ដូចតែប្រិយមិត្តទាំងអស់គ្នា បានដឹងមកហើយថា ប្រទេសកម្ពុជាយើងគឺជាប្រទេសកំពុងអភិវឌ្ឍន៍ សំរាប់សេដ្ឋកិច្ច របស់ប្រទេសយើងក៏មានភាពរីកចំរើនពីមួយឆ្នាំ ទៅមួយឆ្នាំផងដែរ។ ជាក់ស្តែងបានបង្ហាញឲ្យឃើញថា កំណើនរថយន្តនៅក្នុងប្រទេសយើងបានកើនឡើងយ៉ាងខ្លាំង ជាពិសេសគឺនៅក្នុងទីក្រុងភ្នំពេញតែម្តង ទាំងអស់នេះគឺ ដោយសារតែកំណើនសេដ្ឋកិច្ចរបស់ប្រទេសយើងមានភាពវិជ្ជមានច្រើន ដូចនេះអ្នកដែលមានលិទ្ធភាពក្នុងការជាវរថយន្តក៏កើនឡើងផងដែរ។ តាមរយៈពត៌មានដែល បានមកពីការសាកសួរក្រុហ៊ុន និងឃ្លាំងលក់រថយន្តមួយចំនួន នៅក្នុងទីក្រុងភ្នំពេញ បានបង្ហាញឲ្យដឹងថា សំរាប់ពេលបច្ចុប្បន្ន ម៉ូដែលរថយន្តដែលត្រូវបានប្រជាជនកម្ពុជាយើងគាំទ្រខ្លាំង ឬក៏លក់ដាច់ខ្លាំងបំផុតនោះគឺ រថយន្តម៉ូដែល Camry របស់ TOYOTA។

ខាងក្រោមនេះគឺជាមូលហេតុចម្បងមួយចំនួន ដែលធ្វើឲ្យ រថយន្តម៉ូដែល Camry របស់ TOYOTA ក្លាយជាជម្រើសមួយដ៏ពេញនិយម នៅក្នុងប្រទេសកម្ពុជា ៖

• គុណភាព

ដូចតែអ្នកទាំងអស់គ្នាបានជ្រាបមកហើយថា រថយន្ត TOYOTA Camry របស់ក្រុមហ៊ុនផលិតរថយន្តជប៉ុន មួយនេះត្រូវបាន អ្នកបើកបរភាគច្រើនមិនថានៅក្នុងប្រទេស ឬក្រៅប្រទេសនោះទេ តែងទទួលស្គាល់ថាគឺជាប្រភេទរថយន្ត ដែលមានគុណភាពខ្ពស់ ធន់ និងមានអាយុការប្រើប្រាស់បានយូរ។ បើយើងធ្វើការប្រៀបធៀបវាជាមួយនឹងរថយន្តរបស់ក្រុមហ៊ុនផ្សេង មួយជំនួនដែលមានតម្លៃប្រហាក់ប្រហែលគ្នា យើងនឹងឃើញថារថយន្តរបស់ ក្រុមហ៊ុន TOYOTA អាចប្រើប្រាស់បានយូរជាង និងមិនសូវមានបញ្ហាជាមួយនឹងម៉ាស៊ីននោះឡើយ។

• ប្រភេទ និងកម្លាំងម៉ាស៊ីន

ជាធម្មតា រថយន្តមួយអាចមានកំរិត និងសន្ទុះល្បឿន លឿនប៉ុនណា គឺអាស្រ័យទៅលើប្រភេទ និងកំលាំងម៉ាស៊ីន។ សំរាប់រថយន្ត TOYOTA Camry មានជាប្រភេទមា៉ស៊ីន 4 ម៉ាស៊ីន 6 និង ម៉ាស៊ីន Hybrid ប៉ុន្តែនៅក្នុងប្រទេសកម្ពុជាយើងនិយមតែម៉ាស៊ីន 4 និងម៉ាស៊ីន Hybrid តែប៉ុណ្ណោះ។ ទោះបីជាភាគច្រើននៃរថយន្ត TOYOTA Camry នៅក្នុងប្រទេសយើងភាគច្រើនដើរដោយប្រភេទម៉ាស៊ីន 4 ក្តី ក៏ប៉ុន្តែកម្លាំងម៉ាស៊ីន កំរិត និងសន្ទុះល្បឿន របស់វាគឺមិនអន់នោះទេ ពោលគឺវាមានសមត្ថភាពគ្រប់គ្រាន់ និងសាកសមជាមួយនឹងកត្តាចរាចរណ៍ នៅក្នុងប្រទេសយើង មិនថាសំរាប់ការបើកបរលើផ្លូវក្នុងក្រុងដ៏ចង្អៀត ឬក៏សំរាប់ការបើកបរលើផ្លូវហាយវេនោះទេ។

• ការសន្សំសន្ច័យប្រេងឥន្ធនៈ

ការសន្សំសន្ច័យប្រេងឥន្ធនៈរបស់រថយន្ត គឺជាកត្តាមួយដ៏សំខាន់មុននឹងយើងសំរេចចិត្តជ្រើសរើសយកប្រភេទរថយន្តណាមួយ។ ក្រៅពីប្រភេទនៃម៉ាស៊ីនរថយន្ត អាយុកាលរបស់រថយន្តក៏មានភាពទាក់ទងជាមួយនឹងអត្រា នៃការប្រើប្រាស់ប្រេងឥន្ធនៈរបស់រថយន្តផងដែរ។ ប៉ុន្តែបើយើង ធ្វើការប្រៀបធៀបរថយន្ត TOYOTA Camry ជាមួយនឹងរថយន្តម៉ាកដ៏ទៃទៀត ដែលមានប្រភេទ និងកំលាំងម៉ាស៊ីនប៉ុនគ្នា និងអាយុការប្រហាក់ប្រហែលគ្នា នោះយើងបានឃើញយ៉ាងច្បាស់ថារថយន្ត TOYOTA Camry ពិតជាអាចសន្សំសន្ច័យប្រេងឥន្ធនៈបានច្រើនជាងរថយន្តដ៏ទៃទៀតមែន (ឧទាហរណ៍ ការប្រៀបធៀបរវាងរថយន្ត TOYOTA Camry ម៉ាស៊ីន 4 ឆ្នាំ 2008 ជាមួយនឹង រថយន្ត Honda Accord ដែលមានប្រភេទម៉ាស៊ីនដូចគ្នា និងឆ្នាំដូចគ្នា)។

• ការរចនាម៉ូដរូបរាងខាងក្រៅ និងខាងក្នុង

ការរចនាម៉ូដរូបរាងខាងក្រៅ និងខាងក្នុងរបស់ TOYOTA Camry ពីមួយជំនាន់ទៅមួយចំនាន់ពិតជាអស្ចារ្យ ប្លែក និងទាក់ទាញភ្នែក។ មិនថាសំរាប់អ្នកបើកបរក្នុងវ័យណានោះទេ ភាគច្រើនសុទ្ធតែចូលចិត្ត និងសាកសម្យជាមួយនឹងការរចនាម៉ូដរូបរាងរបស់រថយន្តក្រុមហ៊ុនជប៉ុនមួយនេះ។ ដោយសំរាប់រូបខ្ញុំផ្ទាល់គិតថា ការរចនាម៉ូដរបស់ TOYOTA Camry គឺមានលក្ខណៈតម្រូវដល់មនុស្សគ្រប់វ័យ តែប្រសិនបើអ្នកជាមនុស្សដែលចូលចិត្តភាពឡូយឆាយ  TOYOTA Camry ក៏មានជាជម្រើសបន្ថែមរូបខាងក្រៅជាលក្ខណៈស្ព័រ SE ឲ្យអ្នកជ្រើសរើសផងដែរ។ ម៉្យាងវិញទៀតសំរាប់ការរចនាម៉ូដ ផ្នែកខាងក្នុង ក៏មានជម្រើសជាច្រើនសំរាប់អ្នកជ្រើសរើសផងដែរ ដែលមានចាប់ពីកញ្ចប់ ធម្មតា LE SE រហូតដល់ XLE ដែលជាកញ្ចប់ពិសេស។

• បច្ចេកវិទ្យា

ទោះបីជារថយន្ត TOYOTA Camry មានតំលៃធូរថ្លៃជាង ប្រភេទរថយន្តប្រណិតរបស់អឺរ៉ុប ឬអាមេរិកក្តី ក៏ប៉ុន្តែសំរាប់ ម៉ូដែលជំនាន់ថ្មី ក្រោយៗ របស់ Camry គឺមានបច្ចេកវិទ្យាផ្តល់ភាពងាយស្រួលយ៉ាង ទំនើបៗ និងបច្ចេកវិទ្យាប្រព័ន្ធសុវត្ថិភាព ជាច្រើន មិនចាញ់ប្រភេទរថយន្តប្រណិតទាំងអស់នោះទេ។

• តម្លៃសមរម្យ

តម្លៃគឺជាកត្តាមួយដ៏សំខាន់បំផុត មុននឹងយើងសំរេចចិត្តថានឹងត្រូវទិញរថយន្តប្រភេទណាមួយ។ មិនខុសពីអ្នកបើកបរ នៅក្នុងប្រទេសយើងនោះទេ ភាគច្រើនបានជ្រើសរើសយករថយន្ត TOYOTA Camry ដោយសារតម្លៃដ៏សមរម្យរបស់វា ពោលគឺវាមិនថ្លៃពេក ឬថោកពេកនោះទេ ប៉ុន្តែប្រសិន បើយើងគិតគូរអំពី គុណភាព អាយុការនៃការប្រើប្រាស់ និងបច្ចេកវិទ្យាមួយចំនួន ដែលមាននៅក្នុងរថយន្ត យើងអាចនិយាយបានថាគុណសម្បត្តិទាំងអស់នេះគឺពិតជាសាកសមជាមួយនឹងតម្លៃ។

អ្នកបើកបររថយន្តភាគច្រើនជ្រើសរើស រថយន្ត TOYOTA Prius ដោយសារមូលហេតុបីយ៉ាងគឺ វាមានរូបរាងតូច វាមានតម្លៃថោកសមរម្យ និងវាអាចជួយសន្សំសន្ច័យទៅលើការប្រើប្រាស់ប្រេងឥន្ធនៈយើងបានយ៉ាងច្រើន។ ទោះបីជារថយន្តនេះនៅមានគុណវិបត្តិបន្តិចបន្តួចក្តី ក៏ប៉ុន្តែ សំរាប់គុណសម្បត្តិទាំងបីរបស់វាខាងលើនេះ គឺគ្រប់គ្រាន់អាចឲ្យមនុស្សភាគច្រើនប្រាថ្នាចង់បានវាទៅហើយ ជាពិសេសគឺសំរាប់យុវវ័យតែម្តង។

សំរាប់ខាងក្រោមនេះ គឺជាវិធីសាស្ត្រមួយចំនួនដែលអាចជួយឲ្យយើងទាំងអស់គ្នាសន្សំសន្ច័យការប្រើប្រាស់ប្រេងឥន្ធនៈបាន កាន់តែច្រើនទៀត ជាមួយនឹងរថយន្តម៉ូដែល TOYOTA Prius នេះ ៖

• គួរតែបើកបរក្នុងល្បឿនយឺតល្មម ប្រសិនជាអាច

សំរាប់ការបើកបរទៅគោលដៅ ដែលមានរយៈចំងាយឆ្ងាយ អ្នកគួរតែព្យាយាមបើកបរ ក្នុងល្បឿនមួយដែលថេរ និងយឺតល្មម ( ប្រហាក់ប្រហែល 50 គម/ម៉ ទៅ 55 គម/ម៉) ដោយអ្នកមិនគួរជាន់ហ្វាំងញ៉ឹកញាប់ពេក និងឈប់ច្រើនដងពេកនោះទេ។ នៅពេលដែលអ្នកបង្កើនល្បឿនដល់ 60 ទៅ 70 គម/ម៉ អ្នកគួរតែចាប់ផ្តើមបញ្ឈប់នូវការបន្ថែមល្បឿន ដោយជំនួសដោយការបើកបរយឺតល្មម ដ៏ថេមួយ ( ប្រហាក់ប្រហែល 50 គម/ម៉ ទៅ 55 គម/ម៉) ធ្វើបែបនេះប្រព័ន្ធម៉ាស៊ីនសាំងនឹងផ្អាកដំណើរការ ដោយវានឹងឆ្លាស់មកប្រើម៉ាស៊ីនថ្មអាគុយម្តង។

• កុំប្រើហ្គែល្បឿននៅពេលចុះចំណោត

យើងអាចសន្សំសន្ច័យប្រេងឥន្ធនៈបានយ៉ាងច្រើន នៅរាល់ពេលដែលយើងកាត់បន្ថយការប្រើប្រាស់ហ្គែរល្បឿននៅលើផ្លូវចុះចំណោត ជាពិសេសនៅពេលដែលចុះពីលើស្ពាន ទីទួល ឬភ្នំជាដើម។

• ធ្វើការកំដៅម៉ាស៊ីនជាមុន

រាល់មុនពេលដែលអ្នកចាប់ផ្តើម ធ្វើការបើកបរ អ្នកគួរតែបញ្ឆេះម៉ាស៊ីនមុន ឲ្យបានយ៉ាងហោចណាស់ 10 នាទី។ ពីព្រោះការចាប់ផ្តើមបើកបរ នៅពេលដែលម៉ាស៊ីនរថយន្តមិនទាន់មានកំដៅនឹងធ្វើឲ្យរថយន្តស៊ីប្រេងឥន្ធនៈច្រើន។

• ជៀសវាងផ្លូវដែលមានចរាចរណ៍មមាញឹក

ការបើកបរនៅលើដងផ្លូវ ឬនៅពេលវេលាដែលមានចរាចរណ៍មមាញឹក  គឺជាមូលហេតុចម្បងដែលធ្វើឲ្យរថយន្តរបស់យើងប្រើប្រាស់ប្រេងឥន្ធនៈច្រើនជាងធម្មតា។ ដូចនេះការស្វែងយល់ អំពីពេលវេលា និងស្គាល់តំបន់ ភូមិសាស្ត្រនៃផ្លូវច្រើន អាចជួយឲ្យយើងចៀសផុតពីបញ្ហាចរាចរណ៍ទាំងនេះបាន។

• ជៀសវាងការបើកបរនៅពេលមានព្យុះភ្លៀង

ការបើកបរនៅពេលដែលមានភ្លៀងធ្លាក់ ក៏ជាកត្តាមួយដែលធ្វើឲ្យរថយន្តរបស់យើង ប្រើប្រាស់ប្រេងឥន្ធនៈ ច្រើនជាងធម្មតាផងដែរ។ ទាំងអស់នេះគឺដោយសារ ការបើកបរនៅលើដងផ្លូវនឹងចាប់ផ្តើមមានឧបសគ្គដោយសារភ្លៀង ដែលជាហេតុតម្រូវឲ្យម៉ាស៊ីន និងប្រព័ន្ធរថយន្តចាប់ផ្តើមបន្ថែមសមត្ថភាព និងថាមពលមួយចំនួន ដើម្បីសំរួលដល់ការបើកបរ។

• ត្រួតពិនិត្យសំពាធកង់រថយន្តឲ្យបានត្រឹមត្រូវ

រាល់ពេលមុននឹងធ្វើការបើកបរ យើងគួរតែត្រួតពិនិត្យមើលសំពាធខ្យល់កង់ទាំងបួនរបស់យើងឲ្យបានត្រឹមត្រូវ។ រាល់ការបញ្ចូលសំពាធខ្យល់ ត្រូវប្រព្រឹត្តទៅតាមវិធីសាស្ត្រ និងបទដ្ឋាន ដែលមានចែងនៅក្នុងសៀវភៅរថយន្ត ( car user manual) ។

• ប្រើប្រាស់ប្រេងឥន្ធនៈដែលមានគុណភាពល្អ

ប្រសិនជាអាច អ្នកគួរតែប្រើប្រាស់នូវប្រភេទប្រេងឥន្ធនៈ ទៅតាមការណែនាំ ដែលមាននៅក្នុងសៀវភៅរថយន្ត ពីព្រោះការប្រើប្រាស់ និងការផ្លាស់ប្តូរប្រភេទប្រេងឥន្ធនៈជាញ៉ឹកញាប់ ធ្វើឲ្យការប្រើប្រាស់ប្រេងឥន្ធនៈកើនឡើង និងអាចធ្វើឲ្យម៉ាស៊ីនរថយន្តឆាប់ខូចផងដែរ។

• ស្វែងយល់ឲ្យបានច្បាស់អំពីការប្រើប្រាស់អេក្រង់បង្ហាញថាមពល

អេក្រង់ដែលមាននៅក្នុងរថយន្ត TOYOTA Prius នេះនឹងបង្ហាញអ្នកឲ្យដឹងអំពីដំណើរការរបស់ថាមពលរថយន្ត។ អ្នកនឹងសន្សំសន្ច័យប្រេងឥន្ធនៈ បានយ៉ាងច្រើន ប្រសិនជាអ្នកអាចយល់ច្បាស់អំពីរបៀបនៃការបើកបរ តាមរយៈអេក្រង់បង្ហាញពត៌មានថាមពលនេះ។

• ប្រើប្រាស់ ឬជាន់ឈ្នាន់ល្បឿនឲ្យបានឆាប់រហ័ស

នៅពេលដែលអ្នកចង់បន្ថែមល្បឿន ឬចង់វ៉ារថយន្តដ៏ទៃ អ្នកគួរតែជាន់ឈ្នាន់បន្ថែមល្បឿនឲ្យខ្លាំង និងរហ័ស ការធ្វើបែបនេះនឹងអនុញ្ញាតឲ្យម៉ាស៊ីនថ្មអាគុយផ្តល់ថាមពលជំនួយដល់ ម៉ាស៊ីនសាំង ជាហេតុធ្វើឲ្យការប្រើប្រាស់សាំងត្រូវបានកាត់បន្ថយ។

• មានទំលាប់ប្រើប្រាស់ប្រព័ន្ធកំណត់ល្បឿនដោយស្វ័យប្រវត្ត ( cruise control)

ប្រព័ន្ធកំណត់ល្បឿនដោយស្វ័យប្រវ័ត្ត គឺជាបច្ចេកវិទ្យាមួយដ៏ល្អ ក្នុងការជួយសន្សំសន្ច័យដល់ការប្រើប្រាស់ប្រេងឥន្ធនៈ។ មូលហេតុគឺដោយសារ នៅពេលដែលយើងចាប់ផ្តើមដំណើរការប្រព័ន្ធកំណត់ល្បឿនដោយស្វ័យប្រវ័ត្ត រថយន្តរបស់យើងនឹងចាប់ផ្តើមដើរជាមួយល្បឿនមួយដ៏ថេ និងមានកំណត់។

• កាត់បន្ថយការប្រើប្រាស់ម៉ាស៊ីនត្រជាក់

យើងគួរតែមានទំលាប់កាត់បន្ថយការប្រើប្រាស់ម៉ាស៊ីនត្រជាក់ ដោយសារ ការប្រើប្រាស់ម៉ាស៊ីនត្រជាក់ខ្លាំងហួសហេតុ គឺជាមូលហេតុមួយនៃការប្រើប្រាស់ប្រេងឥន្ធនៈច្រើន។ គួរបញ្ឈប់នៅទំលាប់ដែលតែងប្រើប្រាស់ម៉ាស៊ីនត្រជាក់នៅកំរិត អតិបរមា ដោយសាកល្បងប្រើប្រាស់កង្ហាម៉ាស៊ីនត្រជាក់ និងកំណត់ស៊ីតុណ្ហភាពម៉ាស៊ីនត្រជាក់ ឲ្យបានសមរម្យ មិនត្រជាក់ពេក។

• តំហែទាំរថយន្ត

ចំណុចនេះ គឺមិនមែនតែសំរាប់អ្នកដែលបើកបររថយន្ត TOYOTA Prius នោះទេ គឺវាសំរាប់ម្ចាស់រថយន្តគ្រប់ប្រភេទតែម្តង។ យើងគួរមានតំហែទាំរថយន្តរបស់យើងឲ្យបានត្រឹមត្រូវទៅតាមបទដ្ឋានដែលមាននៅក្នុងសៀវភៅរថយន្ត ដូចជា ៖

1. គួរធ្វើការផ្លាស់ប្តូរប្រេងម៉ាស៊ីនក្នុងរយៈចំង៉ាយ 4,000 ទៅ 5,000 គីឡូម៉ែត្រ ម្តង។
2. ធ្វើការផ្លាស់ប្តូរតម្រង់អ៊ែរ រៀងរាល់រយៈចំង៉ាយ 45,000 គីឡូម៉ែត្រ។
3. ធ្វើការផ្លាស់ប្តូរដុំបញ្ឆេះរៀងរាល់ 150,000 គីឡូម៉ែត្រម៉្តង។
4. ធ្វើការសំអាតប្រព័ន្ធបំពង់សាំងរៀងរាល់ 4,000 គីឡូម៉ែត្រម្តង។
5. ធ្វើការត្រួតពិនិត្យរថយន្តជាប្រចាំ។