ខ្លាំង។
