Smart watch គឺជាប្រភេទសម្ភារៈបច្ចេកវិទ្យាថ្មីមួយក្នុងទីផ្សារដែលទទួលការចាប់អារម្មណ៍ពីអតិថិជនជាច្រើនជាពិសេសអ្នកមានចំណូលចិត្តទៅលើបច្ចេកវិទ្យា។ ក្នុងទីផ្សារនោះមាន Apple Watch ដែលជា smart watch ដែលពេញនិយមបំផុតបន្ទាប់មកមាន នាឡិកាដែលដំណើរការដោយប្រព័ន្ធ Android Wear ដែលផលិតដោយក្រុមហ៊ុនជាច្រើន។ Smart watch គឺជាឧបកណ៍មួយដែលមនុស្សជាច្រើនគិតថាពួកគាត់មិនត្រូវការប្រើប្រាស់នោះទេ ប៉ុន្តែសម្រាប់អ្នកដែលធ្លាប់ប្រើវាហើយពួកគាត់យល់ថាឧបករណ៍នេះគឺជាឧបករណ៍មួយដែលមិនអាចខ្វះបានទាល់តែសោះ ព្រោះវាមានផ្តល់មុខងារជាច្រើនដែលអាចសម្រួលដល់សុខភាព ការងារ និងការកំសាន្តរបស់អ្នកប្រើប្រាស់ ហើយជាពិសេសទៀតនោះវាអាចពាក់នៅជាប់កដៃរបស់អ្នកប្រើប្រាស់គ្រប់ពេលវេលាដែលធ្វើឲ្យកាន់តែងាយស្រួលថែមទៀត។ បញ្ហាមួយសម្រាប់ឧបករណ៍ប្រភេទនេះគឺដោយសារវាជាប្រភេទផលិតផលថ្មីក្នុងទីផ្សារ សម្រាប់អតិថិជនធម្មតាគាត់អាចមានអារម្មណ៍ថាពិបាកប្រើ ម៉្យាងវិញទៀតតម្លៃថ្លៃរបស់ផលិតផលនេះធ្វើឲ្យទីផ្សារ smart watch នៅប្រទេសយើងមិនសូវពេញនិយមខ្លាំងទេ។
ទុក smart watch តម្លៃរាប់រយដុល្លាដោយឡែក ពួកយើងសង្កេតឃើញថានៅប្រទេសយើងសព្វថ្ងៃមានការពេញនិយមទៅលើប្រភេទ smart watch ដែលមានតម្លៃថោកៗដែល onlineshop តូចៗក្នុងបណ្តាញសង្គមយកមកពីស្រុកក្រៅ។ smart watch ថោកៗទាំងនោះមានភាពខុសគ្នាជាច្រើនហើយអ្វីដែលពួកខ្ញុំចាប់អារម្មណ៍ជាងគេនោះគឺផលិតផល smart watch ដែល ហាង A-Y Collection (សូមចុចទីនេះដើម្បីឆ្ពោះទៅកាន់ទំព័រ Facebook របស់ហាងនេះ) បានយកមកលក់ថ្មីៗនៅក្នុងទីផ្សារស្រុកយើងដែលមានតម្លៃសមរម្យ និងមានមុខងារដែលគួឲ្យចាប់អារម្មណ៍ជាច្រើន។ ដោយមានចម្ងល់ និងបានទំនាក់ទំនងជាមួយហាងនេះ ពួកគាត់បានផ្ញើរ smart watch ចំនួន 2 គ្រឿងមកឲ្យពួកខ្ញុំដើម្បីសាកល្បង និងតេស្តមើលមុខងាររបស់វា។ ជាការពិតណាស់ smart watch នេះវាមិនមានមុខងារដូច Apple Watch ដែលមានតម្លៃប្រហែល $349 ឡើងទៅ ឬក៏ Android Wear ដែលមានតម្លៃចាប់ពី $150 ឡើងទៅទេ (តម្លៃនៅប្រទេសអាមេរិក មិនមែនតម្លៃនៅក្នុងទីផ្សារកម្ពុជាទេ) ប៉ុន្តែដោយមានតម្លៃត្រឹមតែ $48 វាជាឧបករណ៍មួយដែលផ្តល់នូវមុខងារជាច្រើនមកពីការចំណាយដ៏តិចតួចនេះ។
ជាការភ្ញាក់ផ្អើលសម្រាប់ពួកខ្ញុំ ម៉ូដែល G10 របស់ smart watch ប្រភេទនេះវាមានរូបរាងស្រដៀងគ្នានឹង Apple Watch Sport ដែរ។ អ្នកអាចពាក់នាឡិកានេះហើយនឹងទទួលការចាប់អារម្មណ៍ពីមនុស្សជាច្រើនព្រោះនាឡិកានេះមើលពីចម្ងាយទៅដូច Apple Watch យ៉ាងខ្លាំង។ នេះប្រហែលជាកត្តាមួយដែលធ្វើឲ្យនាឡិកានេះមានការពេញនិយមខ្លាំងក្នុងទីផ្សារយើង។ នៅក្នុងប្រអប់របស់វាពួកខ្ញុំបានឃើញសៀវភៅណែនាំ និងខ្សែសម្រាប់សាកថ្មនាឡិកានេះ។
នៅផ្នែកខាងក្រោយរបស់នាឡិកានេះវិញវាមិនមានកញ្ចក់កែវនិង sensors ដូច Apple Watch ទេ ប៉ុន្តែវាមានរន្ធបញ្ចេញសម្លេង ដែលធ្វើឲ្យខ្ញុំឆ្ងល់ថាតើនាឡិកាតូចមួយនេះអាចបញ្ចេញសម្លេងបានប៉ុណ្ណាដែរ?
ដោយបើកគម្របក្រោយចេញ ពួកខ្ញុំបានឃើញថ្មដែលអ្នកអាចដោះដូរបាន ដែលអាចផ្ទុកបានចរន្ត 380mAh ដូចនេះសម្រាប់អ្នកដែលប្រើប្រាស់ច្រើន ពួកគាត់អាចជាវថ្មបន្ថែមមួយទៀតសម្រាប់បំរុងទុក។ យោងតាម A-Y Collection ថ្មរបស់នាឡិកានេះអាចផ្តល់ថាមពលឲ្យនាឡិកានេះបានមួយថ្ងៃ និងអាច បិទអេក្រង់ standby បាន 2 ថ្ងៃ។ ដូចនេះអ្នកត្រូវសាកនាឡិកានេះជារាងរាល់យប់ដូចទូរស័ព្ទ smartphone របស់អ្នកដែរ។ បើដោះថ្មចេញយើងនឹងឃើញកន្លែងដាក់បញ្ចូល SIM card ទំហំ micro-SIM និង កន្លែងដាក់បញ្ចូលកាតចងចាំទំហំ microSD ដែលវាជាការភ្ញាក់ផ្អើលមួយទៀតសម្រាប់ពួកខ្ញុំ (smart watch ថោកមួយនេះអាចប្រើជាទូរស័ព្ទដោយឯងកើត ដោយមិនចាំបាច់ភ្ចាប់ជាមួយទូរស័ព្ទ?)
ដោយបើកនាឡិកានេះឲ្យដំណើរការយើងឃើញ Home Screen របស់ប្រព័ន្ធដំណើរការក្នុងនាឡិកានេះដែលមានប៊ូតុងទូរស័ព្ទ និងប៊ូតុងបញ្ជីទំនាក់ទំនង។ ផ្នែកនាឡិកាវិញ វាមានមុខនាឡិកា 3 អ្នកអាចផ្លាស់ប្តូរមុខនាឡិកាដោយចុចចំណុចកណ្តាលរបស់វានៅលើអេក្រង់។ អេក្រង់របស់នាឡិកានេះមិនមានលក្ខណៈម៉ដ្ឋដូចអេក្រង់របស់នាឡិកា Apple Watch ឬ Android Wear ដែលមានតម្លៃថ្លៃៗទេប៉ុន្តែវាមានលក្ខណៈភ្លឺល្អនិងល្មមមើល (អក្សរ) បានដោយងាយ ម៉្យាងវិញទៀតអេក្រង់ touchscreen របស់នាឡិកានេះក៏មានល្បឿនឆ្លើយតបលឿនល្អផងដែរ។ បើរភ្ជាប់នាឡិកានេះជាមួយទូរស័ព្ទរបស់អ្នកតាមប៊្លូធូស (Bluetooth) នាឡិកានេះអាចទាញយកបញ្ជីទំនាក់ទំនង និង លេខទូរស័ព្ទពីក្នុងទូរស័ព្ទអ្នកបាន។
ខ្សែនាឡិកាមានលក្ខណៈរលោងនិងទន់ដែលស្រដៀងនឹង Silicon band របស់ Apple Watch ដែរ (មានរូបរាងដូចគ្នា)។ កង់បង្វិលរបស់នាឡិកានេះអាចបង្វិលបាន ប៉ុន្តែវាមិនមានមុខងារអ្វីនោះទេ។ អ្នកអាចចុចកង់បង្វិលនាឡិកានេះពីចំហៀងនាឡិកាហើយវាគឺជាប៊ូតុងតែមួយគត់របស់នាឡិកានេះ ប៉ុន្តែដោយសារអេក្រង់នាឡិកានេះជាប្រភេទអេក្រង់ touchscreen ប៊ូតុងតែមួយនេះវាផ្តល់ឲ្យគ្រប់គ្រាន់ហើយ។
អ្វីដែលពួកខ្ញុំចង់បានលើនាឡិកានេះគឺការបំភ្លឺអេក្រង់ដោយស្វ័យប្រវត្តិពេលអ្នកលើកដៃនិងបង្វិលមុខនាឡិកាបែរមកខាងខ្លួនរបស់អ្នក។ ការទៀមទារឲ្យចុចប៊ូតុងមួយដើម្បីបំភ្លឺអេក្រង់សម្រាប់មើលម៉ោងវាដូចជាមិនសូវងាយស្រួលទេប្រៀបធៀបទៅនឹង smart watch ផ្សេងៗនិង នាឡិកាធម្មតា។
អ្នកអាចធ្វើការហៅទូរស័ព្ទចេញដោយចូលក្នុងកម្មវិធីទូរស័ព្ទ និងវាយលេខទូរស័ព្ទលើអេក្រង់បាន។ នាឡិកានេះផ្តល់ការហៅចេញពីរប្រភេទ ប្រភេទហៅចេញទីមួយគឺ Local call បើអ្នកបានដាក់បញ្ចូល SIM card ក្នុងនាឡិកានេះ អ្នកអាចធ្វើការហៅចេញនិងនិយាយតាមនាឡិកាផ្ទាល់ ដូចអ្នកប្រើប្រាស់ទូរស័ព្ទដៃរបស់អ្នកអញ្ចឹង; ហើយប្រភេទហៅចេញទីពីរនោះគឺ BT call ដែលនាឡិកានេះអាចប្រើជា speaker សម្រាប់និយាយទូរស័ព្ទបានដោយត្រូវការភ្ជាប់នាឡិកានេះជាមួយទូរស័ព្ទដៃរបស់អ្នក (ទូរស័ព្ទដៃជាអ្នកធ្វើការហៅចេញ នាឡិកាជា speaker) ។ ពួកខ្ញុំសង្កេតឃើញថាសម្លេងរបស់នាឡិកានេះមានលក្ខណៈច្បាស់និងឮខ្លាំងសម្រាប់ឧបករណ៍ទំហំតូចបែបនេះ។
អ្នកអាចសាកថ្មនាឡិកានេះបានដោយបើកគម្របរន្ធ micro-USB ឡើងនិងដោតខ្សែ USB ចូល។ អ្វីដែលពួកខ្ញុំចូលចិត្តជាមួយនាឡិកានេះគឺវាអាចភ្ជាប់ជាមួយកុំព្យូទ័របានតាមខ្សែ USB ហើយដោយជ្រើសរើសយកជម្រើស ‘Mass storage’ នោះនាឡិកានេះនឹងអាចប្រើសម្រាប់ស្ទុកឯកសារគ្រប់យ៉ាងបានចូលក្នុងទំហំអង់ចងចាំប្រមាណ 470MB (មេហ្កាបាយថ៍) ដែលមានក្នុងនាឡិកានេះ ហើយបើអ្នកបានដាក់បញ្ចូល កាតចងចាំ microSD ក្នុងនាឡិកានេះទៀតនោះវាអាចស្តុកឯកសារបានកាន់តែច្រើន។
មុខងារមួយទៀតគឺការផ្ញើរសារតាមទូរស័ព្ទផ្ទាល់ដោយមានឃីបដសម្រាប់សរសេរនៅលើអេក្រង់នាឡិការផ្ទាល់ប៉ុន្តែវាមានទំហំតូចដែលពិបាកក្នុងការសរសេរសារបន្តិច។ មុខងារផ្សេងៗទៀតមានដូចជាកម្មវិធីគិតលេខដែលមនុស្សជាច្រើនត្រូវការ, ស្តាប់ចម្រៀងដែលនាឡិកានេះអានចម្រៀងចេញពីក្នុងកាតចងចាំនៅខាងក្នុងនាឡិកាផ្ទាល់ ឬបញ្ជូនសម្លេងតាមប៊្លូធូស (Bluetooth), មុខងារថតសម្លេង, អាន notification ដែលទទួលពីក្នុងទូរស័ព្ទដៃ (បើរភ្ជាប់នាឡិកានេះ នឹង ទូរស័ព្ទដៃតាមប៊្លូធូស), រាប់ចំនួនជំហ៊ានដែលអ្នកដើរ, ម៉ោងរោទ៍, ប្រតិទិន, ស្តាប់វិទ្យុ, និងវាយតម្លៃការគេងរបស់អ្នក (បើអ្នកពាក់នាឡិកានេះហើយបើកមុខងារនេះចោលពេលអ្នកគេង)។
KhmerLife.style សូមណែនាំនាឡិកាដំបូងបង្អស់ក្នុងពិភពលោកដែលមានភ្ជាប់ជាមួយកាមេរ៉ាថតរូប និងវីដែអូ។ អ្វីដែលគួរឲ្យភ្ញាក់ផ្អើលមួយទៀតនោះគឺថានាឡិកានេះមានកាមេរ៉ាខាងមុខដែលអាចថតរូបមានទំហំតូចត្រឹម 640 x 480px កាមេរ៉ានេះក៏អាចថតវីដែអូបានដែរ (ប៉ុន្តែអ្នកគួរតែកុំរំពឹងទុកថារូបភាពដែលថតដោយកាមេរ៉ានាឡិកានេះវាមានគុណភាពទទួលយកបានអីល្អជាង)។ ហើយអ្នកអាចមើលរូបភាពនិងវីដែអូបានក្នុងនាឡិកានេះដោយផ្ទាល់។
សរុបមក…
នាឡិកានេះមានតម្លៃថោកមែនប៉ុន្តែវាមានរូបរាងប្រហាក់ប្រហែលជាមួយនាឡិកា smart watch តម្លៃថ្លៃរបស់ Apple។ វាមិនផ្តល់ឲ្យដូចអ្វីដែល smart watch មានតម្លៃថ្លៃៗជាងនេះយ៉ាងច្រើនអាចផ្តល់ឲ្យទេ។ ប៉ុន្តែវាក៏ផ្តល់មុខងារដល់អ្នកជាច្រើនដោយមិនចាំបាច់តម្រូវឲ្យអ្នកចំណាយថវិកាច្រើននោះទេ រួមជាមួយភាពប្លែកប្រៀបធៀបនឹងនាឡិកាដៃធម្មតាទៀត។ ប្រហែលជាកត្តាទាំងនេះហើយដែលធ្វើឲ្យនាឡិកានេះមានការពេញនិយមច្រើននៅក្នុងទីផ្សារប្រទេសយើង។ ចំពោះខ្ញុំផ្ទាល់ខ្ញុំនៅតែស្រលាញ់ Apple Watch ដែលខ្ញុំប្រើប្រាស់សព្វថ្ងៃដដែល ប៉ុន្តែចំពោះអ្នកដែលចង់មាននាឡិកាដែលមានមុខងារច្រើនជាងនាឡិកាដៃធម្មតា ហើយមិនចង់ចំណាយថវិកាច្រើននោះ អ្នកគួរតែសាកល្បងនាឡិកានេះ។
បើអ្នកមានចំណាប់អារម្មណ៍លើនាឡិកានេះអ្នកអាចទាក់ទងហាង A-Y Collection ដែលមានគេហៈទំព័រ៖ www.a-ycollection.com ឬ ទំព័រ Facebook របស់ពួកគាត់នៅ ទីនេះ ឬ តាមលេខទូរស័ព្ទ 092/093/061/069 311138 ម៉ូដែលនាឡិកានេះមានពណ៌ជាច្រើនសម្រាប់ឲ្យអ្នកជ្រើសរើស។ ម៉ូដែលនេះមានតម្លៃ $48 និងមានជម្រើសពណ៌ដែលមានបង្ហាញដូចក្នុងរូបភាពខាងក្រោម ហាងដដែលនេះមានលក់នាឡិកាម៉ូដែលមួយទៀតដែលមានរូបរាងខុសគ្នាប៉ុន្តែមានមុខងារដូចគ្នាដែលមានតម្លៃ $98។