តើប្រីយមិត្តទាំងអស់គ្នា នៅចាំបានទេថា ធ្លាប់បានស្គាល់រថយន្តម៉ូដែល TOYOTA RAV4 ជាលើកដំបូងតាំងពីពេលណាដែរ? សម្រាប់រូបខ្ញុំផ្ទាល់ បើតាមខ្ញុំអាចចាំបានគឺ ខ្ញុំបានស្គាល់រថយន្តប្រភេទ SUV ធុនតូចនេះដំបូង នៅកំឡុងឆ្នាំ ដែលបទចម្រៀង “បងសុំថើបមួយ” របស់លោកព្រាប សុវត្ថិ និងអ្នកនាងហ៊ឹម ស៊ីវន ទើបតែចេញ ដោយកាលពីពេលនោះ ប្រជាជនខ្មែរភាគច្រើនគឺ ស្គាល់ និងនិយមរថយន្ត TOYOTA RAV4 នេះយ៉ាងខ្លាំង ដោយសារតម្លៃរបស់វាសមរម្យ គុណភាពល្អ និងវាមានកំពស់ខ្ពស់ផងដែរ។ 

រូបភាពពីគេហទំព័ររបស់ toyota

សម្រាប់អត្ថបទនេះ ក្រុមការងារពួកខ្ញុំនឹងបង្ហាញដល់ប្រិយមិត្តទាំងអស់គ្នានូវរថយន្ត TOYOTA RAV4 ឆ្នាំ 2016 ថាតើសម្រាប់ម៉ូដែលឆ្នាំថ្មី និងជំនាន់ថ្មីនេះវាមានការអភិវឌ្ឍន៍ ទៅលើផ្នែកណាខ្លះ?

រថយន្ត TOYOTA RAV4 ឆ្នាំ 2016 គឺជាប្រភេទរថយន្ត SUV ដែលបានបន្ថែមនូវជម្រើសប្រភេទម៉ាស៊ីន hybrid ទៅក្នុងម៉ូដែលឆ្នាំថ្មីមួយនេះ ជាមួយនឹងការអភិវឌ្ឍន៍ជាច្រើនទៅលើបច្ចេកវិទ្យាសុវត្ថិភាព និងកន្លែងមួយចំនួននៅខាងក្នុងរថយន្តផងដែរ។

សម្រាប់ម៉ូដែល RAV4 ឆ្នាំ 2016 គឺជាការអភិវឌ្ឍន៍ថ្មីចុងក្រោយបំផុត របស់រថយន្តប្រភេទ SUV ធុនតូចមួយនេះ។ នៅក្នុងឆ្នាំនេះផងដែរ យើងសង្គេតឃើញថា TOYOTA បានធ្វើការរចនាម៉ូដបន្ថែមទៅលើរូបរាងខាងក្រៅរបស់វា និងបានបន្ថែមបច្ចេកវិទ្យាទំនើបមួយចំនួនទៅក្នុងរថយន្ត ប៉ុន្តែអ្វីដែលអស្ចារ្យសម្រាប់ម៉ូដែលនេះ គឺការបន្ថែមនូវជម្រើសម៉ាស៊ីន hybrid ដើម្បីឲ្យអតិថិជនធ្វើការជ្រើសរើស។ ដូចនេះ គឺវាមានន័យថា រថយន្តម៉ូដែលនេះនឹងជួយសន្សំសំចៃដល់ការប្រើប្រាស់ប្រេងឥន្ធនៈរបស់យើងបានយ៉ាងច្រើនជាងមុន ពោលគឺវាអាចប្រើប្រាស់សាំង តិចជាងរថយន្ត TOYOTA Camry hybrid ទៅទៀត។ ក្រៅពីជម្រើស LE, XLE និង Limited យើងក៏មានជម្រើសថ្មីមួយទៀតពី RAV4 ផងដែរ នោះគឺជម្រើសកញ្ចប់ម៉ូដែលរូបរាង ស្ព័រ SE សម្រាប់យុវវ័យ ដែលចូលចិត្តរថយន្តមានរូបរាងបែបស្ព័រ។

ផ្នែកម៉ាស៊ីន

នៅក្នុងម៉ូដែលអភិវឌ្ឍន៍ឆ្នាំថ្មីនេះ RAV4 ផ្តល់ជម្រើសម៉ាស៊ីនតែពីរប្រភេទឲ្យយើងជ្រើសរើសតែប៉ុណ្ណោះ គឺ ប្រភេទម៉ាស៊ីន I4 មានទំហំស៊ីឡាំង 2.5 លីត្រ កម្លាំង 176 សេស ប្រើប្រាស់ចង្កឹះលេខស្វ័យប្រវត្តិ 6 លេខ។ សម្រាប់ម៉ាស៊ីនមួយនេះ យើងអាចបង្កើនសន្ទុះល្បឿនពី 0-100 គម/ម៉ ដោយត្រូវចំណាយរយៈពេល 9 វិនាទី ដែលមើលទៅវាហាក់បីដូចជាមិនសូវជាលឿនប៉ុន្មាននោះទេ តែសម្រាប់ការបើកបរជាលក្ខណៈគ្រួសារ គឺសមរម្យបំផុត ហើយក្រុមហ៊ុនក៏មានផ្តល់នូវកញ្ចប់ជម្រើសបន្ថែម (AWD) ប៉ុងមុខក្រោយ សម្រាប់ការបើកបរលើផ្លូវ ដែលមានឧបសគ្គច្រើនផងដែរ (off road) ក្នុងតម្លៃ $1,400។

ដោយឡែក ជម្រើសប្រភេទម៉ាស៊ីនមួយទៀតនោះគឺជា ម៉ាស៊ីនប្រភេទ hybrid I4 មានទំហំស៊ីឡាំង 2.5 លីត្រ កម្លាំង 194 សេស ប្រើប្រាស់ចង្កឹះលេខស្វ័យប្រវត្តិ 6 លេខ ដោយវាអាចបង្កើនសន្ទុះល្បឿនពី 0-100 គម/ម៉ ត្រឹមរយៈពេលតែ 8.1 វិនាទីតែប៉ុណ្ណោះ ពោលគឺវាស្ទុះជាងម៉ូដែលម៉ាស៊ីន I4 ធម្មតា។ សម្រាប់ការប្រើប្រាស់ប្រេងឥន្ធនៈវិញគឺ 7.1 លីត្រ ក្នុង 100 គីឡូម៉ែត្រ បើយើងធ្វើការប្រៀបធៀបជាមួយនឹងម៉ាស៊ីន I4 AWD ធម្មតា ដែលមានកំរិតប្រើប្រាស់ប្រេងឥន្ធនៈ 9.4 ក្នុង 100 គីឡូម៉ែត្រ ពោលគឺវាតិចជាងដល់ទៅ 30 ភាគរយ។

រូបភាពពីគេហទំព័ររបស់ toyota

ការរចនាម៉ូដ

ការរចនាម៉ូដរបស់ រថយន្ត TOYOTA RAV4 ឆ្នាំ 2016 ត្រូវបានអ្នកផលិតធ្វើការអភិវឌ្ឍន៍បន្ថែមបន្តិចបន្តួចតែប៉ុណ្ណោះ ដោយសារវាទើបតែស្ថិតនៅក្នុងជំនាន់ទី 4 នៅឡើយទេ។ ទោះជាវាត្រូវបានគេអភិវឌ្ឍន៍ទៅលើរូបរាងយ៉ាងណាក្តី ក៏ប៉ុន្តែវាមិនបានបាត់បង់នៅអត្តសញ្ញាណបែបរថយន្ត SUV ជ្រុងៗ ដែលមានតាំងពីដើមមកនោះឡើយ។ ការរចនាម៉ូដបន្ថែមសំខាន់ៗរបស់វាមានដូចជា នៅផ្នែកខាងមុខ ត្រូវបានគេធ្វើឲ្យមានលក្ខណៈកាន់តែកោងស្រួចចុះក្រោម ជាមួយនឹងផ្នែកខាងក្នុងមួយចំនួនត្រូវបានគេកែលំអរ និងអភិវឌ្ឍឲ្យកាន់តែប្រសើរឡើង។

យើងអាចនិយាយបានថា ការអភិវឌ្ឍន៍ទៅលើរូបរាងរបស់ RAV4 ឆ្នាំ 2016 គឺបានធ្វើឡើងឲ្យវាមានលក្ខណៈមួយប្លែកជាងម៉ូដែលរថយន្តដ៏ទៃៗទៀតរបស់ TOYOTA ដោយផ្នែកខាងក្រោយរបស់រថយន្តម៉ូដែលនេះ ត្រូវបានគេធ្វើការកែប្រែរូបរាងបន្តិចទៅលើកាង ប្រសិនបើយើងមិនធ្វើការអង្កេតឲ្យបានដិតដល់នោះទេ យើងពុំអាចស្វែងរកភាពខុសគ្នាពីម៉ូដែលឆ្នាំចាស់របស់វាបានឡើយ។

ក្រៅពីនេះ ការអភិវឌ្ឍន៍ថ្មី ដែលយើងងាយនឹងមើលឃើញនោះ គឺនៅត្រង់ចំណុចស្តុបខាងមុខ និងក្រោយ ត្រង់សំណាញ់ និងមួយទៀតគឺ ការបន្ថែមបន្ទះពណ៌ប្រាក់ ទៅលើកាងខាងមុខ និងខាងក្រោយរបស់រថយន្ត សម្រាប់ជម្រើសកញ្ចប់ស្ព័រ SE តែប៉ុណ្ណោះ។

រូបភាពពីគេហទំព័ររបស់ toyota

រូបភាពពីគេហទំព័ររបស់ toyota

រូបភាពពីគេហទំព័ររបស់ toyota

ផ្នែកខាងក្នុង

សម្រាប់ម៉ូដែលចុងក្រោយបំផុតនេះ TOYOTA RAV4 បានប្រើវត្ថុធាតុដើម ដែលមានគុណភាពល្អប្រសើរជាងមុន។ ក្នុងនោះផងដែរ អ្នកផលិតក៏បានធ្វើការបន្ថែមម៉ូដស្បែក ដែលមានមុខថ្នេរ ទៅលើផ្ទៃតាប្លូ កុងទ័របង្ហាញអំពីប្រអប់លេខ ដែលមានលក្ខណៈជាឌីជីថល បូករួមនឹងការកំសាន្ត និងផ្តល់ពត៌មាន តាមរយៈអេក្រង់ touchscreen ទំហំ 7.0 អ៊ីញ ជាមួយនឹងរន្ធដោតភ្លើង និងរន្ធ USB មួយចំនួនផងដែរ។ ក្រៅពីនេះ ចំណុចដែលល្អប្រសើររបស់វា គឺស្ថិតនៅកៅអីខាងមុខ ដោយវាមានផាសុកភាពជាងម៉ូដែលមុនៗរបស់វា ទាំងអស់នេះ គឺដោយសារ TOYOTA បានធ្វើការផ្លាស់ប្តូរ និងប្រើប្រាស់នូវសំភារៈ ដែលមានគុណភាពប្រសើរជាងមុន ដូចជាស្បែក និងសរសៃអំបោះ ដែលមានកម្រាស់ក្រាស់ និងមាំជាងមុន។

រូបភាពពីគេហទំព័ររបស់ toyota

រូបភាពពីគេហទំព័ររបស់ toyota

រូបភាពពីគេហទំព័ររបស់ toyota

រូបភាពពីគេហទំព័ររបស់ toyota

រូបភាពពីគេហទំព័ររបស់ toyota

រូបភាពពីគេហទំព័ររបស់ toyota

ផ្នែកសុវត្ថិភាព

នៅក្នុងម៉ូដែលឆ្នាំ 2016 នេះ អ្នកប្រើប្រាស់រថយន្តនឹងមានការចាប់អារម្មណ៍ និងពេញចិត្តយ៉ាងខ្លាំងជាមួយនឹងការដាក់បន្ថែមថ្មីនូវប្រព័ន្ធកាមេរ៉ាសុវត្ថិភាពជុំវិញ 360 ដឺក្រេ តាមរយៈកាមេរ៉ាចំនួន 4 ដែលត្រូវបានភ្ជាប់នៅត្រង់ចំណុច ខាងមុខរថយន្ត សងខាងនៃកញ្ចក់ចំហៀង និងខាងក្រោយរថយន្ត។

រូបភាពពីគេហទំព័ររបស់ toyota

វីដេអូរបង្ហាញអំពីរថយន្ត TOYOTA RAV4 2016 កញ្ចប់ SE AWD