វាជារឿងមួយធម្មតាទេ សំរាប់យើងទាំងអស់គ្នា នៅពេលដែលយើងឃើញមានម៉ូតូកង់ពីរបើកបរពៀសពេញផ្លូវនោះ។ ខ្ញុំជឿជាក់ថា មានប្រិយមិត្តមួយចំនួន ក៏ជាដូចជារូបខ្ញុំដែរ គឺសុទ្ធតែធ្លាប់បានឃើញនូវប្រភេទម៉ូតូដែលមានកង់បី និងបួន ប៉ុន្តែចំណែកឯប្រភេទម៉ូតូដែលបើកបរដោយកង់តែមួយវិញ គឺយើងទាំងអស់គ្នាពុំទាន់ធ្លាប់បានជួបប្រទះនៅតាមដងផ្លូវនៅឡើយ។
សំរាប់ពេលថ្មីៗកន្លងទៅនេះ នៅសហរដ្ឋអាមេរិក ក៏ដូចជានៅទ្វីបអឺរ៉ុប មានការដាក់តាំងបង្ហាញ និងទទួលកម៉្មង់មុននូវប្រភេទម៉ូតូដែលបើកបរដោយកង់តែមួយទៅហើយ។ ប្រភេទម៉ូតូដែលបើកបរដោយកង់មួយនោះត្រូវបានគេឲ្យឈ្មោះថា RYNO វាគឺជាប្រភេទម៉ូតូស្វ័យប្រវត្តិ ដែលដំណើរការដោយម៉ាស៊ីនអគ្គិសនី ថ្មអាគុយ។ វាគឺជាប្រភេទម៉ូតូដែលមានរូបរាងប្លែកពីគេ ជាមួយនឹងកង់ដ៏ធំមួយ មើលទៅហាក់បីដូចជាម៉ូតូដែលមាន នៅក្នុងរឿងភាពយន្តវិជាសាស្ត្រហូលីវូដអញ្ចឹង។ RYNO គឺជាផលិតផលរបស់សហរដ្ឋអាមេរិក ដោយម៉ាស៊ីន និងតួខ្លួនរបស់វា ត្រូវបានផលិតឡើងពីលោហៈ និងវត្ថុធាតុដែលមានគុណភាពខ្ពស់ ជាមួយនឹងការរចនាម៉ូដពីអ្នកផលិតដ៏ជំនាញផងដែរ។ ម៉ូតូប្រភេទនេះមានទំងន់សរុប 57 គីឡូក្រាមតែប៉ុណ្ណោះ វាអាចបើកបរក្នុងល្បឿនជាមធ្យម 16 គីឡូម៉ែត្រក្នុងមួយម៉ោង ហើយសំរាប់ល្បឿនកំពូលរបស់វាគឺ 40 គីឡូម៉ែត្រក្នុងមួយម៉ោង។
ជាមួយនឹង RYNO យើងអាចធ្វើដំណើរបាន នៅលើគ្រប់ស្ថានភាពផ្លូវ មិនថានៅលើផ្លូវថ្នល់កៅស៊ូ ឬនៅលើផ្លូវដីដែលមានក្រឡុកនោះឡើយ ហើយថាមពលថ្មរបស់វា អាចឲ្យយើងធ្វើដំណើរបានចំងាយ 16គីឡូម៉ែត្រ ដោយយើងអាចធ្វើការបញ្ចូលថាមពលថ្ម ចូលទៅក្នុងដុំអគ្គិសនីរបស់វាវិញ ដូចទៅនឹងការសាកបញ្ចូលថាមពលទូរស័ព្ទដៃអញ្ចឹងដែរ គ្រាន់តែការសាកបញ្ចូលថ្មនោះត្រូវការរយៈពេលប្រមាណជា 90 នាទីឯណោះ។
យើងអាចនិយាយបានថា ចំណុចពិសេសមួយរបស់ RYNO ដែលអាចយកឈ្នះប្រភេទម៉ូតូដ៏ទៃ គឺនៅត្រង់ទំហំរូបរាងដ៏តូច និងងាយស្រួលក្នុងការទុកដាក់របស់វា យើងអាចចតវាបាននៅគ្រប់ទីកន្លែង ហើយម៉្យាងវិញទៀត វាក៏នឹងជួយកាត់បន្ថយការស្ទះចរាចរណ៍បានយ៉ាងច្រើនផងដែរ។ សំរាប់តំលៃរបស់វាគឺប្រហាក់ប្រហែល 5,300 ដុល្លា សហរដ្ឋអាមេរិក ដោយយើងអាចធ្វើការបញ្ជារទិញក្នុងពេលឥឡូវនេះតាមរយៈគេហទំព័ររបស់ Rynomotors។